Na čym budziem jeździć paśla Novaha hoda?

Na pakupku niedarahoj patrymanaj inšamarki zastałosia paŭhoda.

Pa infarmacyi Biełstata, 33% domahaspadarak u krainie majuć ułasnyja aŭtamabili. Na uliku ŭ DAI staić bolš za 2,2 młn aŭto. Praŭda, daloka nie kožnaje na chadu. Pieravažnaja bolšaść — patrymanyja jeŭrapiejskija marki. Choć i ahulnaja dola savieckich i rasijskich mašyn niemałaja. «Žyhula» jašče nie mohuć abahnać ni «Falksvahien», ni inšyja zachodniki.

Navahodni padarunak biełarusam

Myty na patrymanyja inšamarki ŭ Biełarusi ŭ niekalki razoŭ mienšyja, čym u Rasii. Ale z pačatkam dziejnaści ŭmovaŭ Mytnaha sajuza jany zraŭnajucca.

Naprykład, zaraz aŭtamabil 2003 h.v. z abjomam ruchavika 2000 kub sm možna ŭvieźci ŭ Biełaruś, zapłaciŭšy 800 jeŭra za razmytnieńnie,

a z 1 studzienia 2010 hoda hetaja suma vyraście da 8 tys. jeŭra. Praŭda, dla jurydyčnych asobaŭ.

Dla prostaha spažyŭca myty zastanucca na raniejšym uzroŭni prynamsi da lipienia 2010 hoda. Pry hetym adzin čałaviek maje prava ŭvieźci na terytoryju Biełarusi nie bolš za adzin aŭtamabil u hod.

Novaje aŭto — nie pa kišeni

Staršynia praŭleńnia Biełaruskaj aŭtamabilnaj asacyjacyi Siarhiej Michnievič zajaŭlaje, što z pavyšeńniem mytaŭ aŭtamabili nierasijskaj vytvorčaści padaražejuć u aŭtadyleraŭ prykładna na 4 tysiačy dalaraŭ.

Jak miarkujuć analityki aŭtarynka, pavodle vynikaŭ hoda čakajecca źnižeńnie prodažaŭ novych aŭtamabilaŭ u Biełarusi na 50% u paraŭnańni z 2008 hodam.

Uviadzieńnie novych mytaŭ adsunie biełaruski aŭtarynak da ŭzroŭniu 1998—1999 hadoŭ.

Naprykład, novy Volkswagen Passat Lim Trendline zaraz kaštuje $23 tysiačy pa katałohu, ź ich na razmytnieńnie idzie $1650. Paśla Novaha hoda na mytni pryjdziecca pakinuć 30% ad koštu mašyny — kala $7 tysiač. Roźnica ŭ canie kankretnaj madeli składzie $5,5 tysiačy, jakimi Rasija choča padtrymać svaju aŭtapramysłovaść.

Kolkaść novych aŭtamabilaŭ, pradadzienych u Biełarusi ŭ 2008 i 2009 hh.

Pavialičyć

Udvaja niaščasnyja dylery

Samaje śmiešnaje, što pakul biadujuć aŭtadylery ŭ Biełarusi, nastolki ž harotnymi vyhladajuć i dylery ŭ Rasii. Pryčyny adnolkavyja — kampanii nie zmohuć vytrymlivać kankurencyju ź biełaruskimi pryvatnikami.

Dyrektar pa stratehičnym raźvićci adnaho z najbujniejšych dyleraŭ, «Atłant‑M», Alaksiej Ciareščanka ličyć, što za studzień—lipień 2010 h. kiemlivyja hramadzianie Biełarusi paśpiejuć uvieźci niekalki sotniaŭ tysiač inšamarak, kab paśla pierahnać ich u susiedniuju Rasiju. Davier da mašyn zachodniaj zborki ŭ rasijan vyšejšy, čym da zroblenych ułasnymi rukami, chaj i pa zachodniaj technałohii.

Katajciesia na biełaruskim

Tym, chto nie daviaraje ni zachodnim, ni rasijskim vytvorcam, a choča «kuplać svajo», varta dačakacca budaŭnictva aŭtazavoda ŭ Lidzie. Prajekt aceńvajecca ŭ 40 miljonaŭ dalaraŭ. Na Hrodzienščynie zmohuć vypuskać 20—30 tysiač mašyn u hod, jakija pavinny vyznačacca ekanamičnym raschodam paliva. Prykładny košt novaha biełaruskaha lehkavika składzie 6 tysiač dalaraŭ.

Nie varta zabyvacca i na «Samandy». Na ich myty taksama nie ŭpłyvajuć. Praŭda, i abjomy prodažaŭ nie radujuć vytvorcaŭ. Nie dziva: cana novaj mašyny $13—15 tysiač.

Mašyny pačali daražeć

Aŭtarynak užo zreahavaŭ na chutkaje pavieličeńnie mytaŭ. Cenavaja płanka na patrymanyja mašyny na minskim, bresckim i hrodzienskim aŭtarynkach za tydzień skoknuła na 400—600 dalaraŭ. Na adnym z samych viadomych biełaruskich aŭtarynkaŭ

u Hrodnie ceny za apošni miesiac pavysilisia bolš čym na tysiaču dalaraŭ.

Uzdym prodažu pačaŭsia niedzie z kanca vieraśnia, kali pajšli razmovy pra novyja myty. Jak prahnazujuć handlary aŭto, da kanca hoda ceny nie spyniacca.

Tury pa mašyny

Isnujuć śpiecyjalnyja kampanii, jakija arhanizoŭvajuć «tury pa mašyny». Jak u Hrecyju turystaŭ pryvoziać kuplać futry, tak u Litvu ładziacca arhanizavanyja pajezdki dla achvotnych prydbać aŭto.

Pasłuha kaštuje kala $350. U hetyja hrošy ŭvachodzić afarmleńnie šenhienskaj vizy, pražyvańnie ŭ hateli, tranzitny numar, paliva i strachavańnie aŭtamabila… U Litvu ŭsie kupcy adpraŭlajucca razam z supracoŭnikami kampanii. Tam śpiecyjalisty nahladajuć aŭtamabili, afarmlajuć dakumienty, i klijent viartajecca ŭ Biełaruś užo na svajoj mašynie.

Pakolki bližejšyja paŭhoda fizičnyja asoby mohuć pryvozić aŭtamabili pa raniejšych mytach, u ludziej z kamiercyjnaj žyłkaj źjaviłasia biznes‑ideja. Treba na ŭsie hrošy nabracca mašyn, a paśla jechać pradavać ich rasijanam, jakija ŭsio jašče pakutujuć ad vysokich cen. Pakolki adnamu čałavieku možna ŭvozić nie bolš za adnu mašynu ŭ hod, u internecie pavialičyłasia kolkaść abjavaŭ: «Šukaju kampańjona dla pryhonu aŭto». Pasłuha aceńvajecca ŭ $50—100.

Najbolš papularnyja aŭtarynki ŭ Litvie: Kłajpieda, Maryjampal i Haruny pad Vilniaj. Prybiarežnaja Kłajpieda słavicca mašynami prosta z paroma, jaki prypłyŭ z Hiermanii ci navat ZŠA. Pa litoŭskaj ziamli jany nie prajechali ni kiłamietra. Astatnija dva rynki — prodaž jeŭrapiejskich mašyn z aŭtavozaŭ.

Mytny sajuz udaryŭ nie tolki pa biełarusach, ale i pa litoŭcach. Šmat chto ź ich žyŭ za košt aŭtavozaŭ i dalejšaha prodažu mašyn u Rasiju i Biełaruś.

Biełaruskija aŭtarynki

Kali jechać u susiednija krainy niama ni času, ni žadańnia, ci roźnica ŭ koštach niekalki tysiač dalaraŭ nie zdajecca pryncypovaj, možna adpravicca i na biełaruskija aŭtarynki. U krainie ich siem: «Malinaŭka» i «Ždanovičy» ŭ Minsku, «Bakuninski» i «Asaŭcy» kala Homiela, a taksama brescki, hrodzienski i viciebski.

Čym bližej da Litvy, tym tańniej. Ličycca, što na hrodzienskim aŭtarynku ceny najnižejšyja. Praŭda, i mašyny tam mienš padrychtavanyja. Adpaliravanyja da blasku, jany nakiroŭvajucca ŭ Minsk, dzie pradstaŭleny najbolšy vybar.

Biazmytnyja lehkavuški rasijskaj zborki

U toj čas jak myty na zachodnija aŭto pavialičacca, mašyny, sabranyja ŭ Rasii, buduć uvozicca ŭ Biełaruś naohuł biez mytaŭ. Myty zdymajucca ŭ tym vypadku, kali pramysłovaja zborka dasiahnuła 30% łakalizacyi. Na ŭsie krainy‑ŭdzielnicy Mytnaha sajuza budzie raspaŭsiudžvacca rasijskaje zakanadaŭstva ŭ halinie zboračnaj vytvorčaści, jakoje na dadzieny momant roznaje ŭ kožnaj krainie. Pavodle mierkavańnia ekśpiertaŭ, abjom zborki aŭto zachodnich marak u Rasii nie zmoža zadavolić patreby biełaruskich spažyŭcoŭ. Ciapier u Rasii dziejničaje kala dziesiatka zavodaŭ, jakija ažyćciaŭlajuć zborku aŭtamabilaŭ zamiežnaj vytvorčaści.

Klučavoje pytańnie, ci adpaviadajuć aŭtamabili, sabranyja ŭ Rasii, jakaści zachodniaj ci japonskaj zborki? Pytańnie amal rytaryčnaje. Usierasijski centr vyvučeńnia hramadskaha mierkavańnia pravodziŭ uviesnu apytańnie pa hetaj prablemie. Tolki 6% patryjotaŭ byli pierakananyja, što rasijskaja zborka — najlepšaja ŭ śviecie.

Pavialičyć

Siarod minusaŭ rasijskich inšamarak nazyvajuć nie tolki razhildziajskaje staŭleńnie rabočych, kantrol za dziejańniami jakich słaby. Pryncypovy momant — horšaja jakaść zapčastak. Naprykład, ramont pieršych usievołžskich Ford Focus II z prablemami sa sčapleńniem kaštavaŭ 15% ad cany novaj mašyny.

Aŭtamabilaŭ rasijskaj zborki na biełaruskich rynkach pradajecca niašmat. Dyj cana na ich amal nie roźnicca ad cenaŭ na aryhinalnyja patrymanyja aŭto. Roźnica nie pieravyšaje 2—3%.

Materyjały pałos padrychtavali Volha Žarnasiek i Jahor Marcinovič

Aŭtamabil u kredyt

Pakolki isnuje zabarona na vydaču fizičnym asobam kredytaŭ u valucie, usie hrošy vydajucca tolki ŭ biełaruskich rublach.

Prapanoŭ ad bankaŭ chapaje, tolki voś pracenty pa ich nie radujuć.

«Pryjorbank» hatovy vydać pad nabyćcio mašyny ad $5000 da $35000 u rublovym ekvivalencie na piać hadoŭ pad 25% hadavych. Bank kredytuje nie bolš za 80% cany aŭto. Mašynu možna kupić tolki ŭ jurydyčnaj asoby.

«Biełhazprambank» daje kredyt na 80% cany novaha aŭtamabila na 5 hadoŭ pad 22,5%—23,5%. Na patrymanaje aŭto staŭka 23,5%—24,5%, a termin — čatyry hady.

«BPS‑bank» — heta kredyt na pakupku tolki novaha aŭto. Umovy — 70% cany mašyny na 3 hady pad 27,5%.

U dakryzisnyja časy staŭki składali 12—13% hadavych u valucie i 16—18% hadavych u biełaruskich rublach.

Kali śpiecyjalny aŭtakredyt bank nie vydaje, možna pasprabavać uziać spažyviecki.

Časam kredytnyja prapanovy robiać aŭtacentry. Sałon «Atłant‑M», jaki pradaje «Falksvahieny», vydaje hrošy pad 20,8% hadavych na siem hadoŭ. Patrabavańnie — aficyjnaja praca ŭ Biełarusi i daviedka ab dachodach.

Bolšaść aŭtacentraŭ supracoŭničajuć z kankretnymi bankami i prosta dapamahajuć aformić usie patrebnyja dakumienty. Naprykład, centr «Reno» pracuje z «Biełrosbankam», a «Tajota» prapanuje vybar miž «Fransabankam», «BTA Bankam» i tym samym «Biełrosbankam».

Rasijskija zavody, jakija źbirajuć zachodnija aŭto

1. Zavod kancerna FordMotor (Usievołažsk) — FordFocus. 125 tys. mašyn za hod.

2. ZAT «Aŭtator» (Kalininhrad) — KIAMotors, BMW i GeneralMotors. Za studzień‑listapad 2008 h. — 101,1 tys. mašyn.

3. ZAT «GM‑AŭtaVAZ» (Taljaci) — GeneralMotors ( ChevroletNiva i ChevroletViva). 55 tys. aŭto (2007).

4. AAT «Aŭtaframas» (Maskva) — Renault Logan. Za studzień‑listapad 2008 — 71,8 tys.

5. Aŭtamabilnaja kampanija Sollers — FiatAlbea, Ssang Yong Rexton, Ssang Yong Kyron i Ssang Yong Actyon.

6. TAA «TahAZ» (Tahanroh) — Hyundai Accent, Hyundai Sonata, Hyundai Santa Fe Classic, Hyundai Elantra XD.

7. Zavod Volkswagen (Kałuha) — WV Passat, Skoda Octavia i Skoda Octavia Tour. Da 2010 mahutnaść zavoda pavinna ŭzraści da 150 tys.

8. AAA «Aŭtamabilnaja kampanija «Derviejs» (Čarkiesk) — Lifan 7160.

9. AAA «Tajota Manufekčurynh Rasija» (Šušary pad Sankt‑Pieciarburham) — Toyota Camry. 50 tys. u hod.

10. Aŭtamabilny zavod General Motors (Šušary) — Chevrolet Captiva i Opel Antara. Raźličany na 40 tys. aŭto ŭ hod, ale dniami kanviejer byŭ spynieny.

• 0
• 0
• 0
• 0
• 0
• 0
• 0
• 0