Pradstaŭniki ZŠA i JeC abmiarkoŭvajuć z Ukrainaj mahčymaść pieramovaŭ z Rasijaj — NBC
Razmova ŭ tym liku išła pra toje, ad čaho Ukrainie pryjdziecca admovicca, kab dasiahnuć damoŭlenaściaŭ.
Čynoŭniki z ZŠA i Jeŭrasajuza pačali abmiarkoŭvać z Ukrainaj mahčymaść praviadzieńnia mirnych pieramovaŭ z Rasijaj, paviedamlaje NBC News sa spasyłkaj na nienazvanych amierykanskich čynoŭnikaŭ.
Pa źviestkach telekanała, u hetych abmierkavańniach ŭ pryvatnaści havorka išła pra toje, ad čaho Ukrainie, mahčyma, pryjdziecca admovicca, kab dasiahnuć damoŭlenaściaŭ.
Adno z takich abmierkavańniaŭ adbyłosia ŭ minułym miesiacy na pasiadžeńni kantaktnaj hrupy pa pytańniach abarony Ukrainy ŭ farmacie «Ramštajn».
Pa słovach krynic telekanała, hetyja dyskusii źjaŭlajucca adlustravańniem situacyi na froncie i palityčnaj situacyi ŭ Jeŭropie i ZŠA.
Abmierkavańni pačalisia na fonie aściaroh amierykanskich i jeŭrapiejskich čynoŭnikaŭ nakont taho, što vajna zajšła ŭ tupik, a patreba akazvać dapamohu Ukrainie zastajecca, zajavili čynoŭniki.
Jany kažuć, što va ŭradzie ZŠA zaniepakojenyja tym, nakolki mienš uvahi hramadskaści pryciahvaje vajna va Ukrainie z momantu pačatku kanfliktu pamiž Izrailem i CHAMAS. Čynoŭniki aścierahajucca, što takoje źmianieńnie moža ŭskładnić atrymańnie dadatkovaj dapamohi dla Ukrainy.
Čynoŭniki taksama zajaŭlali, što Ukraina, imavierna, budzie mieć čas da kanca hoda ci krychu bolš, pierš čym pačnucca bolš terminovyja dyskusii ab mirnych pieramovach. Amierykanskija čynoŭniki padzialilisia svaimi dumkami adnosna takich terminaŭ ź jeŭrapiejskimi sajuźnikami, adznačaje telekanał.
Jak skazali dvoje amierykanskich čynoŭnikaŭ, administracyja Bajdena nie maje nijakich prykmiet taho, što Uładzimir Pucin hatovy da pieramovaŭ z Ukrainaj.
Ź ich słoŭ, Pucin usio jašče miarkuje, što moža «pieračakać Zachad» abo praciahvać vajavać da taho času, pakul ZŠA i ich sajuźniki nie spyniać padtrymku Ukrainy ci pakul baraćba za pastaŭki Kijevu zbroi i bojeprypasaŭ nie stanie zanadta darahoj.
Što papiaredničała: u vieraśni kiraŭnik MZS Ukrainy Dźmitryj Kuleba zajaŭlaŭ, što Ukraina nie moža vieści mirnyja pieramovy z Pucinym, bo tamu nielha daviarać. Jon taksama skazaŭ, što raźviazanuju Rasijaj vajnu nielha spynić, sieŭšy za stoł pieramovaŭ, nahadvaje «Ukrainskaja praŭda».
«Patrebnyja novyja technałohii, kab prarvacca ŭ takoj vajnie». Załužny apublikavaŭ novy prahramny artykuł
Załužny: Vajna zajšła ŭ tupik. Jana moža zaciahnucca na hady i vymatać ukrainskuju dziaržavu
Čamu Ukraina nie zdoleła prarvacca da Azoŭskaha mora? I što heta značyć dla rehijona?
Zialenski: Mnie zdajecca, što my znachodzimsia ŭ apošniaj stadyi vajny, ale samaj składanaj
Padalak pra kontrnastup: My adstajem ad hrafika na šeść-dzieviać miesiacaŭ
«Samaje hałoŭnaje ciapier — zabiaśpiečvać subjektnaść Biełarusi». Franak Viačorka raskazaŭ, ci jość stratehija ŭ demsiłaŭ i na što ŭpłyvaje Cichanoŭskaja2323
Kamientary
Amataram nakidać dyzłajkaŭ: pačnicie hladzieć praŭdzie ŭ vočy, ćviaroza aceńvać situacyju i dumać svajoj hałovoj, a nie paŭtarać tezisy prapahadystaŭ. Adnyja harłapaniać, što jany Kijeŭ za try dni vozmuć, a jašče praz tydzień da Lvova dajduć, a inšyja, što na miežy 1991 hoda vyjduć. Spuściciesia na ziemlu.