Tehieran abvierhnuŭ infarmacyju, što zatrymany ŭ Tajłandzie samalot Ił‑76 vioz zbroju ŭ Iran

Pra heta zajaviŭ 22 śniežnia ahienctvu IRNA aficyjny pradstaŭnik MZS Irana Ramin Miechmanparast.

«Na žal, kožny raz, kali zachodnija krainy sprabujuć pazbavić nas našych pravoŭ na vykarystańnie mirnaj atamnaj enierhii i sprabujuć akazać bolšy nacisk na Iran, takija naviny raspaŭsiudžvajucca va ŭsim śviecie», — zaznačyŭ jon.

Pavodle słoŭ Miechmanparasta, iłžyvaja infarmacyja i niehatyŭnaja prapahanda zachodnich ŚMI nacelena na toje, kab akazać «psichałahičny i palityčny nacisk na Iran». «My poŭnaściu adchilajem hetyja paviedamleńni», — skazaŭ jon.

Jak raniej paviedamlałasia, samalot Ił‑76 (bartavy numar 4L‑AWA), zarehistravany ŭ Hruzii, amal z 40 tonami zbroi, u tym liku ručnymi hranatamiotami i pieranosnymi zienitna‑rakietnymi kompleksami, vyvaz jakich z KNDR zabaronieny rašeńniem Savieta biaśpieki AAN, byŭ zatrymany 11 śniežnia ŭ Banhkoku,

dzie pryziamliŭsia dla dazapraŭki. Zatrymany piać členaŭ ekipaža — čaćviora hramadzian Kazachstana i hramadzianin Biełarusi Michaił Pietuchoŭ 1955 hoda naradžeńnia, jaki pracavaŭ bortinžynieram.

14 śniežnia kryminalny sud Banhkoka pastanaviŭ uziać pad vartu ekipaž samalota i pradoŭžyŭ termin jaho zatrymańnia na 12 dzion. Ekipažu vystaŭlena abvinavačańnie ŭ nielehalnaj transparciroŭcy zbroi i davańni łžyvaj infarmacyi ŭładam Tajłanda ab charaktary hruzu. Pavodle tajskich zakonaŭ, lotčykam pahražaje pažyćciovy turemny termin. Aprača taho, im mohuć być vystaŭleny abvinavačańni ŭ nielehalnym zachoŭvańni vybuchovych rečyvaŭ, za što praduhledžvajecca pakarańnie ad dvuch hadoŭ pazbaŭleńnia voli da śmiarotnaj kary.

Členy ekipaža śćviardžajuć, što nie viedali pra charaktar hruzu. Pavodle ich słoŭ, jany pieravozili abstalavańnie dla bureńnia naftavych śvidravin.

Jak paviedamili ŭ pasolstvie Biełarusi ŭ Vjetnamie, na hety momant nijakaj novaj infarmacyi pra zatrymanaha biełaruskaha hramadzianina niama.

Hazieta The Wall Street Journal (ZŠA) sa spasyłkaj na dakład niezaležnych amierykanskich i bielhijskich ekśpiertaŭ, jakija atrymali mahčymaść vyvučyć palotnyja dakumienty, paviedamiła, što hruz zbroi płanavałasia dastavić u Iran.

Rasśledavańnie hetaj spravy moža praciahvacca niekalki miesiacaŭ abo bolš, paviedamiŭ RIA Novosti pradstaŭnik pravaachoŭnych orhanaŭ Tajłanda. «Hetaja sprava moža być vielmi doŭhaj. Zanadta zabłytanaja pakul karcina: samalot zarehistravany ŭ Hruzii, ale niadaŭna. U jaho kazachstanski haspadar. Frachtavała samalot ukrainskaja firma, jakaja źjaŭlajecca filijałam novaziełandskaj firmy, a z kim źviazana taja — pakul niezrazumieła. U supravadžalnych dakumientach na hruz, navat u avijanakładnoj, atrymalnik hruzu naohuł nie nazvany. Dazvoły na pralot terytoryj roznych krain u samalota byli na ŭvieś zvarotny šlach praz Šry‑Łanku i AAE da Ukrainy, i zbroja mahła być vyhružana ŭ lubym punkcie maršrutu», — paviedamiŭ na ŭmovach ananimnaści supracoŭnik tajskaha ŭpraŭleńnia pa baraćbie sa złačynnaściu, jaki niepasredna ŭdzielničaje ŭ rasśledavańni.

Jon taksama paviedamiŭ, što ŭ palotnym płanie samalota fihuruje adzin ź nievialikich aeraportaŭ u AAE, raźmieščany ŭ niepasrednaj blizkaści ad hruzavoha marskoha porta, na terytoryi svabodnaj ekanamičnaj zony. «Tyja ekśpierty, ź jakimi my paśpieli pakul źviazacca, havorać, što kali hruz pryznačaŭsia mienavita dla hetaha aeraporta, jon moh być adrazu ž pierahružany na hruzavoje sudna, i tady ślady jaho zhubilisia b kančatkova», — zaznačyła krynica.

Svajo rasśledavańnie pravodziać i ŭłady Novaj Ziełandyi. Jany praviarajuć infarmacyju ab datyčnaści da rejsa hetaha samalota kampanii SP Trading Ltd., jakaja zarehistravana na terytoryi Novaj Ziełandyi.

• 0
• 0
• 0
• 0
• 0
• 0
• 0
• 0