«Ubačyła ŭ Polščy Conte — šakavała cana». Biełarusy raskazali, što viazuć z Polščy, a što — nazad

Ź Biełarusi — «Bielitu», z Polščy — Nivea

Volha (imiony źmienienyja) žyvie ŭ Biełastoku i sama ŭ Biełaruś nie jeździć. Ale abmieńvajecca pieradačami z rodnymi. Žančyna žartuje, što heta ŭžo stała padobna da rytuału.

«Pieršy čas, kali ja tolki pryjechała ŭ Polšču, mnie składana było pierajści na polskija tavary. Ja zvykła da liniejki «Bielita-Viteks» — kremaŭ, tonikaŭ, pienki dla myćcia, šampuniaŭ, balzamaŭ dla vałasoŭ. I ŭ kožnym śpisie zakazaŭ pieršy čas prasiła pieradać mienavita hetuju pradukcyju», — raskazvaje Volha.

Z časam jana asvoiłasia ŭ Polščy i była hatovaja pierajści na miascovy asartymient, ale tak i nie zmahła admovicca ad zvykłych srodkaŭ.

«Navat ciapier, praz hady, u kožnaj pieradačy znachodžu niešta ad «Bielity». Kaštuje jana kapiejki, i navat kali brać bolš darahuju, luksavuju liniejku — usio roŭna vychodzić značna tańniej, čym kuplać jeŭrapiejskija brendy. A pa jakaści nikolki nie sastupaje. Maja siabroŭka ŭvohule žyvie ŭ Dubai, a kali pryjazdžaje ŭ Biełaruś, kuplaje cełyja čamadany hetaj kaśmietyki. Nie viedaju, što heta — tuha pa rodnych praduktach, zvyčka ci niešta jašče», — razvažaje Volha.

U Biełaruś žančyna tradycyjna pieradaje kaśmietyku Nivea. Tavary hetaha brenda trapili pad zabaronu impartu jašče ŭ 2021 hodzie, tamu ŭ zvyčajnych kramach ich nie znajści.

«Mama zaŭsiody kuplała krem u vialikim kruhłym sinim słoiku — mazała im i ruki, i tvar. Jon vielmi tłusty, i mamie padabałasia, jak jon uvilhatniaje skuru. Paśla taho jak heta kaśmietyka źnikła ŭ Biełarusi, ja ciapier zaŭsiody pieradaju jaje z Polščy: mamie — krem i dezadarant, hihijeničnyja pamady, tatu — pienku dla haleńnia, srodak paśla haleńnia. Uvohule, zaŭsiody źbirajecca taki vialiki pakiet «zabaronienaha». Na miažy nikoli pytańniaŭ nie ŭźnikała — dumaju, kali viazieš dla asabistaha karystańnia, prablem niama», — tłumačyć Volha.

Pierad kožnaj pajezdkaj u Biełaruś — zakazy na Wildberries

U Žany rastuć dźvie školnicy. U Polščy abaviazkovaj školnaj formy niama, ale žančyna kaža, što ŭsio roŭna imkniecca prytrymlivacca «bolš-mienš aficyjnaha stylu».

«Starejšaja dačka pieršyja try hady vučyłasia ŭ biełaruskaj škole, i jaje forma potym u spadčynu pierajšła małodšaj. Nie vykidać ža — tam i spadnički dobryja, i błuzki. A kali małodšaja chodzić u formie, to i starejšuju ŭžo chočacca apranać padobna. I, darečy, polskija nastaŭniki zaŭsiody adznačajuć, što dziaŭčynki prybranyja i pryhožyja chodziać», — tłumačyć Žana.

Pierad kožnaj pajezdkaj u Biełaruś jana robić zakazy na Wildberries — kaža, tak praściej papoŭnić harderob dačok kamplektami, da jakich jany ŭžo zvykli. Da taho ž tak biełaruska aščadžaje čas: nie prychodzicca jeździć pa kramach u pošukach patrebnaha tavaru.

«Da apošniaha času ŭsie tavary prychodzili svoječasova, niahledziačy na toje, što mnohija składy ŭ Rasii trapili pad abstreły bieśpiłotnikaŭ. Ciapier užo čytaju ŭ Threads, što ŭźnikajuć prablemy: tavary abo nie prychodziać, abo prychodziać z zatrymkami».

A voś maleńkamu plamieńniku, jaki žyvie ŭ Biełarusi, Žanna viazie adzieńnie z polskaj kramy.

«Dla małodšych u [kramach] Pepco vielmi šmat dobraha adzieńnia pa nizkich cenach. Tak što jamu biaru mienavita tam: bodzi, ślipy, paŭzunki. Siastra kaža, što kuplać takija rečy ŭ biełaruskim «Śvitanku» joj nie chočacca. Tłumačyć heta tym, što, na jaje hust, madeli tam niesimpatyčnyja, i rasfarboŭki nie vielmi, i ceny značna vyšejšyja — naprykład, kamplekt «kofta i paŭzunki» kaštuje 40 rubloŭ, a ŭ Pepco za takija hrošy možna kupić dva, a to i try kamplekty», — raskazvaje Žanna.

A voś kramy polskaha brenda Sinsay jość i ŭ Polščy, i ŭ Biełarusi.

«Ja zaŭvažyła, što mnohija rečy ŭ biełaruskim Sinsay tańniejšyja, čym u Polščy. Praŭda, kalekcyi roznyja, i ŭ Polščy vybar bolšy. Ale byvaje, što i ŭ biełaruski Sinsay zachodžu, kali treba kupić futbołak ci šorty dla domu», — pryznajecca Žana.

Ź Biełarusi viazuć Mark Formelle, z Polščy — Zara

Kali Naścia žyła ŭ Biełarusi, jana zaŭsiody čakała novyja liniejki Mark Formelle.

«Mnie padabałasia i jakaść trykatažu, i styl. Nu i prynty na futbołkach zaŭsiody byli prykolnyja», — uzhadvaje Naścia.

Ciapier kožnaja jaje pajezdka na radzimu supravadžajecca šopinham u firmovaj kramie.

«Apošnim časam biełarusy stali skardzicca na brend — maŭlaŭ, i bializna nižniaja ŭžo nie taja, i prynty nie takija śmiełyja, jak raniej. Ale mnie ŭsio adno vielmi padabajecca. Jak tolki zachodžu ŭ kramu, biaru i pižamy, i bazavyja futbołki, i škarpetki — nabiraju pa dva-try pakiety. Niešta pakidaju sabie, niešta daru polskim siabram. Im, darečy, taksama vielmi padabajecca. Asabliva kałhotki Conte. Ja ŭžo žyvu piać hadoŭ u Polščy i dahetul u mianie ŭ harderobie tolki hetyja kałhotki. Niejak na rynku ŭ Polščy ŭbačyła Conte — trochi šakavała cana: kaštavali jany niešta kala 25 złotych. U Biełarusi jany kaštujuć nie daražej za 10 rubloŭ (kala 12 złotych. — Zaŭv. Most). Nu, ja razumieju, što takaja cana — praz łahistyku, napeŭna», — raskazvaje Naścia.

Jaje rodnyja i siabry, jakija žyvuć u Biełarusi, zamaŭlajuć sabie jeŭrapiejskija brendy: Zara, H&M, Reserved. A jana zabiraje zakazy ŭ kramach i pryvozić.

«Čaściej zakuplajucca na rasprodažach, viadoma, byvajuć siezonnyja źnižki pa 50%. U Biełarusi takich źnižak amal niama, i vybar tam u kramach nie taki. Atrymlivajecca taki voś kruhavarot: ja viazu biełaruskija rečy siudy [u Polšču], a adsiul — jeŭrapiejskija. Dahetul nie mahu zrazumieć, jak heta pracuje. Dla mianie, napeŭna, heta zvyčka, ad jakoj ciažka admovicca navat paśla piaci hadoŭ žyćcia ŭ Polščy. Ty byccam užo zvyk da inšaj krainy, ale ŭsio roŭna chočacca kuplać toje, da čaho pryzvyčaiŭsia doma», — kaža Naścia.

• 2
• 0
• 0
• 3
• 0
• 1
• 0
• 0