«Piedahoh, fiłosaf, ščaślivaja maci i babula». Što za žančyny siadzieli pobač z Łukašenkam u prezidyumie BSŽ?
Alaksandr Łukašenka 5 sakavika pravioŭ sustreču z aktyvam Biełaruskaha sajuza žančyn. Jon byŭ adzinym mužčynam u prezidyumie pasiadžeńnia, vakoł Łukašenki było vaśmiora žančyn. «Radyjo Svaboda» raskazała, chto jany takija.
Prysutnyja na fotazdymku žančyny — kiraŭnica Biełaruskaha sajuza žančyn Volha Špileŭskaja, a taksama kiraŭnicy ŭsich abłasnych arhanizacyj BSŽ i Minskaj haradskoj. Dziejnaść u BSŽ ličycca hramadskaj, tamu ŭsie hetyja žančyny majuć i asnoŭnuju pracu.
Ličyć, što za žančynami ŭ palitycy stajać mužčyny
Volha Špileŭskaja (siadzieła źleva ad Łukašenki) siońnia kiruje biełaruskim filijałam MTRK «Mir». Joj 47 hadoŭ. Špileŭskaja — vypusknica fakulteta žurnalistyki BDU. Pracavała ŭ Biełteleradyjokampanii.
Była redaktarkaj u dziaržaŭnych hazietach «Viečiernij Minsk» i «Minskaja praŭda». U 2016 hodzie stała kiraŭnicaj hałoŭnaha ideałahičnaha ŭpraŭleńnia administracyi Łukašenki.
U traŭni 2021 hodu Špileŭskaja ŭznačaliła biełaruskaje pradstaŭnictva telekampanii «Mir», a jašče praz hod stała kiraŭnicaj Biełaruskaha sajuza žančyn. Da hetaha BSŽ uznačalvała lekarka, namieśnica ministra achovy zdaroŭja Alena Bohdan.
U kastryčniku 2022 hodu kiraŭnica BSŽ u efiry «Biełaruś-1» zajaviła: «Da žančyn u palitycy ja staŭlusia aściarožna. Žančyny byvajuć roznymi, i roznymi žančynami kirujuć roznyja mužčyny. I roznyja mužčyny admysłova pryvodziać žančyn u palityku, kab vyrašać svaje mužčynskija intaresy».
Taksama Špileŭskaja časta vystupaje ŭ prapahandysckich pieradačach, takich jak «Kłub redaktaraŭ».
«Pakul Zachad napampoŭvaje Ukrainu dakładnaj zbrojaj, ź jakoj zabivajuć mirnych hramadzian, Rasija adpraŭlaje kambajny, kab sabrać chleb va Uschodniaj Ukrainie», — kazała Špileŭskaja na BT.
Taksama jana raskazvała pra toje, što litoŭskija siemji stali masava pierajazdžać u Biełaruś praz «tradycyjnyja siamiejnyja kaštoŭnaści i narmalnuju aryjentacyju».
U 2020 hodzie nie było sumnievaŭ
Minskaj haradskoj arhanizacyjaj kiruje 46-hadovaja Volha Čamadanava (krajniaja sprava). Viadomaść jana atrymała jak pres-sakratarka Ministerstva ŭnutranych spraŭ, a ad 2021 hoda — načalnica ŭpraŭleńnia ideałohii i spraŭ moładzi Minharvykankama.
Čamadanava naradziłasia ŭ Astrašyckim haradku pad Minskam. Skončyła fiłfak BDU pa śpiecyjalnaści «biełaruskaja mova i litaratura». Adrazu paśla VNU pajšła pracavać u milicyju, dzie paznajomiłasia z budučym mužam — Dzianisam Čamadanavym, ciapier jon namieśnik načalnika HUBAZiK.
Čamadanava była pieramožcaj konkursu «Samy vietlivy i kulturny supracoŭnik orhanaŭ». Paśla hetaha jaje i zaprasili na pasadu pres-sakratarki MUS.
U 2020 hodzie Čamadanava apraŭdvałasia za zatrymańni pratestoŭcaŭ. Žychara Minska Dźmitryja Ušackaha ŭ 2021 hodzie asudzili na 2 hady «chatniaj chimii» za jaje abrazu. Sama pres-sakratarka kazała, što paśla hetych padziej prymała zaspakajalnyja. Potym jašče adzin minčuk Viktar Lebiedzieŭ atrymaŭ paŭtara hoda «chatniaj chimii» za abrazu Čamadanavaj.
«U mianie nie było sumnievaŭ u pravilnaści taho, što ja rablu. Vydatna razumieła, za kaho i što ja zmahajusia», — kazała Čamadanava pra padziei 2020 hoda.
«Ščaślivaja žančyna, maci i babula»
Krajniaja źleva — kiraŭnica Bresckaj abłasnoj arhanizacyi BSŽ Valancina Puch. Jana dyrektarka bresckaha filijała «Biełpošty», ale vielmi chutka pakinie hetuju pasadu. Reč u tym, što ŭ lutym 2024 hoda Puch stała deputatkaj Pałaty pradstaŭnikoŭ pa Bresckaj-Zachodniaj akruzie № 1.
U listapadzie 2021 hoda Valancina Puch zajaŭlała pra mihrancki kryzis: «My sabrali bolš za 10 tysiač podpisaŭ i adpravili ŭsioj suśvietnaj supolnaści list z prośbaj vyrašyć hetuju situacyju i z zaklikam usim palityčnym lidaram nie dapuścić hetaha varjactva». Jak prykład kiraŭnika-žančyny jana nazyvaje Natallu Kačanavu.
Druhaja źleva — namieśnica kiraŭnika administracyi Kastryčnickaha rajona Mahilova Hanna Hałuška. Na svajoj pasadzie jana kiruje pytańniami ideałohii, pracy z nasielnictvam, moładzi, pravoŭ hramadzian.
Da hetaha Hałuška siem hadoŭ zajmała vyšejšuju pasadu — namieśnica kiraŭnika Mahiloŭskaha harvykankama, taksama adkazvała za ideałohiju. Jaje adstaŭki dabivalisia mahiloŭskija apazicyjaniery, mienavita Hałuška staviła podpisy pad zabaronaj tych ci inšych mierapryjemstvaŭ apazicyi. Da pracy ŭ orhanach ułady pracavała nastaŭnicaj rasiejskaj movy i litaratury.
Treciaja źleva — kiraŭnica Hrodzienskaj abłasnoj arhanizacyi BSŽ Iryna Ściepanienka. Jana pracuje taksama ŭ ideałohii — namieśnicaj načalnika hałoŭnaha ŭpraŭleńnia ideałahičnaj raboty i pa spravach moładzi Hrodzienskaha abłvykankama.
«Piedahoh, fiłosaf, dziaržsłužačy, ščaślivaja žančyna, maci i babula», — tak pisała pra Ściepanienku hazieta «Biełaruś siehodnia». «Našy žančyny adnymi ź pieršych reahujuć na ŭsie vykliki sučasnaści, niachaj heta budzie situacyja z uciekačami na miažy abo zbor humanitarnaj dapamohi dla paciarpiełych ad ziemlatrusu ŭ Turcyi i Siryi. Nam pad siłu ŭsio: ad stvareńnia dabračynnaha fondu ŭ pieryjad pandemii da ruchu suprać ekanamičnych sankcyj», — kazała sama Ściepanienka.
«Pavinny być pamahatymi Łukašenki»
Sprava ad Łukašenki — Maryna Navickaja. Jana pracuje hałoŭnym ideołaham Viciebskaj vobłaści. Joj 51 hod. Vučyłasia na piedahoha ŭ Viciebsku. Pracavała nastaŭnicaj u škole № 12 tam ža, potym pierajšła na čynoŭnickuju pracu.
«Siła našaj krainy ŭ adzinstvie», — kazała Navickaja ŭ vieraśni 2023 hoda.
Treciaja sprava — Tamara Krasoŭskaja. Jana ŭznačalvaje ŭpraŭleńnie pa pracy, zaniataści i sacyjalnaj abaronie Minskaha abłvykankama. Da hetaha jana była deputatkaj Pałaty pradstaŭnikoŭ. Uradženka Barysaŭskaha rajona, pa adukacyi — juryst.
«My vierym, što ŭsie žančyny ŭ śviecie žadajuć tolki miru, tamu što žančyna — maci, žančyna — achoŭnica siamiejnaha ačaha. I kali nie žančyny, to chto budzie zmahacca za mir? My pavinny być pamahatymi Łukašenki», — kazała Krasoŭskaja ŭ 2023 hodzie.
Urešcie, druhaja sprava — kiraŭnica spraŭ Homielskaha abłvykankama Alena Kličkoŭskaja. Jana ŭradženka Kalinkavickaha rajona. Maje piedahahičnuju adukacyju, pracavała vychavacielkaj u dziciačym sadku, nastaŭnicaj fiziki. Z 2005 hoda — na pracy ŭ Kalinkavickim rajvykankamie. Z 2013 hoda — u Homielskim abłvykankamie.
Kličkoŭskaja ŭdzielničała ŭ pryjomie ŭ Biełarusi dziaciej, jakich vyvozili z akupavanaha Rasijaj Danbasa.
Łukašenka znoŭ zajaviŭ, što «najeŭsia pracaj», i patłumačyŭ, čamu jahonyja słovy na vybarčym učastku byli pustyja
Łukašenka zahadaŭ pierahledzieć režym pracy dziciačych sadkoŭ
Łukašenka zaklikaŭ praŭładny Biełaruski sajuz žančyn stać ścianoj na šlachu «čajłdfry i inšych vyčvarenstvaŭ»
«Adpracujcie 40 hadoŭ kiraŭnikom, i ŭ vas atrymajecca». Eks-sienatarka raskazała, jak možna zarabić na dom za $1,5 miljona
Žančyna pieradpiensijnaha ŭzrostu, jakaja pracuje nastaŭnicaj. Skłali partret naziralnika na sioletnich vybarach
Kamientary