«Adpracujcie 40 hadoŭ kiraŭnikom, i ŭ vas atrymajecca». Eks-sienatarka raskazała, jak možna zarabić na dom za $1,5 miljona
U mikrarajonie Lebiadziny ŭ Minsku jość nievialiki zavułak Kniahininski, zabudavany pryvatnymi damami. U samym jaho pačatku znachodzicca dom № 3, jaki ciapier vystaŭleny na prodaž. Košt nieruchomaści ŭražvaje — bolš za 1,5 młn dalaraŭ. Z dapamohaj «Kibierpartyzan» i Belpol «Lusterka» daviedałasia, što vałodaje majomaściu 63-hadovaja Natalla Błachina, dyrektarka Słuckaha ŭniviermaha i byłaja pryznačenka ŭ Saviet Respubliki.
Čatyrochuzroŭnievy cahlany katedž z čarapičnym dacham zajmaje ahulnuju płošču bolš za 600 «kvadrataŭ», jon staić na ŭčastku bolš za vosiem sotak (ziamla znachodzicca ŭ pryvatnaj ułasnaści).
Dom «dla VIP» byŭ pabudavany ŭ 2015 hodzie. Usie kamunikacyi ŭ im centralizavanyja. U domie jość siem žyłych pakojaŭ, čatyry sanvuzły, kuchnia, terasa, vieranda, dźvie harderobnyja, bałkon, hulniavy pakoj, biljardnaja, trenažornaja zała, dapamožnaje pamiaškańnie, dźvie kładoŭki, kacielnia, sauna, haraž.
Ścieny ŭnutry doma pafarbavanyja, a taksama abklejenyja italjanskimi špalerami. Vyšynia stolaŭ — ad 3 da 3,5 mietra ŭ zaležnaści ad paviercha, na ich dekaratyŭnaja lapnina. U miescach, dzie vykładzieny kieramahranit, abstalavanaja ciopłaja padłoha. Va ŭsich žyłych pakojach vykładzieny parkiet z masivu duba Coswick. Mižpakajovyja dźviery zroblenyja z sucelnaha masiva dreva. Usie aśviatlalnyja prybory ŭ domie vykananyja pa indyvidualnaj zamovie.
Uvachod u dom raźmieščany na pieršym paviersie, adrazu adsiul traplaješ u piaredni pakoj, dzie abstalavany piacimietrovy harderobny pakoj. Na vierchnija i nižni pavierchi viadzie leśvica z naturalnaha marmuru, z kavanymi parenčami.
Vialikaja haścioŭnia abjadnanaja z kuchniaj, dzie jość italjanski kuchonny harnitur sa stalnicaj i myjkaj z naturalnaha kamieniu. Tut taksama jość ubudavanaja technika: posudamyjnaja mašyna Bosch, indukcyjnaja varačnaja pavierchnia Weissgauff, duchavaja šafa, mikrachvaloŭka i vyciažka firmy Teka, chaładzilnik Liebherr. U haścioŭni jość i kamin z ekskluziŭnaha marmuru.
Z kuchni idzie vychad na abahravanuju zašklonuju vierandu ź zimovym sadam z naturalnym aśviatleńniem. Z haścioŭni jość vychad na terasu. Haścioŭnia i kuchnia — z panaramnym škleńniem. U pracoŭnym kabiniecie ŭsia mebla vyrablenaja z masivu dreva. Kanapa — z naturalnaj skury.
Taksama na pieršym paviersie jość sanvuzieł, praź jaki možna trapić u dapamožnaje pamiaškańnie (u im ustanoŭlenyja dźvie pralnyja mašyny Bosch, a taksama jość kładoŭka z tryma chaładzilnikami i šafaj).
Na druhim paviersie znachodziacca čatyry žyłyja pakoi: haspadarskaja spalnia z bałkonam i try dziciačyja spalnyja pakoi. Taksama jość niekalki sanvuzłoŭ i harderobny pakoj.
U haspadarskaj spalni — italjanskaja mebla, a taksama štory i špalery. U vannym pakoi — elitnaja santechnika, italjanskaja plitka Versace.
U mansardzie arhanizavany hulniavy pakoj, a voś unizie — miesca dla praviadzieńnia volnaha času darosłymi: abstalavanaja trenažornaja zała, pakoj adpačynku ź biljardnym i tenisnym stałami, spa-zona z elektryčnaj saunaj i džakuzi.
Na nulavym paviersie taksama znachodzicca kacielnia z hazavym katłom Vaillant (Hiermanija), bojler na 300 litraŭ vady, raźmierkavalny elektraščyt i indyvidualnyja prybory ŭliku.
Adpačyć možna i na zakrytym ad starońnich vačej učastku kala doma, jaki abstalavany videakamierami i sihnalizacyjaj. Tut jość dobry hazon, vysadžanyja tui, pabudavanaja altanka i zona dla barbiekiu.
Dom pradajuć za 5 023 395 rubloŭ, ci 1 550 000 dalaraŭ.
Što viadoma pra ŭłaśnicu žylla i jaje muža
Dziakujučy «Kibierpartyzanam» i Belpol, «Lusterku» atrymałasia vyśvietlić, što vałodaje darahoj nieruchomaściu 63-hadovaja Natalla Błachina sa Słucka. Dom byŭ aformleny na jaje imia praz damovu kupli-prodažu ŭ lutym 2013 hoda.
Sama žančyna zarehistravanaja ŭ Słucku, tam jana taksama maje dom. Jana daŭno pracuje ŭ Słucku dyrektaram dziaržaŭnaha ŭniviermaha. Padatkovych daŭhoŭ za im nie ličycca, ale krama litaralna nie vyłazić z ekanamičnych sudoŭ jak daŭžnik pa sotniach spraŭ pierad kampanijami-vytvorcami.
Akazałasia, što Natalla Błachina davoli aktyŭnaja ŭ palitycy: jana člen Biełaruskaha sajuza žančyn, a taksama dvojčy pryznačałasia ŭ Saviet Respubliki (u apošni raz jana była ŭ hetaj struktury ŭ 2004-2008 hadach).
Jak paviedamlajecca, Natalla Błachina raniej atrymlivała ŭznaharodu ad Saŭmina, taksama jana maje znaki «Vydatnik handlu» i zvańnie «Čałaviek hoda Minščyny».
Muž Natalli — Barys Błachin, byŭ deputatam Minskaha abłasnoha savieta deputataŭ. Ciapier jon pracuje dyrektaram Słuckaha dziaržaŭnaha kaledža.
Karespandent «Lusterka» jak fizasoba patelefanavaŭ abodvum sužoncam Błachinym i zapytaŭsia ŭ ich, jakim čynam možna zarabić hrošy na takuju nieruchomaść.
Spačatku Natalla Błachina ździviłasia pytańniu pra katedž u Lebiadzinym i paviedamiła, što «nichto nijaki dom nie pradaje». Praŭda, kali joj paviedamili, što pra vałodańnie hetaj nieruchomaściu mienavita joj užo viadoma, rytoryka žančyny źmianiłasia.
«Nu i što, chto jaho pradaje, kali ja jaho nie pradaju? Nie, nichto jaho nie pradaje. Chto jaho moh vystavić [pradavać]? Ja jaho nie pradaju», — adkazała jana.
Na pytańnie, dzie možna zarabić hrošaj na taki dom, žančyna paviedamiła nastupnaje:
«Vy adpracujcie 40 hadoŭ kiraŭnikom na ziamli, chaj adpracujuć vašy baćki taksama pa 40 hadoŭ. A naohuł ahulny staž u maich baćkoŭ i majho muža — 160 hadoŭ. Papracujcie, i ja dumaju, u vas usio atrymajecca».
Padobnaje pytańnie zadali i mužu Natalli, Barysu Błachinu:
— Treba iści ŭ deputaty, kab zarabić hrošaj i kupić dobraje žyllo, jak dom za 1,5 młn dalaraŭ u Lebiadzinym, jaki vy ciapier pradajecie? U adukacyi, napeŭna, nie zarobiš ža?
— Adna sprava pradać, a inšaja sprava — pabudavać, — adkazaŭ mužčyna, paśla čaho spasłaŭsia na zaniataść i paprasiŭ pieratelefanavać paźniej.
Prapahandysty zajavili pra razhrom sietki salidarnaści i aryšt jaje ŭdzielnikaŭ10
Kamientary