Chusity «dapamahli» Biełarusi i Rasii z tranzitam hruzaŭ u Jeŭropu
Vydańnie Financial Times paviedamlaje, što z-za rehularnych atak jemienskich chusitaŭ na handlovyja sudny ŭ Čyrvonym mory «rezka ŭzros» popyt na čyhunačny tranzit hruzaŭ u Jeŭropu praz Rasiju, Kazachstan i Biełaruś. Praz apošniuju za miesiac stała prajazdžać bolš za 10 tysiač kitajskich kantejnieraŭ.
Akramia vyšej zhadanych krain, taksama zadziejničanyja Azierbajdžan i Turcyja.
«Jak adznačajuć jeŭrapiejskija kampanii DHL, RailGate Europe, Rail Bridge Cargo i Kuehne & Nagel, popyt na čyhunačny tranzit praz Rasiju i Biełaruś za apošnija miesiacy ŭzros na 25-40 pracentaŭ.
Tolki za hety studzień z Kitaja ŭ Polšču prajšło amal 15 tysiač kantejnieraŭ abjomam da 30 ton kožny. Taki šlach ciapier doŭžycca ad 25 da 30 dzion», — piša Financial Times.
Pry hetym kampanii padkreślili, što takaja kolkaść kantejnieraŭ u miesiac usio roŭna nie moža paraŭnacca z hruzapadjomnaściu sučasnych kantejnieravozaŭ, kožny ź jakich moža pieravozić pa 24 tysiač takich kantejnieraŭ za raz.
Taksama apieratary dadali, što vykonvajuć sankcyjnaje zakanadaŭstva Jeŭrasajuza ŭ dačynieńni da biełaruskaj i rasijskaj pradukcyi. Niekalki ź ich zajavili, što praktyčna nie karystajucca maršrutam praz Rasiju i Biełaruś paśla pačatku vajny va Ukrainie.
«Adnak sam tranzit zabaranić nielha, bo kantejniery z hruzam iduć nie ź Biełarusi i Rasii, a z trecich krain. Tamu tranzitnyja krainy majuć mahčymaść źbirać pošliny za transparciroŭku tavaraŭ pa svajoj terytoryi i za karystańnie svaimi čyhunačnymi šlachami», — reziumuje Financial Times.
Kamientary
Za miesiac - połovina odnoho kontiejnierovoza.