Čały sprahnazavaŭ, što budzie ŭ krainie, kali Łukašenki nie stanie, i da čaho rychtavacca biełarusam
«My budziem nazirać pierajhrańnie padziej chałodnaha leta 1953-ha».
U novym vypusku tok-šou «Noč z Čałym» viadomy ekanamist adkazaŭ na pytańnie, jak buduć raźvivacca padziei ŭ Biełarusi paśla taho, jak nie stanie Łukašenki.
«My budziem nazirać pierajhrańnie padziej chałodnaha leta 1953 hoda. U tym liku tamu, što łukašyzm — heta poźni stalinizm»,
— ličyć Čały.
«Dynamika razvału i pieraŭtvareńnia sistemy prykładna budzie padobnaja. Budzie ŭmoŭny raskoł pamiž umoŭnym Bieryjaj (siłavikami) i ŭmoŭnym Chruščovym-Malankovym (hramadzianskimi). I ŭsia zadača budzie zaklučacca ŭ tym, chto kaho pieramoža, chto kaho chutčej aryštuje jak zdradnika, voraha ci jašče kaho».
Analityk razvažaje, što nie ŭ našych intaresach pieramoha ŭmoŭnaj partyi siłavikoŭ. Heta budzie aznačać, što hradus nasilla vyraście — navat u paraŭnańni ź ciapierašnim uzroŭniem.
«A hramadzianskaja hrupoŭka chutčej za ŭsio budzie vymušana va ŭnutranym supraćstajańni źviartacca da enierhii ludziej, vulicy.
Heta jakraz toj momant, u jakim ad nas budzie vielmi šmat što zaležyć. Heta nie budzie taja revalucyja, jakuju my čakajem, a transfarmacyja ŭłady, jakaja skončycca tak, jak i paśla Stalina — projdzie ŭmoŭny XX źjezd partyi, dzie ŭsio drennaje budzie patłumačana tolki Łukašenkam. «Heta byŭ kult asoby». I navat tyja, chto ŭ hetym braŭ udzieł, skažuć: my mučylisia, ciarpieli i hetak dalej».
Čały zaŭvažaje, što apisany im scenar, mahčyma, nie toje, čaho my ŭsie čakajem. Ale ŭ lubym vypadku heta budzie ruch u lepšy bok.
«Ja amal upeŭnieny, što hołas vialikaj kolkaści arhanizavanych hramadzian Biełarusi, nie zaviazanych niejkim čynam na struktury kiravańnia, budzie važnym. I heta budzie toj momant, kali metanakiravanaje ŭździejańnie, navat nievialikaje, budzie mieć vialikaje značeńnie dla vyznačeńnia histaryčnaha šlachu krainy dalej», —
havoryć Čały i raić biełarusam być hatovymi da masavaha, arhanizavanaha dziejańnia tady, kali ad nas budzie šmat što zaležać.
Stała viadoma, chto žanich byłoj deputatki Maryi Vasilevič26
Kamientary