Kryminalnuju spravu ŭ dačynieńni da byłoha dyrektara departamienta finansavych rasśledavańniaŭ KDK Anatola Hramoviča pa pieršaj instancyi budzie razhladać Biełaruski vajskovy sud. Materyjały spravy tudy pieradadzieny ź Viarchoŭnaha suda. Data pačatku sudovaha pracesu pakul nie vyznačana.
Anatol Hramovič byŭ zatrymany 15 studzienia 2009 hoda. Jon padazravaŭsia ŭ atrymańni chabaraŭ, uchileńni ad vypłaty mytnych płaciažoŭ. Hienprakuratura pradjaviła jamu abvinavačańnie va ŭčynieńni złačynstva, praduhledžanaha č. 3 art. 285 Kryminalnaha kodeksa (udzieł u złačynnaj arhanizacyi słužbovaj asoby z vykarystańniem słužbovych paŭnamoctvaŭ).
Jak paviedamiŭ na pres‑kanfierencyi 6 sakavika 2009 hoda načalnik upraŭleńnia pa baraćbie z karupcyjaj i arhanizavanaj złačynnaściu Hienprakuratury Alaksandr Rakievič, «dosyć vysokapastaŭlenyja supracoŭniki pravaachoŭnych orhanaŭ» pryciahvajucca da kryminalnaj adkaznaści pa spravie ab niezakonnym ŭvozie ŭ Biełaruś bujnych partyj darahich tavaraŭ pa padroblenych tavarna‑supravadžalnych dakumientach.
Hienprakuraturaj ustanoŭlena, što ŭ 2000 hodzie na terytoryi krainy niekalki hramadzian Rasii i Biełarusi stvaryli złačynnuju arhanizacyju.
Jany zajmalisia niezakonnym pieramiaščeńniem z krain Zachodniaj Jeŭropy ŭ Rasiju praz punkt mytnaha afarmleńnia «Kazłovičy» bytavoj techniki, adzieńnia, abutku biez vypłaty ŭ poŭnym abjomie mytnych płaciažoŭ.
U vyniku złačynnaj dziejnaści dziaržavie byŭ naniesieny ŭron nie mienš jak na 20 młrd. rubloŭ. «Dla akazańnia sadziejničańnia ŭ raspracoŭcy i realizacyi mier pa bieśpieraškodnym pieramiaščeńni hruzaŭ pa padroblenych dakumientach kiraŭniki złačynnaj arhanizacyi ŭciahnuli ŭ jaje dziejnaść šerah supracoŭnikaŭ KDB i mytnych orhanaŭ, — skazaŭ Rakievič. — Za chabar jany akazvali ŭdzielnikam złačynnaj arhanizacyi sadziejničańnie ŭ supraćpraŭnym promyśle. Davali ŭkazańni padnačalenym supracoŭnikam ab niezatrymańni aŭtatranspartnych srodkaŭ i tavaraŭ, što niezakonna pieramiaščalisia. Procidziejničali praviadzieńniu apieratyŭna‑vyšukovych mierapryjemstvaŭ u dačynieńni da kiraŭnikoŭ i ŭdzielnikaŭ złačynnaj arhanizacyi, kansultavali ich».
Charakterna, što ŭ kastryčniku 2002 hoda pad asabistym kantrolem dyrektara DFR KDK Anatola Hramoviča pravodziłasia pravierka pracy Bresckaj mytni, pa vynikach jakoj byŭ raspačaty šerah kryminalnych spraŭ u dačynieńni da niekatorych jaje kiraŭnikoŭ.
Kamientary