Datčanin, jaki ŭciok u Rasiju ad «zachodnich kaštoŭnaściaŭ» i apynuŭsia na froncie, zmoh vyrvacca ad Minabarony RF
Nikłas Chofhar pajšoŭ u vojska, kab padoŭžyć termin znachodžańnia ŭ Rasii. Jon śćviardžaje, što jaho abiacali nie adpraŭlać na vajnu.
![](http://nashaniva.com/img/w840d4webp1/photos/z_2024_07/1-4971q.jpg.webp)
Hramadzianin Danii Nikłas Chofhar zmoh skasavać kantrakt z rasijskim Minabarony. Rašeńnie ab pryznańni pahadnieńnia niezakonnym pryniaŭ 2-hi Zachodni akruhovy vajskovy sud.
Pazicyja datčanina zaklučałasia ŭ tym, što pry zaklučeńni kantrakta jon nie zmoh zrazumieć jaho sutnaści, bo nie vałodaje rasijskaj movaj, piša «Miedyjazona».
33-hadovy Chofhar, jaki na radzimie viadomy jak repier Stanley Most, pryjechaŭ u Rasiju ŭletku 2023 hoda.
Pa słovach advakata, datčanin simpatyzavaŭ Uładzimiru Pucinu i vyrašyŭ takim čynam «uciačy ad zachodnich kaštoŭnaściaŭ».
Chofhar atrymaŭ vid na žycharstva, ale z pradaŭžeńniem dakumienta ŭźnikli prablemy. Tady jon vyrašyŭ pajści ŭ vojska, kab atrymać rasijskaje hramadzianstva. Repier chacieŭ słužyć pamiežnikam u Sibiry.
U studzieni 2024 hoda DNŽ datčaninu praciahnuli, ale da taho momantu jaho adpravili na front va Ukrainie. Jaho vyznačyli ŭ padraździaleńnie, jakoje zajmajecca bieśpiłotnikami i dronami na akupavanaj Łuhanskaj vobłaści.
Słužyć Nikłasu nie padabałasia — asabliva z-za susiedziaŭ z Paŭdniovaj Azii, ź jakimi jaho pasialili ŭ adzin blindaž. Jon skardziŭsia, što jany časta plujuć na padłohu, što achajnamu datčaninu nie padabajecca. Akramia taho, datčanin byŭ niezadavoleny tym, što jaho časta prymušali pić harełku.
Nikłas vyrašyŭ patrabavać skasavańnia kantraktu praz sud. Pieršaja instancyja zaniała bok Minabarony, druhaja admianiła hetaje rašeńnie.
Stanley Most atrymaŭ peŭnuju papularnaść u Danii, kali jamu było 20 hadoŭ. U 2018 hodzie jon abjaviŭ ab zaviaršeńni muzyčnaj karjery.
Kamientary