Датчанін, які ўцёк у Расію ад «заходніх каштоўнасцяў» і апынуўся на фронце, змог вырвацца ад Мінабароны РФ
Ніклас Хофгар пайшоў у войска, каб падоўжыць тэрмін знаходжання ў Расіі. Ён сцвярджае, што яго абяцалі не адпраўляць на вайну.
Грамадзянін Даніі Ніклас Хофгар змог скасаваць кантракт з расійскім Мінабароны. Рашэнне аб прызнанні пагаднення незаконным прыняў 2-гі Заходні акруговы вайсковы суд.
Пазіцыя датчаніна заключалася ў тым, што пры заключэнні кантракта ён не змог зразумець яго сутнасці, бо не валодае расійскай мовай, піша «Медыязона».
33-гадовы Хофгар, які на радзіме вядомы як рэпер Stanley Most, прыехаў у Расію ўлетку 2023 года.
Па словах адваката, датчанін сімпатызаваў Уладзіміру Пуціну і вырашыў такім чынам «уцячы ад заходніх каштоўнасцяў».
Хофгар атрымаў від на жыхарства, але з прадаўжэннем дакумента ўзніклі праблемы. Тады ён вырашыў пайсці ў войска, каб атрымаць расійскае грамадзянства. Рэпер хацеў служыць памежнікам у Сібіры.
У студзені 2024 года ДНЖ датчаніну працягнулі, але да таго моманту яго адправілі на фронт ва Украіне. Яго вызначылі ў падраздзяленне, якое займаецца беспілотнікамі і дронамі на акупаванай Луганскай вобласці.
Служыць Нікласу не падабалася — асабліва з-за суседзяў з Паўднёвай Азіі, з якімі яго пасялілі ў адзін бліндаж. Ён скардзіўся, што яны часта плююць на падлогу, што ахайнаму датчаніну не падабаецца. Акрамя таго, датчанін быў незадаволены тым, што яго часта прымушалі піць гарэлку.
Ніклас вырашыў патрабаваць скасавання кантракту праз суд. Першая інстанцыя заняла бок Мінабароны, другая адмяніла гэтае рашэнне.
Stanley Most атрымаў пэўную папулярнасць у Даніі, калі яму было 20 гадоў. У 2018 годзе ён аб'явіў аб завяршэнні музычнай кар'еры.
Каментары