«Naša Niva» niadaŭna pisała pra dziŭny trend na ahurki ŭ tyktoku: videa z tym, jak ich režuć u roznyja sałaty, nabirajuć miljony prahladaŭ. Moda na ahurkovyja sałaty pačałasia z Łohana Mofita, 23-hadovaha kanadca.
U Isłandyi heta pavalnaje zachapleńnie pryviało da realnaj prablemy: deficytu ahurkoŭ pa ŭsioj krainie, piša The New York Times.
Miascovy žychar raskazvaje, jak chacieŭ pryhatavać sałatu z ahurkoŭ, ale nie znajšoŭ ich u niekalkich kramach. Heta jaho ździviła. «Heta adna z tych rečaŭ, jakija ŭ nas u Isłandyi nikoli nie skančajucca».
Adna z najbujniejšych praduktovych sietak Isłandyi Kronan paviedamiła, što ahurki raspradadzienyja ŭ kramach pa ŭsioj Isłandyi. Prodažy vyraśli tak chutka, što ŭ kramy nie było času padrychtavacca.
Isłandyja hanarycca svajoj samadastatkovaj sielskaj haspadarkaj: bolšaja častka jaje asnoŭnych praduktaŭ vyroščvajecca ŭ ciaplicach, jakija pracujuć na hieatermalnaj enierhii. Ale heta vostraŭ. Kali ŭźniknie deficyt, impart dla papaŭnieńnia deficytu moža abyścisia našmat daražej, čym u inšych krainach Jeŭropy.
Fiermiery vyroščvajuć ahurki cyklična, i heta zachapleńnie sałataj uźnikła padčas nievialikaha spadu ŭradžajnaści. A taksama ŭ toj čas, kali adkryvajucca škoły, što aznačaje, što ich kuchni raźmiaščajuć masavyja zakazy.
U jakaści dokazu taho, što internet-ažyjataž staŭ pryčynaj deficytu, isłandcy pakazvajuć na rezki rost prodažaŭ inšych inhredyjentaŭ dla našumiełaj sałaty: u Kronan prodažy inhredyjentaŭ, jakija vykarystoŭvajucca ŭ adnym z samych papularnych receptaŭ (kunžutny alej, rysavy vocat i rybny sous), vyraśli na 200% sa žniŭnia.
Cikava, što ŭ Isłandyi leta časam nazyvajuć «hurkucid», što prykładna pierakładajecca jak «čas ahurkoŭ».
Heta pavalnaje zachapleńnie — usiaho tolki apošni prykład taho, jak sacyjalnyja sietki parušajuć łancužki pastavak praduktaŭ charčavańnia.
Naprykład, u 2021 hodzie z-za papularnaści ŭ TikTok stravy z zapiečanaj fietaj i pastaj syr źnik z palic niekalkich amierykanskich praduktovych kram.
Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj34
Kamientary