Zahinuŭ 27-hadovy inśpiektar mahiloŭskaj DAI — lacieŭ na matacykle, ale kiroŭca na busie nie prapuściŭ jaho
Internaŭty padzialilisia ŭ mierkavańni, chto bolš vinavaty ŭ trahiedyi.
7 vieraśnia na skryžavańni vulic Łazarenki i Burdenki ŭ Mahilovie adbyłasia śmiarotnaja avaryja. 44-hadovy kiroŭca busa Ford pavaročvaŭ naleva i nie sastupiŭ darohu matacyklistu na Yamaha. U vyniku sutyknieńnia bajkier zahinuŭ na miescy zdareńnia.
Kiroŭca busa źjechaŭ, ale jaho chutka znajšli. Na momant zatrymańnia jon byŭ pjany. Jon patłumačyŭ, što ŭžyŭ ałkahol užo paśla avaryi, heta viersija ciapier praviarajecca.
Zahinuły bajkier — 27-hadovy inśpiektar mahiloŭskaj abłasnoj DAI Mikita Alaksandravič Isačkoŭ. Pra jaho śmierć biez paznačeńnia abstavinaŭ napisała milicejskaja hazieta «Na stražie».
Čytajcie: Zahinuŭ inśpiektar mahiloŭskaj abłasnoj DAI. Jamu było 27 hadoŭ
«Lusterka» znajšło ŭ adnoj z supołkach «Ukantakcie» paćviardžeńnie taho, što ŭ avaryi zahinuŭ mienavita jon. Karystalnik Alaksandr Isačkoŭ napisaŭ, što zahinuŭ jaho syn.
Toje, što pamierły bajkier — supracoŭnik milicyi, paćvierdziła i krynica «Našaj Nivy».
U supołcy «Ukantakcie», dzie abmiarkoŭvałasia avaryja, pasprabavali padličyć, ź jakoj chutkaściu jechaŭ matacyklist.
«Čeł za try siekundy prajechaŭ bolš za 120 mietraŭ. Heta bolš za 100 km/h. I potym kažuć, što kiroŭca nie prapuściŭ… Škada chłopca, ale kožny sam vybiraje, jak jamu žyć», havorycca ŭ samym załajkanym kamientary.
Miarkujučy pa tym, jak jon pralataŭ darožnyja słupy, možna mierkavać, što Yamaha ruchałasia ź pieravyšeńniem. Dakładnuju ličbu vyznačyć ekśpiertyza, ale, chutčej za ŭsio, chutkaść matacykła składaje 80—100 km/h.
Kaho pryznajuć vinavatym? Raniej u padobnych situacyjach, kali aŭtamabil pavaročvaje naleva i nie prapuskaje sustrečny transpart, adnaznačna pryznačali vinavatym taho, chto nie sastupiŭ darohu. Paśla praktyka źmianiłasia. U Biełarusi niama precedentnaha prava, ale paśla kiejsa Alaksandra Hleba zakony stali traktavać inačaj.
Nahadajem, u 2004 viadomy futbalist trapiŭ u avaryju — na skryžavańni vulic Surhanava i Jakuba Kołasa jaho «Aŭdzi» pavaročvała naleva i nie sastupiła darohu BMW, jaki lacieŭ nasustrač. Pasažyr BMW zahinuŭ.
Było vyznačana, što Hleb nie moh bačyć sustrečny aŭtamabil, jaki jechaŭ ź vidavočnym pieravyšeńniem chutkaści, a značyć, jon nie vinavaty.
Ciapier u bolšaści vypadkaŭ vinavatym u padobnych avaryjach pryznajuć taho, chto značna pieravyšaje chutkaść. Asabliva časta takoje zdarajecca z matacyklistami. Farmalna u ich pieravaha, ale kiroŭcy, jakija pavaročvajuć naleva, prosta nie majuć mahčymaści ŭbačyć, jak na kaśmičnaj chutkaści da ich nabližajecca matacykł.
Adnak u mahiloŭskaj situacyi pryjarytetnym moža stać toje, što kiroŭca busa byŭ pjany.
Pa fakcie zdareńnia zaviali kryminalnuju spravu.
Vialikaja hutarka z Alinaj Koŭšyk — pra intervju z Padsasonnym, skandał z Kulejem i reformy na «Biełsacie»1
Kamientary