Realii rasijskaj pravincyi: pakul muž byŭ na froncie, žonka pajšła da inšaha. Sužychar jaje zabiŭ i taksama pajšoŭ na vajnu

U rasijskaj Jakucii dziaŭčynka-padletak, čyju maci zabiŭ sužychar, a ajčyma mabilizavali, moža trapić u dziciačy dom. Siarhieju Jahoravu, jaki źjechaŭ z frontu, pahražajuć prymusovym viartańniem na vajnu za toje, što jon nie zachacieŭ pakidać padčarku adnu paśla zabojstva jaje maci.

Historyja adbyłasia ŭ maleńkim siale Kiačy. U 2015 hodzie Jahoraŭ paznajomiŭsia ŭ Jakucku z maładoj maci Maryjaj Ačykasavaj. U ich zaviazalisia adnosiny, i jany vyrašyli pierabracca ŭ rodnaje siało Maryi.

U kastryčniku 2022 hoda Siarhiej pajechaŭ praviedać svajakoŭ na svaju małuju radzimu — za 800 kiłamietraŭ ad Kiačy. Tam jaho ŭžo čakała pozva pa mabilizacyi. Jahoraŭ chavacca nie staŭ:

«Nie viedaju, jak inšyja, a ja ni siekundy nie sumniavaŭsia, nikudy nie chavaŭsia. Miarkujcie sami: pakul ja žyŭ u rodnaj vioscy, ja byŭ nastaŭnikam ABŽ. Jak ja moh uciakać, kali stolki hadoŭ vučyŭ školnikaŭ patryjatyzmu?»

Pierad adjezdam na vajnu Jahoraŭ raśpisaŭsia z Maryjaj i ŭdačaryŭ jaje dačku Darynu, «kab dziaŭčynkam dapamahali, kali jon zahinie». Vajavać jaho adpravili ŭ Zaparožskuju vobłaść. Jahoraŭ raskazvaje, što kuplać ekipiroŭku i bytavyja rečy jamu davodziłasia za svaje hrošy. Akramia taho, kamandavańnie nibyta abiacała jamu miedal za «dobruju spravu», ale tak i nie ŭznaharodziła.

U studzieni Maryja patelefanavała mužu na front i paviedamiła, što pajšła da inšaha mužčyny. Pryčym dačku z saboj nie zabrała: pa jaje pryjšli orhany apieki. Jahoraŭ dystancyjna ŭhavaryŭ čynoŭnikaŭ addać dziaŭčynku babuli. A ŭ žniŭni jon zmoh pryjechać u Kiačy da padčarki — jamu dali pieršy adpačynak.

Akazałasia, što Maryja naohuł źnikła. Praź niekalki tydniaŭ jaje cieła znajšli ŭ rajcentry za 25 kiłamietraŭ ad doma. Zabiŭ jaje sužychar Uładzisłaŭ Karniłaŭ: jon dvojčy streliŭ u žančynu va ŭpor sa strelby 12-ha kalibra. Pra zabojstva jon raskazaŭ adnoj sa svaich byłych sužycharak, jakich u jaho było šmat. Nieŭzabavie Karniłava zatrymali.

U studzieni 2024 hoda Karniłavu pryznačyli 8 hadoŭ kałonii strohaha režymu, paśla apielacyi hety termin pavialičyli da 10 hadoŭ. Jahoraŭ taksama padaŭ hramadzianski pazoŭ na adras zabojcy žonki, ale ŭ lipieni na čarhovym pasiadžeńni suda jon daviedaŭsia, što vytvorčaść pa spravie spynienaja. Tamu što Karniłaŭ zavierbavaŭsia na vajnu i byŭ vyzvaleny ad pakarańnia.

Heta naviało Jahorava na dumku, što ŭ Rasii pačynajecca bardak.

«Kali ščyra, heta ŭžo pačynajecca bardak u Rasii. Akazałasia, što zakona ŭ krainie naohuł niama. Usich vinavatych ciapier adpraŭlajuć na vajnu — jak jany tam buduć adkazvać za svaje złačynstvy? Vinavaty pavinien adkazvać za svaje ŭčynki i siadzieć u turmie, a nie tak: hod advajavaŭ, viarnuŭsia i žyvie spakojna. Što jon natvoryć jašče, nieviadoma», — kaža Jahoraŭ.

Jaho samoha chočuć viarnuć na front. Sa studzienia im aktyŭna cikavicca vajskovaja palicyja — tam miarkujuć, što jon samavolna pakinuŭ čaść. Z-za taho, što Jahoraŭ znachodzicca ŭ padviešanym stanie, Darynaj cikaviacca orhany apieki. Tam mužčynu skazali «addać dziaŭčynku ŭ prytułak i iści abaraniać radzimu».

Zvolnicca z vojska mabilizavanyja mohuć tolki ŭ vyklučnych vypadkach. Jahoraŭ chacieŭ zvolnicca jak baćka-adzinočka dziciaci da 16 hadoŭ, rassyłaŭ listy i zapisvaŭ videazvaroty, adnak čynoŭniki i siłaviki spravu zaciahvali. Miarkujučy pa ŭsim, jany čakali adpaviednaha momantu — 17 žniŭnia Darynie spoŭniłasia 16, i ciapier u Jahorava niama padstaŭ dla zvalnieńnia.

• 2
• 1
• 11
• 10
• 1
• 0
• 1
• 0