6000 dalaraŭ navaru za adnapakajoŭku ŭ starym domie. Try historyi, jak pradavali kvatery ŭ Minsku ŭ 2024 hodzie

«Kvateru pradaŭ adrazu paśla zakančeńnia budaŭnictva»

• Abjekt prodažu: jeŭratrochpakajoŭka ŭ «Minsk-Śviecie».
• Płošča: 73 kv. mietry.
• Cana: kupiŭ za $70 tys., pradaŭ za $94 tys.

— U 2023 hodzie kupiŭ u «Minsk-Śviecie» na stadyi budaŭnictva jeŭratrochpakajoŭku sa svabodnaj płaniroŭkaj płoščaj 73 kv. mietry. Kvatera abyšłasia ŭ 70 tysiač dołaraŭ. Na kuplu braŭ biespracentnuju rasterminoŭku ad Dana Holding (kampanija, jakaja realizuje prajekt «Minsk-Śviet»), jakuju zakryŭ zahadzia.

Sioleta adrazu paśla zakančeńnia budaŭnictva vyrašyŭ pradać kvateru, pakolki na hety momant žyvu ŭ inšaj krainie i pakul nie płanuju viartacca.

Za ŭhodu adkazvaŭ baćka pa hiendavieranaści. Prablem nijakich nie było. Tolki patrebna była daviedka, što jon nie staić ni na jakich ulikach (na biesśviadomaść abo na narkazaležnaść).

Kvateru pradavali praz ahienctva nieruchomaści ŭ samym kancy leta. Z ahienctvam možna było damovicca, kab paviedamlali pra ŭsich tych, chto telefanuje, abo tolki pra tych, chto prychodzić hladzieć. Mnie kazali tolki pra realnyja prahlady.

Pieršapačatkova my vystavili ceńnik za kvateru ŭ 97 tysiač dołaraŭ. Ale zvankoŭ było niašmat, a akramia taho ŭsie patencyjnyja pakupniki sprabavali skinuć canu. My vyrašyli skinuć canu da 94 tysiač dołaraŭ, kab trapić u inšy dyjapazon pošuku. I paśla hetaha kolkaść zvankoŭ i prahladaŭ pavialičyłasia.

Praŭda, mnohich biantežyła architekturnaja asablivaść u vyhladzie vuhła truby nad uvachodam. Heta vielmi prosta vyrašajecca, ale mnohija nie chacieli duryć hałavu.

Byli pakupniki, jakija pradavali svaju kvateru i chacieli zareziervavać maju, ale bieź pieradapłat. Ale mianie taki varyjant nie zadavalniaŭ. Praz tydzień hetyja ž pakupniki prapanavali canu na 2 tysiačy dołaraŭ mienš, ale ź pieradapłataj, jakaja ŭ vypadku admovy ad uhody zastajecca ŭ mianie. Ale ja admoviŭsia ad hetaha varyjantu.

Praz paru dzion hetyja ž pakupniki pahadzilisia na maju canu, ale na toj momant jany jašče nie pradali svajoj kvatery. Ja nie staŭ ź imi dalej vieści pieramovy, bo ŭ toj ža dzień źjaviŭsia inšy pakupnik, jaki pahadziŭsia kupić kvateru biez torhu pa prapanavanaj canie. Jon zapłaciŭ častkova najaŭnymi, a na častku sumy ŭziaŭ kredyt. Najaŭnyja addaŭ u dzień uhody, a kredytnyja hrošy ja atrymaŭ užo na nastupny dzień.

U vyniku kvateru mnie ŭdałosia pradać za dva tydni i pa dobraj canie. Kali b nie žadańnie chutčej ukłaści ŭhodu, to, dumaju, pradaŭ by daražej — prykładna za 100 tysiač dołaraŭ.

Darečy, moj kaleha taksama letam pradavaŭ kvateru ŭ Hrušaŭcy — i taksama biez ramontu i praz ahienctva. Pradaŭ dosyć chutka.

«Na prodažy atrymałasia zarabić šeść tysiač dołaraŭ»

• Abjekt prodažu: adnapakajovaja kvatera ŭ centry Minska.
• Płošča: 30 kv. mietraŭ.
• Cana: kupiŭ za $48 tys., pradaŭ za $56 tys.

— U sakaviku 2021-ha kupiŭ u Minsku kvateru dla nastupnaj zdačy ŭ arendu.

Nahledzieŭ adnapakajoŭku ŭ 30 kv. mietraŭ u centry ŭ starym domie. Ale sama kvatera była sa śviežym ramontam i arandataram, jaki ŭžo žyŭ tam. Akramia taho, kvatera była zručna raźmieščanaja: pamiž mietro «Płošča Lenina» i «Instytut kultury», u krokavaj dastupnaści ad troch univiersitetaŭ.

Kvatera abyšłasia ŭ 48 tysiač dołaraŭ, kupiŭ jaje całkam za svaje hrošy razam ź dziejnaj damovaj arendy. Na toj momant kvatera zdavałasia za 330 dołaraŭ u miesiac. Na hetaj staŭcy ja pierasiedzieŭ kryzisny 2022 hod. Na pačatku 2024 hoda padniaŭ košt arendy da 400 dołaraŭ.

U kvateru za try hady praktyčna ničoha nie ŭkłaŭ. Pry kancy červienia kitajskaja studentka, jakaja žyła ŭ kvatery, źbirałasia na leta dadomu. U apošni miesiac jaje pražyvańnia vyrašyŭ vystavić kvateru na prodaž. Ja razvažaŭ pra pierajezd ź Biełarusi, tamu vyrašyŭ pradać kvateru, kab zafiksavać dachod.

Vystaviŭ canu na dziesiać tysiač dołaraŭ vyšej, čym kuplaŭ. Paprasiŭ kitajanku pakazvać kvateru pakupnikam. Jana ništavata razmaŭlała pa-rusku i biez prablem pahadziłasia.

Rehularna mnie pisali i telefanavali ahienctvy nieruchomaści, ale ja ich ihnaravaŭ. Pryciahvać inšych «śpiecyjalistaŭ» nie bačyŭ sensu. Jak na mianie, ryełtary biaruć absalutna nieadekvatnyja hrošy za ništo. U jurydyčnaj pracedury možna lohka razabracca samomu.

Pa sutnaści ahienty prosta vystaŭlajuć tuju ž kvateru, ale na dźvie tysiačy dołaraŭ daražej, jakija jany potym płanujuć zabrać sabie. Da taho ž nie viedajuć mnostva niuansaŭ, źviazanych z samoj kvateraj, i kali ŭ patencyjnaha pakupnika budzie niestandartnaje pytańnie, to jany nie zmohuć na jaho adkazać.

Achvotnych i tak vyjaviłasia šmat. U asnoŭnym prychodzili inšaharodnija, i mnohich cikaviła mahčymaść pakupki ŭ kredyt. Za paŭtara miesiaca kvateru pahladzieła kala 20 čałaviek. Sama kvatera ŭsim padabałasia, ale brudny padjezd i susiedzi-ałkaholiki (biada starych damoŭ) adpužvali pakupnikoŭ.

U vyniku pradaŭ kvateru biełaruskaj siamji ź inšaha rehijona, choć mnie kazali, što červień—lipień — heta miortvy siezon. Na prodažy atrymałasia zarabić šeść tysiač dołaraŭ. I heta biez uliku arendy, jakaja stabilna prynosiła dachod usie try hady.

«Najaŭnyja ad prodažu kvatery pryvieźli ŭ Dubaj»

• Abjekt prodažu: jeŭradduchpakajoŭka ŭ Novaj Baravoj.
• Płošča: 69 kv. mietraŭ.
• Cana: kupiŭ za $84 tys., pradaŭ krychu daražej.

— U 2022 hodzie kupiŭ na stadyi budaŭnictva jeŭradvuchpakajoŭku ŭ Novaj Baravoj płoščaj 69 kv. mietraŭ za 84 tysiačy dołaraŭ. Ukłaŭ 50% ułasnych srodkaŭ i 50% kredytu, jaki aformiŭ u BTA Banku (z vypłataj 13% u pieršy hod i 20% u nastupnyja).

Pakul išło budaŭnictva, u kvateru ničoha nie ŭkładaŭ. U hetym hodzie kvatera była całkam dabudavanaja, i ja jaje pradaŭ, kab reinviestavać hrošy ŭ novaj krainie — ja ŭžo dva hady žyvu ŭ AAE.

Usimi pytańniami i dakumientami zajmaŭsia čałaviek z hiendavieranaściu. Tamu mnie navat nie daviałosia pryjazdžać u Biełaruś. Dla prodažu pryciahnuli ryełtara. Jon dosyć chutka znajšoŭ pakupnika, jakoha zadavolili i kvatera, i cana. Pakupnik raźličyŭsia najaŭnymi. Usiu sumu mnie potym pryvieźli ŭ AAE.

Darečy, kab pahasić kredyt u BTA Banku, ja ŭziaŭ jašče adzin kredyt pad 6% u banku AAE, a potym pahasiŭ i jaho.

Kvateru ŭdałosia pradać krychu daražej, čym kupiŭ. Ale roźnica ŭsio roŭna nie pakryła pracentaŭ pa kredycie i inflacyi. Kali b nie kredyt i nie paśpiech z prodažam, to, mahčyma, atrymałasia b zarabić.

• 0
• 0
• 0
• 0
• 0
• 0
• 0
• 0