Milicyjanta, jaki raskazaŭ pra źbićcio ludziej u RUUS, zavočna asudzili na 15 hadoŭ
Byłoha lidskaha milicyjanta Juryja Machnača zavočna asudzili da 15 hadoŭ pazbaŭleńnia voli ŭ kałonii va ŭmovach uzmocnienaha režymu. Aproč hetaha, jon musić vypłacić štraf u pamiery 500 bazavych vieličyniaŭ — 20 tysiač rubloŭ, piša «Viasna».
Sudździa Juryj Kazakievič pryznaŭ jaho vinavatym u «akazańni dapamohi zamiežnaj dziaržavie, inšaziemnaj arhanizacyi i ich pradstaŭnikam u praviadzieńni dziejnaści, jakaja nakiravanaja na škodu nacyjanalnaj biaśpiecy Biełarusi».
Juryj — heta były padpałkoŭnik milicyi Lidskaha RAUS, kamandzir roty PPS.
U žniŭni 2020 hodu jon publična raskazaŭ pra padrychtoŭku milicyi da karnych «začystak», źbivańni zatrymanych. Tady ž, 18 žniŭnia, jon padaŭ u adstaŭku sa słužby ŭ milicyi. A paźniej z-za niebiaśpieki pieraśledu pakinuŭ Biełaruś.
Masavyja palityčnyja represii ŭ Biełarusi praciahvajucca z 2020 hoda.
Tady Alaksandr Łukašenka, miarkujučy pa infarmacyi z učastkaŭ, dzie padlik hałasoŭ išoŭ u prysutnaści niezaležnych naziralnikaŭ, prajhraŭ Śviatłanie Cichanoŭskaj, ale nie addaŭ ułady.
Pa infarmacyi pravaabaroncaŭ, za 2020—2024 hady było zaviedziena bolš za 19 tysiač kryminalnych spraŭ «ekstremisckaj skiravanaści», heta značyć, palityčnaha charaktaru. Pa mnohich kryminalnych spravach prachodziać šmatlikija fihuranty.
Zhodna z infarmacyjaj Paŭła Łatuški, pradstaŭnika Abjadnanaha pierachodnaha kabinieta, z 2020 hoda represii zakranuli 136 tysiač čałaviek. Niekalki socień tysiač biełarusaŭ vymušanyja byli pakinuć krainu.
Zatrymali Ihara Iljaša, muža palitźniavolenaj Kaciaryny Andrejevaj3
Kamientary
Dziakuj vialiki, Juryj.