«Pradaŭ mamie fiktyŭna». Biełarusy raskazali, ź jakoj ciažkaściu pradajuć svaje kvatery

«Pakupnik advaliŭsia, kali daviedaŭsia, što ja źbirajusia vypisvacca z kvatery praz sud»

• Abjekt prodažu: dvuchpakajovaja kvatera ŭ Minsku.
• Płošča: 50 kv. mietraŭ.

— Viasnoj ja vyrašyła pradać kvateru ŭ Minsku, bo ŭžo bolš za hod žyvu ŭ Polščy.

Kvatera dastałasia mnie ad baćkoŭ 5 hadoŭ tamu. Znachodzicca ŭ dobrym rajonie, paśla maštabnaj uzakonienaj pierapłaniroŭki z abnoŭlenym techpašpartam. Rabiłasia ŭsio pad siabie.

Ukłała damovu z ahienctvam. Pradaviec adrazu ž znajšoŭsia, na praciahu tydnia my ŭkłali ź im papiaredniuju damovu.

Praź niejki čas ahientka vyrašyła ŭdakładnić miž inšym, jak ja źbirajusia vypisvacca z kvatery. Vyśvietliłasia, što vypisacca ŭ nikudy ja nie mahu navat pa hienieralnaj davieranaści. Treba albo pieradavać svoj pašpart u Biełaruś, kab mianie prapisali pa inšym adrasie (naprykład, da baćkoŭ), albo pryjechać samoj. Ale ni pieršy, ni druhi varyjant mianie nie zadavalniali.

Pryjezd u Biełaruś — heta ryzyka. Pieradavać pašpart taksama nielha. Kali na miažy pašpart znojduć u inšaha čałavieka, to mahčymaja kanfiskacyja dakumienta. Tamu ja vyrašyła vypisvacca praz sud.

Pakolki ni ja, ni blizkija svajaki nie mahli padać zajavu ŭ sud ab źniaćci z rehistracyi, heta pavinien byŭ zrabić novy ŭłaśnik užo paśla kupli kvatery. Daviedaŭšysia pra heta, moj patencyjny pakupnik adrazu ž advaliŭsia.

Kvatera visieła jašče niekalki tydniaŭ, prahladaŭ było šmat, ale nichto nie navažvaŭsia ŭkłaści ŭhodu praz maju prapisku.

Ja vyrašyła pastavić prodaž na paŭzu i zaniacca vypiskaj paśla atrymańnia DNŽ — i aformić pastajannaje miesca pražyvańnie za miažoj u biełaruskim pasolstvie ŭ Polščy. U hetym vypadku mianie całkam zdymali z rehistracyi ŭ Biełarusi.

Ale ŭ hety čas znajšoŭsia druhi pakupnik, jaki pahadziŭsia ŭkłaści spačatku ŭhodu, a potym dačakacca majoj vypiski. My na słovach ahavaryli terminy i zakład u 2 tysiačy dołaraŭ pad harantyju vypiski. Zvyčajna hety zakład zastajecca ŭ ahienctvie jak harantyja.

Ale ŭžo ŭ momant układańnia papiaredniaj damovy (pa hienieralnaj davieranaści vystupaŭ moj pradstaŭnik) pakupnik pačaŭ žorstka patrabavać paskareńnia pracesu vypiski. Suma zakładu pry hetym vyrasła da 3 tysiač dołaraŭ. Pryjšłosia pahadzicca na jaho ŭmovy.

Pry hetym na słovach my damovilisia, što kali raptam sud admović u vypiscy (a ŭžo byli takija zvanočki), to ja pajdu vypisvacca praź biełaruskuju ambasadu ŭ Polščy. U krajnim vypadku ja była hatovaja pryjechać u Biełaruś.

U vyniku jašče da suda ja pradała kvateru pa siaredniaj canie na rynku i aformiła pieradaču pravoŭ ułasnaści.

Finansavuju častku ŭhody aformili ŭ banku. Pakupnik pieradaŭ mnie častku ŭłasnych srodkaŭ, a potym aformiŭ pieravod na moj rachunak kredytnych srodkaŭ. Paśla zakryćcia finansavych pytańniaŭ užo ŭ BRTI ŭkłali damovu ab pieradačy pravoŭ ułasnaści.

U banku ja addała ahientcy ŭznaharodžańnie ŭ 2 tysiačy dołaraŭ i jašče 3 tysiačy dołaraŭ zakładu pad harantyju vypiski.

Cikavy momant. Pakolki jurydyčna ahienctva nie moža brać na siabie zachoŭvańnie jakich-niebudź hrošaj ad fizasoby, ahientka skłała damovu zachoŭvańnia hrošaj (3 tysiačy dołaraŭ zakładu) na svajo imia. Vypisvajusia ŭ naležnyja terminy — hrošy zabiraju z ahienctva.

Na žal, u mituśni pieradačy hrošaj, pieravodu kredytu i afarmleńnia kučy papierak moj davierany bok padpisaŭ damovu jak jość, nie asabliva ŭčytvajučysia. Kali sieli i spakojna pieračytali, to ŭzialisia za hałavu. Ja razumieła, što vypisacca pa sudzie ŭ nazvanyja terminy nie paśpieju, adpaviedna, straču ŭvieś zakład.

Vyjšli znoŭ na kantakt z ahienctvam, kab pamienšyć sumu zakładu, ale tam ni ŭ jakuju nie chacieli ničoha abmiarkoŭvać.

Kab dapamahčy vypisacca, ahienctva dało svaju advakatku, za jakuju davała zaruku, što jana zrobić usio «za adno pasiadžeńnie». Ale na praktycy vyjšła sumna: vielmi słabaja pazoŭnaja zajava z razradu «vypišycie jaje, nu kali łaska». Nijakich dakumientaŭ advakatka ŭ mianie nie zaprasiła, sa mnoj na kantakt nie vychodziła. Navat bieź jurydyčnaha dośviedu i adukacyi stała zrazumieła, što sprava pravalnaja.

Sud, jak i čakałasia, admoviŭ u vypiscy. Paśla čaho my damovilisia pra sustreču z ahientkaj, kab abmierkavać dalejšyja kroki. Hetym razam vypisvacca vyrašyli praz ambasadu Biełarusi ŭ Polščy. 

Skłali novaje pahadnieńnie. Umovy nastupnyja. Uvieś zakład zachoŭvajecca ŭ pakupnika. Prapisali novyja terminy pa vypiscy (znoŭ vielmi karotkija). Jašče i mahčymaść štrafu: «nie vypisvajusia ŭ naležny termin — hrošy zastajucca ŭ pakupnika».

Mnie hetyja ŭmovy, viadoma, nie spadabalisia, ale ničoha zrabić užo było nielha. Vypisacca ŭ termin ja tak i nie paśpieła. Pryjšłosia rasstacca z 3 tysiačami dołaraŭ zakładu. Jašče daviałosia apłacić usie vydatki na sud i advakata — kala 300 dołaraŭ. 

Ciapier ja ŭsio jašče prapisanaja ŭ minskaj kvatery. Ale ŭžo atrymała DNŽ i zapisałasia na pryjom u ambasadu, kab aformić pastajannaje miesca pražyvańnia za miažoj. Pracedura zvyčajna zajmaje kala 2—4 miesiacaŭ.

Paśla ŭsioj hetaj historyi zrabiła dla siabie takuju vysnovu: zaŭsiody treba ŭvažliva čytać damovu, pažadana prasić u ahienta, kab skidaŭ na poštu jaje fota zahadzia — budzie čas pieraasensavać abo niešta dadać. Praktyka pakazvaje, što možna mnohaje vypuścić z-pad uvahi. I samaje hałoŭnaje — usie vusnyja damoŭlenaści prapisvać dakumientalna. Słovy zabyvajucca, a papierka zastajecca.

Pavialičyć

«Pradali kvateru fiktyŭna»

• Abjekt prodažu: dvuchpakajovaja kvatera ŭ Minsku.
• Płošča: 49 kv. mietraŭ.

— U mianie była dvuchpakajovaja kvatera ŭ Minsku. Kupiŭ jaje amal 15 hadoŭ tamu.

U 2020 hodzie źjechaŭ ź Biełarusi. Aformiŭ na siastru hienieralnuju davieranaść.

Kvatera ŭvieś hety čas pustavała. U arendu zdavać nie płanavaŭ. Pa-pieršaje, u kvatery zastavalisia asabistyja rečy. Pa-druhoje, nie chaciełasia mieć spravu z padatkovaj. I była nadzieja, što zmahu viarnucca ŭ krainu.

Ale ŭ 2023 hodzie biełaruskija konsulstvy pierastali vydavać novyja hienieralnyja davieranaści. Termin damovy pamiž mnoj i siastroj padychodziŭ da kanca. I ja vyrašyŭ terminova «pradać» kvateru mamie.

Pa hienieralnaj davieranaści było niemahčyma padaryć kvateru, tolki pradać. Tak što ŭsio afarmlałasia jak prodaž za peŭnuju sumu najaŭnymi (jakija, viadoma, mama mnie nie płaciła). Uhodu afarmlali z dapamohaj ryełtara. Spatrebiłasia «zhoda na prodaž kvatery» ad majoj žonki, bo jana była prapisanaja ŭ kvatery. Uhoda prajšła chutka. U padatkovaj pytańniaŭ nie ŭźnikła.

A nie tak daŭno kvatera była pradadzienaja ŭžo realnamu pakupniku za realnyja hrošy. Jon vypłaciŭ usiu sumu adrazu, biez kredytu.

«Dolu ŭ kvatery pradavali kala paŭhoda»

• Abjekt prodažu: 2/3 doli ŭ trochpakajovaj kvatery ŭ Kurasoŭščynie.
• Cana: pradali za 33 tysiačy dołaraŭ, kupili kvateru ŭ Malinaŭcy za 72 tysiačy dołaraŭ.

— Z mužam zapłanavali kuplu kvatery na druhasnym rynku. Razhladali Maskoŭski i Frunzienski rajony. My pryvykli da hetych rajonaŭ, tam dobraja infrastruktura, ad pracy niedaloka i svajaki pobač.

Razhladali dvuchpakajoŭki da 75 tysiač dołaraŭ z narmalnym ramontam, kab možna było adrazu zajechać i žyć, z narmalnymi sanvuzłami, jakija jašče hadoŭ z 5-10 možna nie pierarablać, ź bietonnaj ściažkaj, a nie draŭlanymi padłohami. Taksama była važnaja najaŭnaść lifta, tamu nie razhladali piacipaviarchoŭki.

U vyniku znajšli prydatnuju pad našy patrabavańni trochpakajovuju kvateru ŭ Malinaŭcy za 72 tysiačy dołaraŭ.

Pałovu nieabchodnaj sumy źbiralisia ŭziać u banku ŭ kredyt, jašče pałovu — vyručyć ad prodažu 2/3 doli (dva pakoi) u trochpakajovaj kvatery ŭ Kurasoŭščynie, jakaja naležała mužu. Kvatera bolš za 10 hadoŭ tamu pierajšła da muža i jaho stryječnaj siastry ŭ spadčynu ad ciotki. Pieršapačatkova kožny byŭ ułaśnikam ½ doli, paźniej my vykupili jašče adzin pakoj.

Svaju dolu my vystavili za 34 tysiačy dołaraŭ, ale pradavali vielmi doŭha — napeŭna, paŭhoda.

Pieršaja ŭhoda sarvałasia, pakolki naša dola nie była vydzielenaja (choć pakupnik spačatku kazaŭ, što heta dla jaho nie prablema).

Vydzielenaja dola — vypadak, kali peŭnyja pakoi (abo pakoj) u kvatery naležać całkam ułaśniku, i ŭłaśniki inšych dolaŭ nie mohuć na ich pretendavać. Zvyčajna vydzialajuć doli, kali ŭładalniki nie mohuć damovicca, chto jakija pakoi budzie zajmać i iduć praz sud vyznačać prava ŭłasnaści. Vydzielenyja pakoi achvotniej i chutčej kuplajuć, i na ich cana vyšejšaja.

Ale kab vydzielić dolu, treba vydatkavać niemaleńkuju sumu na sudovyja vydatki, advakata. My paličyli, što ŭsia pracedura abydziecca nam prykładna ŭ 5 tysiač dołaraŭ i zojmie minimum miesiac-paŭtara

Paśla admovy patencyjnaha pakupnika prahladaŭ nie było kala dvuch miesiacaŭ. Ale, samaje hałoŭnaje, parušyŭsia łancužok prodažaŭ. Hrošy ad prodažu doli my płanavali adrazu addać za kvateru ŭ Malinaŭcy, a astatniuju častku pakryć kredytam. Ale ŭ vyniku pieršaj častki sumy ŭ nas nie akazałasia.

Nam pašancavała, ułaśniki kvatery ŭ Malinaŭcy prapanavali addać pieršy ŭniosak kredytam. Vyjaviłasia, im samim terminova patrebnyja byli hrošy dla kupli kvatery ŭ Fanipali. U vyniku padpisali pahadnieńnie kupli-prodažu i damovilisia, što pieršuju častku hrošaj my addajom kredytam, a druhuju na praciahu paŭhoda.

Kredyt my ŭziali na sumu 110 tysiač rubloŭ (34 tysiačy dołaraŭ pa kursie Nacbanka na toj momant) pad 14,4% na 20 hadoŭ. Ale druhuju častku hrošaj nam u vyniku daviałosia pazyčać, bo prodaž našaj doli zaciahnuŭsia.

Spačatku doŭha nie było pakupnikoŭ. Potym jany pačali padciahvacca, ale mnohija šukali chalavy, prapanoŭvali damovicca z druhim ułaśnikam, kab my pradali ŭsiu kvateru pa koštu doli. Niekatoryja admaŭlalisia ŭkładać damovu praz ahienctva, to-bok biez papiaredniaj damovy. Mnohija sprabavali skinuć bolš za 10-15% ad vystaŭlenaha koštu.

U vyniku nam udałosia pradać dolu krychu nižej za vystaŭlenuju pieršapačatkova canu — za 33 tysiačy dołaraŭ. Klučy ad novaj kvatery ŭ Malinaŭcy my atrymali tolki praz 4 miesiacy paśla padpisańnia damovy kupli-prodažu.

• 0
• 0
• 0
• 0
• 0
• 0
• 0
• 0