Sud u Rasii pryhavaryŭ dvuch biełarusaŭ, jakich abvinavačvali ŭ dyviersii, da 12 hadoŭ kałonii
Pavodle viersii śledstva, Baśko i Breski za ŭznaharodu padpalili elektravoz u łakamatyŭnym depo «Arechava-Zujeva».
Sud pryhavaryŭ abvinavačanych u dyviersii ŭ Rasii hramadzian Biełarusi Arcioma Breskaha i Kiryła Baśko da 12 hadoŭ kałonii pavodle artykuła ab dyviersii, piša «Miedyjazona».
Pavodle viersii śledstva, Baśko i Breski za ŭznaharodu padpalili elektravoz u łakamatyŭnym depo «Arechava-Zujeva». Takoje zadańnie daŭ im nieviadomy, jaki raźmiaściŭ abjavu nakont pracy ŭ telehram-kanale «Upiski-Maskva» i pradstaviŭsia jak «Juryj».
Vystupajučy śviedkam u sudzie, apieratyŭnik FSB Pavieł Pamitun śćviardžaŭ, što «Juryj» akazaŭsia ŭkrainskim raźviedčykam, chacia śpiecsłužba i nie ŭstanaviła jaho asobu. Na pytańnie, jak jon pryjšoŭ da vysnovy, što «Juryj» słužyć u HUR, Pamitun adkazać nie zmoh.
Zhodna z pakazańniami, jakija Baśko i Breski davali na śledstvie, padpał elektravoza byŭ nie adzinym zadańniem «Juryja» — spačatku jon prapanavaŭ padpalić aŭtamabil, a paśla jašče adzin łakamatyŭ, ale ŭžo ŭ Maskvie.
Pry hetym, jak vynikaje z začytanaha ŭ sudzie pratakoła dopytu Baśko, jany z Breskim padmanuli «Juryja»: vydali znojdzieny ŭ internecie rolik za videaspravazdaču pra padpał mašyny i atrymali hanarar u bitkojnach.
U sudzie abodva padsudnyja admovilisia ad hetych pakazańniaŭ. Baśko zajaviŭ, što padpisaŭ pratakoł, nie čytajučy, bo padčas dopytu niejki mužčyna źbivaŭ jaho i Breskaha i pahražaŭ nadzieć miašok na hałavu.
Arciom Breski i Kirył Baśko — uradžency Viciebska, u 2022 hodzie jany pryjechali ŭ Maskvu na zarobki. Biełarusaŭ zatrymali 27 śniežnia 2022 hoda. U toj dzień na ich skłali pratakoły za drobnaje chulihanstva (častka 1 artykuła 20.1 KaAP RF) i aštrafavali za łajanku ŭ hramadskim miescy. Paźniej sud aryštavaŭ biełarusaŭ pa artykule ab naŭmysnym paškodžańni majomaści (častka 2 artykuła 167 KK RF), zatym abvinavačańnie pierakvalifikavali na artykuł ab dyviersii.
Kamientary