27 lutaha ŭ Minsku vystupić kolišni salist Rainbow i Deep Purple Džo Lin Ternier
Jak my viedajem, u ich tam, u starych chard-rokieraŭ, siamja: čas ad času Deep Purple raspadajecca, naprykład na Rainbow i Dio, potym lehiendarny hurt uźjadnoŭvajecca, potym salist Ijen Hiłan kryŭduje i sychodzić, potym viartajecca, ale ž tady sychodzić hitaryst Ryčy Błekmar, tym ža časam jak vyhnany Hiłanam salist źbiraje ŭłasny bend z padobnaj nazvaj. I pry hetym ŭsie vykonvajuć hity ŭsich astatnich. I hetak 40 hadoŭ.
Da nas jedzie salist Džon Lin Ternier — viadoma, nie pieršaja skrypka ŭ hetym kruhazvarocie chard-rokieraŭ i nie taki viadomy, jak udzielnik opiery «Isus Chrystos — supierstar» Ijen Hiłan abo ŭładalnik aksamitnaha vakału Dejvid Kavierdejł, ale jon z tych.
Zorka Terniera ŭzyšła ŭ 1980, kali adzin z najlepšych rok-hitarystaŭ płaniety Ryčy Błekmar zaprasiŭ jaho ŭ Rainbow, dzie salist zapisaŭ 3 albomy dy paspryjaŭ pośpiechu hurtu ŭ Štatach.
Druhaja viaršynia Ternera — 1988, kali jon dałučyŭsia da hitarysta-virtuoza, «šalonaha švieda», Inhvi Malmstejena, ź jakim i zapisaŭ, peŭna, svoj najiaskravy albom Odyssey. Tady hetyja dvoje byli adnymi ź pieršych zachodnich rok-muzykaŭ, chto adviedaŭ pierabudovačny Saviecki Sajuz, vynikam čaho zrabiŭsia albom «Vyprabavańnie ahniom — kancert u Leninhradzie».
U 1989 toj ža Błekmar zaprasiŭ Terniera ŭžo ŭ Deep Purple i Ternier zrabiŭsia piatym śpievakom hurta. U apošnija hady Džo Lin Ternier viadzie solnuju karjeru, a ŭ 2008 razam z synam Ryčy Błekmara, taksama hitarystam, na jaki hod arhanizavaŭ hurt z aryhinalnaj nazvaj Over The Rainbow.
Pakolki ŭ Minsku ŭsie viedajuć pra ščylnuju suviaź Džo Lin Terniera z dyppiorpłaŭcami i rejboŭščykami, u biełaruskaj stalicy Terneru ŭłasnyja pieśni, peŭna, vykonvać nie daduć. Arhanizatary abiacajuć zaćvierdžany płej-list, siarod jakich kłasičnyja hity chard-roku: Soldier of Fortune, When A Blind Man Cries, Perfect Strangers.
Takim čynam, minski kłub «The Black Door» (Charužaj 29a), 27 lutaha, subota. Džo Lin Ternier. Pačatak a 23:00. Košt kvitka 50 u.a.
Ciapier čytajuć
Ceny na paliva pavyšajucca na 4 kapiejki, a praz tydzień jašče na try1
Kamientary