Prezientacyja daśledavańnia historyka Natalli Hardzijenki «Biełarusy ŭ Vialikabrytanii» adbyłasia 14 traŭnia ŭ Minsku, u pamiaškańni Histaryčnaj majsterni.
«Biełarusy ŭ Vialikabrytanii» — 18‑ia kniha sieryi «Biblijateka Baćkaŭščyny», zasnavanaj u 2004 hodzie Zhurtavańniem biełarusaŭ śvietu «Baćkaŭščyna». Pieršaja prezientacyja knihi adbyłasia ŭ Vialikabrytanii 17 krasavika padčas śviatočnaj viečaryny z nahody adkryćcia hramadskaj zali ŭ Biełaruskim domie ŭ Łondanie. I voś 14 traŭnia kniha była prezientavana biełaruskim čytačam.
Raspačać imprezu sp‑nia Natalla zaprasiła kuratara adździaleńnia najnoŭšaj historyi Biełaruskaha Kalehijuma, historyka Zachara Šybieku i zrabiła heta zusim nievypadkova. Pa‑pieršaje, mierapryjemstva prachodziła ŭ miežach lekcyj Natalli Hardzijenki ŭ Biełaruskim kalehijumie, a pa‑druhoje, Natalla Hardzijenka sama źjaŭlajecca vypusknicaj kalehijuma.
«Ja liču, što ŭziacca za rapracoŭku takoj temy — heta hieraičny ŭčynak z boku Natalli Hardzijenki, ‑ adznačyŭ Zachar Šybieka.—Tamu što jana maładaja maci, małady kandydat navuk, i tolki ŭładkavałasia na pracu i tamu ŭziacca za rapracoŭku takoj temy było nieprosta. Tym nie mienš, u Natalli chapiła mužnaści i prafiesijanalizmu, kab napisać takuju hruntoŭnuju knižku. Natalli było z adnaho boku ciažka, a z druhoha boku joj paščaściła, što adbyłasia takaja sustreča ź niezvyčajnaj temaj, jakaja dazvoliła joj upisać novuju staronku ŭ historyju Biełarusi».
Dumku Zachara Šybieki padtrymaŭ i prafiesar Adam Maldzis: «Ja liču, što hetaja kniha—padzieja ŭ našym histaryčnym i kulturnym žyćci». Prafiesar Maldzis raspavioŭ pra svoj pieršy vizit u Vialikabrytaniju, jaki adbyŭsia ŭ 80‑ia hady. Tady ŭ Vialikabrytanii pastavilisia da jaho naściarožana. Kali ajciec Alaksandr Nadsan sustrakaŭ jaho ŭ aeraporcie, to jon trymaŭ u rukach daviednik sajuza piśmieńnikaŭ, kab spraŭdzić, ci taho čałavieka prysłali, jaki paznačany ŭ ankiecie. Taksama Adam Maldzis raspavioŭ pra znajomstva ź biełaruskim milijanieram ź Vialikabrytanii Janam Daminikam dy pra inšyja cikavyja momanty, źviazanyja ź biełarusami Vialikabrytanii.
Na sustrečy prysutničaŭ pradstaŭnik ministerstva kultury Uładzimir Šavialoŭ. Ad imia ministra kultury Paŭła Łatuški jon pavinšavaŭ Natallu i Aleha Hardzijenkaŭ z tym, što «zavieršana vialikaja navukovaja praca, i hetaja praca ŭžo nabyła niejkija materyjalnyja rysy. Užo jość kniha, jakuju možna čytać, jakuju možna padaravać znajomym ci prosta dać pačytać susiedziam i znajomym». Jak pieradaŭ Uładzimir Šviedaŭ, na dumku Paŭła Łatuški, hetaja kniha — «jašče adzin krok u paznańni historyi našaj krainy i ŭ jadnańni biełarusaŭ, jakija žyvuć nie tolki na terytoryi rodnaj Biełarusi, ale i za jaje miežami». «My spadziemsia, što heta jašče adna cahlinka ŭ fundamient našaj niezaležnaści, u fundamient našaha razumieńnia siabie jak nacyi», ‑‑ skazaŭ Uładzimir Šviedaŭ.
Padčas imprezy padziaku Natalli i Alehu Hardzijenkam vykazała i staršynia Rady Zhurtavańnia biełarusaŭ śvietu «Baćkaŭščyna» Nina Šydłoŭskaja. Jana nahadała, što aproč »Biełarusaŭ u Vialikabrytanii», aŭtarstvu Natalli Hardzijenki naležyć i kniha «Biełarusy ŭ Aŭstralii». Da taho ž, jana była redaktaram knihi «Biełarusy ŭ Arhiencinie: hramadskaja dziejnaść i reemihracyja ŭ SSSR (1930‑1960‑ia hh.)». «Nakolki składana było pracavać nad knihaj Natalli i ja, i Alena Makoŭskaja ŭśviedamlajem, bo my sami byli ŭ Biełaruskim domie, u haściach ŭ Alaksandra Nadsana, my bačyli tyja knihi, tyja falijanty, jakija tam zachoŭvajucca, i nie razhubicca ŭ hetaj bieźličy aryhinalnych, staražytnych tvoraŭ, praanalizavać ich i zrabić encykłapiedyju biełarusaŭ Vialikabrytanii, heta treba vielmi šmat pracy, intelektualnych i dušeŭnych vysiłkaŭ», ‑‑ adznačyła Nina Šydłoŭskaja.
Zatym słova ŭziała aŭtarka knihi Natalla Hardzijenka. Jana raspaviała pra toje, jak i kali źjaviłasia biełaruskaja prysutnaść na Brytanskich vyspach, raskazała pra historyju zasnavańnia starejšaj biełaruskaj arhanizacyi ŭ Vialikabrytanii — Zhurtavańnia biełarusaŭ u Vialikabrytanii, pra vybitnych asobaŭ biełaruskaj Brytanii, biełaruskich katalickich i pravasłaŭnych śviataroŭ. Asobnuju ŭvahu Natalla Hardzijenka addała raspoviedu ź videaprezientacyjaj pra biełaruskija miaściny ŭ Vialikabrytanii.
Naprykancy imprezy Natalla Hardzijenka padziakavała prysutnym za toje, što pryjšli i zaprasiła na przientacyju novaj knihi. «A jana abaviazkova budzie!» — zapeŭniła sp‑nia Natalla.
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć44
Kamientary