Palaki ŭsio čaściej nie prapuskajuć da siabie biełarusaŭ na aŭtamabilach. Voś u čym prablema

Ad samaha pačatku leta biełarusy ŭsio čaściej sutykajucca z tym, što nie mohuć trapić u Polšču na ŭłasnym aŭto.

Čyrvonaje śviatło dla čyrvonych lampaŭ

Hałoŭnaj pryčynaj, da jakoj čaplajucca na miažy, stała amierykanskaja optyka.

Reč u tym, što optyka ŭ aŭto, vyrablenych dla ZŠA i Jeŭropy, adroznaja. U «amierykancaŭ» čyrvonyja ŭkazalniki pavarotaŭ zzadu, jakija ŭ niekatorych madelach sumieščanyja sa stop-sihnałami, aranžavyja habaryty śpieradu, mohuć adsutničać paŭtaralniki pavarotaŭ zboku, adsutničaje zadniaja supraćtumannaja fara.

Biełarusy na amierykanskich aŭto, jakija nie zmahli trapić na ich u Polšču, adznačajuć, što pretenzii na miažy pierš za ŭsio ŭźnikajuć mienavita da ŭkazalnikaŭ pavarotaŭ. Kali jany mirhajuć čyrvonym, to takoje aŭto razvaročvajuć u Biełaruś.

Inšyja śćviardžajuć, što nie puskajuć mienavita tyja aŭto, dzie ŭkazalnik pavarotu sumieščany sa stop-sihnałam.

Pavialičyć

Pry hetym, jak adznačajuć padarožniki, najaŭnaść takoj optyki nie źjaŭlajecca 100%-j harantyjaj taho, što vy na hetym aŭto nie trapicie ŭ Polšču.

Pad pytańniem, ci prapuściać u Polšču z čyrvonymi pavarotnikami, razharełasia dyskusija i ŭ Treds: adny pišuć, što nie raz prajazdžali na takich aŭto biez pytańniaŭ, a inšyja — što nie prapuściać.

U kamientarach adznačyłasia kampanija, jakaja zajmajecca pierarobkaj optyki:

«Pa toj kolkaści mašyn, jakija pryjazdžajuć da nas na «pieraaśviatleńnie» z Amieryki na Jeŭropu, i razmaŭlajučy z klijentami, možam skazać tak: zaležyć ad źmieny / nadvorja / nastroju i h. d. U hetuju niadzielu prapuskali ŭsich «amierykancaŭ», učora ŭviečary dźvie mašyny palaki raźviarnuli».

Pavialičyć

Mnohija inšyja kamientatary taksama adznačajuć, što ŭsio zaležyć ad źmieny ci navat ad nastroju kankretnaha pahraničnika na polskim baku. Maŭlaŭ, časam nikoha nie praviarajuć, a časam razvaročvajuć nazad adrazu pa niekalki mašyn.

Taksama ŭ admysłovych telehram-čatach źviartajuć uvahu, što pilnaść kantrolu zaležyć i ad kankretnaha punktu propusku. Samym łajalnym nazyvajuć «Brest-Ciarespal», a samym patrabavalnym — «Bruzhi-Kuźnica».

Pytańnie, jakoje nie turbavała dziesiacihodździami

Vielmi časta pra niemahčymaść zajechać u Polšču na aŭto z Amieryki ludzi daviedvajucca niepasredna ŭ punkcie propusku, kali paśla pravierki atrymlivajuć admovu va ŭjeździe.

Reč u tym, što raniej hadami i navat dziesiacihodździami nikoha nie chvalavała, jakaja optyka ŭ aŭto. Hałoŭnaje, kab jana pracavała, dyj u cełym mašyna była spraŭnaja.

Pytańni, datyčnyja koleru ŭkazalnikaŭ pavarotaŭ, pačali aktyŭna abmiarkoŭvać u pryhraničnych čatach niedzie ad pačatku leta. Vidać, mienavita tady biełarusy pačali sutykacca z masavym niapropuskam na amierykanskich aŭto ŭ Polšču.

Ale, vierahodna, što pieršyja prablemy źjavilisia jašče ŭ mai.

U adnym z pamiežnych telehram-čataŭ 24 červienia byŭ apublikavany skryn adkazu, jaki nibyta pryjšoŭ ad polskaj palicyi. Jon datavany 18 maja, a sam zapyt, miarkujučy pa źmieście adkazu, pryjšoŭ 13 maja.

Pavialičyć

U im havorycca, što transpartny srodak musić być abstalavany ŭkazalnikami pavarotaŭ, jakija mirhajuć žoŭtym koleram.

U liście taksama adznačana, što kiravańnie na terytoryi Polščy transpartnymi srodkami, abstalavanymi čyrvonymi ŭkazalnikami pavarotaŭ, supiarečyć dziejnamu zakanadaŭstvu.

Pry hetym padarožniki adznačajuć, što na polskim baku pačali nie tolki sačyć za optykaj: pravierki transpartnych srodkaŭ uvohule stali bolš častymi i pilnymi. Najčaściej prosiać pakazać aptečku, vohnietušyciel, kamizelku sa śviatłoadbivalnymi elemientami.

• 5
• 1
• 2
• 5
• 1
• 0
• 0
• 0