Na biełaruska-litoŭskaj miažy hrupa mihrantaŭ vyjšła z tunela i napała na pamiežnikaŭ. U Litvie heta zamoŭčvali bolš za tydzień
U Łaździejskim rajonie Litvy kala miažy ź Biełaruśsiu hrupa nielehalnych mihrantaŭ napała na supracoŭnikaŭ Dziaržaŭnaj słužby achovy dziaržaŭnaj miažy Litvy (VSAT). Incydent adbyŭsia jašče 26 lipienia na terytoryi Kapčamiesckaj pamiežnaj zastavy, adnak pra jaho stała viadoma tolki ciapier, piša Delfi.lt.
Jak paviedamlajecca, pamiežniki vyjavili niezakonna kapany tunel i pačali zatrymlivać niekalkich čałaviek, jakija sprabavali praniknuć u Litvu. U hety momant z tunela vyjšła jašče kala 20 čałaviek, jakija, jak śćviardžajecca, napali na čatyroch pamiežnikaŭ, vykarystoŭvajučy pałki i kamiani.
Pra hety vypadak stała viadoma tolki praź niekalki dzion paśla zdareńnia, što vyklikała abureńnie ŭ litoŭskich uładaŭ. Deputatka rady Łaździejskaha rajona Vilma Danaŭskienie paviedamiła pra incydent u sacyjalnych sietkach i zapatrabavała tłumačeńniaŭ ad kiraŭnictva pamiežnaj słužby.
Pavodle jaje słoŭ, uźnikajuć pytańni, čamu čatyroch pamiežnikaŭ nakiravali suprać značna bolšaj hrupy ludziej, jakija mahli mieć pry sabie zbroju ŭ vyhladzie pałak i kamianioŭ.
Pamiežnaja słužba nie stała paćviardžać abo abviarhać usie detali, spasłaŭšysia na toje, što viadziecca dasudovaje rasśledavańnie. U pryvatnaści, nie paviedamlajecca, ci zdoleli mihranty trapić na terytoryju Litvy i ci byli siłavikami stračanyja padčas sutyknieńnia jakija-niebudź śpiecyjalnyja srodki, naprykład kajdanki.
Paśla taho jak infarmacyja stała publičnaj, premjer-ministr Litvy Mindaŭhas Sinkiavičus zajaviŭ, što ličyć nieprymalnym toje, što pra surjozny incydent stała viadoma tolki praz sacyjalnyja sietki. Jon paviedamiŭ, što pra zdareńnie ministr unutranych spraŭ Marcinas Kacialinas raskazaŭ jamu tolki paśla pasiadžeńnia ŭrada.
«Treba vyśvietlić, čamu pra padziei 26 lipienia my daviedvajemsia tolki ciapier, a taksama acanić dziejańni słužbovych asob. Spadziajusia, što jany vykanali svaje abaviazki, ale situacyja ź niepieradačaj infarmacyi vyklikaje pytańni», — skazaŭ premjer.
Ministr unutranych spraŭ Litvy raspačaŭ słužbovuju pravierku adnosna dziejańniaŭ kiraŭnictva pamiežnaj słužby. Jon zajaviŭ, što raniej atrymaŭ tolki ahulnuju infarmacyju pra spynieńnie budaŭnictva tunela, ale nie viedaŭ pra sutyknieńnie ź mihrantami.
Pavodle jaho słoŭ, kiraŭnik pamiežnaj słužby Rustam Lubajeŭ pryznaŭ, što adkaznaść za niedastatkovuju acenku važnaści incydentu i niepaviedamleńnie ministru lažyć na kiraŭnictvie słužby. Sam Lubajeŭ zajaviŭ, što budzie supracoŭničać z pravierkaj i pradastavić usiu nieabchodnuju infarmacyju. Jon adznačyŭ, što pamiežniki nie paciarpieli, a praryvu miažy nie adbyłosia.
Kiraŭnik pamiežnaj słužby taksama skazaŭ, što pieršapačatkovaja infarmacyja mahła być niapoŭnaj. Pavodle jaho viersii, mihranty nie vykonvali zakonnyja patrabavańni pamiežnikaŭ, paśla čaho mahli być vykarystanyja śpiecyjalnyja srodki.
Pavodle Słužby achovy dziaržaŭnaj miažy Litvy, u 2026 hodzie ŭžo zafiksavana 12 vypadkaŭ sprobaŭ trapić u Litvu praz padziemnyja chady.
Na miažy Biełarusi ź Litvoj znajšli patajemny tunel
«Značna bolš, čym zvyčajna». U Estonii zatrymali 32 mihrantaŭ, jakija prybyli praź Biełaruś i Łatviju
U Siejm Litvy ŭnieśli papraŭki pa mihrantach. Jak zaraz treba budzie zdavać ispyt pa litoŭskaj
Na biełaruska-litoŭskaj miažy vyjavili novy tunel. Ź jaho vyjšli 38 mihrantaŭ
Ciapier čytajuć
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu5
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary