Бацька дарадцы Ціханоўскай Дзяніса Кучынскага працуе ў кіраўніцтве выканкама? Не, гэта не так
Былы палітвязень і актывіст «Народнай грамады» Сяргей Спарыш заявіў, што бацька дарадцы Святланы Ціханоўскай працуе чыноўнікам і летась атрымаў грамату. Але памыліўся і ў першым, і ў другім.
Спарыш заявіў у фэйсбуку, што бацька Кучынскага «лукашэнкаўскі чыноўнік».
«Ён спакойна працуе ў Лідскім выканкаме на кіроўных пасадах, а ў 2025 нават атрымаў нейкую грамату», — напісаў Спарыш.
Ён апублікаваў таксама дакумент за 2021 год, дзе ад работнікаў патрабуюць адпісацца ад лідскіх незалежных тэлеграм-каналаў і далучыцца да афіцыйнага. Даць справаздачу пра выкананне трэба было Генадзю Кучынскаму.
Многія пад яго пастом абурыліся — калі і так, то сын за бацьку не адказвае.
За інфармацыю Спарыш падзякаваў Алесі Пархоменцы — беларускай актывістцы з Кіпра. Тая ў фэйсбуку таксама напісала пра бацьку Кучынскага:
«Ужо больш за 10 гадоў займае адну з кіроўных пасад у Лідскім аблвыканкаме — намеснік дырэктара ў сферы жыллёва-камунальнай гаспадаркі горада Ліда. (…) Больш за тое, ён працягвае займаць сваю пасаду і сёння — гэта пацвярджаецца афіцыйнымі крыніцамі».
Апусцім тое, што Ліда не абласны цэнтр, а таму такога аблвыканкама не існуе.
Дык кім працуе бацька Кучынскага? У выканкаме ён не працаваў, а быў галоўным механікам і намеснікам дырэктара ў гарадскім унітарным прадпрыемстве «Лідская ЖКГ». На пачатку 2024 года ён знікае з навін і рэсурсаў, датычных ЖКГ.
Пасля гэтага, калі меркаваць па сацсетках, Генадзь Кучынскі ўладкаваўся на працу ў Дарожна-эксплуатацыйнае ўпраўленне №55 на пасаду начальніка аддзела механізацыі і энергетыкі. Гэта арганізацыя, якая абслугоўвае дарогі, філіял «Гроднааўтадара». Але ўзнагароду Генадзь Кучынскі не атрымліваў — Спарыш пераблытаў узнагароду і віншаванне з 60‑гадовым юбілеем.
Дзяніс Кучынскі пракаментаваў інфармацыю пра свайго бацьку:
«Пасля 2020 года мая камунікацыя з сям'ёй, блізкімі і сябрамі ў Беларусі абмежаваная, на жаль, я мала ведаю дэталяў з жыцця блізкіх. Але раней бацька працаваў ўсё жыццё у ЖКГ механікам, у нейкі час, здаецца, галоўным механікам. Наколькі я ведаю, выканаўча-ідэалагічных афіцыйных пасадаў у яго не было. Гады два таму кантракт у ЖКГ не працягнулі».
Ці лічыцца Генадзь Кучынскі чыноўнікам? Не. Чыноўнік — гэта дзяржаўны службовец, а кіраўнік ці іншы супрацоўнік дзяржаўнага прадпрыемства не з'яўляецца дзяржаўным службоўцам. Гэта вынікае з закона № 175‑3 «Пра дзяржслужбу» і ўказа Лукашэнкі №195 «Пра дзяржаўныя грамадзянскія пасады».
У дзяржаўным сектары ў Беларусі працуе каля 39% работнікаў.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары