Apytańni pierad vybarami ŭ Kaardynacyjnuju radu pakazvajuć, što Łatuška zachavaŭ najvyšejšy davier hramadstva

Brud nie prystaŭ da namieśnika kiraŭnika Abjadnanaha pierachodnaha kabinieta Paŭła Łatuški, choć mienavita jon byŭ abjektam abstrełu ź ciažkaj «haŭnaartyleryi» prapahandy. Były ministr kultury, jaki pierajšoŭ na bok naroda ŭ 2020 hodzie, zastajecca adnoj z samych papularnych fihur apazicyi. 

Heta paćviardžajuć internet-apytanki ab papularnaści śpisaŭ na vybarach u Kaardynacyjnuju radu IV sklikańnia, jakija majuć adbycca z 11 da 17 maja 2026 hoda.

Niamnohija majuć śmiełaść hałasavać na vybarach u Kaardynacyjnuju radu va ŭmovach represij. Na minułych vybarach 2024 hoda hałasy praz elektronnuju płatformu addali 6700 čałaviek, niahledziačy na sproby prapahandy zdyskredytavać i zastrašyć. Tym nie mienš, ich prychilnaści dastatkova reprezientatyŭnyja dla prychilnikaŭ apazicyi.

U apytancy, stvoranaj vydańniem Reform.news 20 krasavika (pavodle nazirańniaŭ «Našaj Nivy», tam pakul nie fiksavałasia nakrutak, jakija robiacca zaŭvažnyja praz rezkija skački vynikaŭ), prychilnaści raźmierkavalisia nastupnym čynam:

Pavialičyć

Pa stanie na 14:58 za błok Paŭła Łatuški i ruchu «Za Svabodu» mieli namier prahałasavać kala 55% tych, chto vyznačyŭsia. Heta bolš, čym na vybarach 2024 hoda, dzie za jaho addali hałasy kala 35% vybarcaŭ.

Jaŭnaha kankurenta ŭ błoka Łatuški niama. Kala 9% nabiraje śpis «Vola», asnovu jakoha skłali dziejnyja i byłyja dobraachvotniki-kalinoŭcy. Kali 7% — u śpisa «Jeŭrapiejski vybar» na čale z Valeram Mackievičam, kiraŭnikom aparata Abjadnanaha pierachodnaha kabinieta, i śpisa «Chopić bajacca» błohierki Taćciany Martynavaj. 

Raniejšaja apytanka, zładžanaja Jeŭraradyjo, dała padobnyja vyniki. Praŭda, u joj u niejki momant hałasy byli padnakručanyja za błok «Zakon i pravaparadak».

Imavierna, hramadstva bačyć u Paŭłu Łatušku salidnuju postać, zdolnuju hodna reprezientavać biełarusaŭ. Naklopy režymu ž tolki ŭmacoŭvajuć davier da hetaha palityka.

Vyhladaje, što deziercirstva ci ahienturnaja dziejnaść Anžaliki Mielnikavaj, jakaja była prapanavanaja ŭ śpikierki Rady mienavita Łatuškam, nie paŭpłyvała na davier da jaho.

Śviatłana Cichanoŭskaja, jakaja raniej staviłasia da Kaardynacyjnaj rady davoli skieptyčna, usio ž zaklikała biełarusaŭ prahałasavać na vybarach u hety orhan. 

«Ludzi, jakija vyrašyli bałatavacca ŭ Kaardynacyjnuju radu, zrabili śviadomy vybar. Jany razumieli, z čym sutyknucca: cisk, pahrozy, ryzyki. I ŭsio roŭna jany vybrali bałatavacca. I heta vyklikaje ščyruju pavahu.

Biełaruś budujecca ŭ kožnym rašeńni, u kožnym vybary. I Kaardynacyjnaja rada budzie takoj, jakoj my jaje zrobim. Ciapier, na hetym etapie vybarčaj kampanii, asabliva važna nie śpiašacca, a ŭvažliva paznajomicca sa śpisami, ź ludźmi, jakija iduć u Kaardynacyjnuju radu, i sa źmiestam ich prahramaŭ. Bo śviadomy vybar pačynajecca z razumieńnia. Čym lepš my viedajem, za kaho i za što hałasujem, tym macniejšaj budzie našaja ahulnaja pazicyja. Mienavita siońnia čas čytać, paraŭnoŭvać, unikać u sutnaść i vyznačacca — kab naš hołas byŭ nie prosta hołasam, a adkaznym vybaram dla budučyni Biełarusi», — kaža Cichanoŭskaja.

Vybary ŭ KR IV sklikańnia projduć z 11 pa 17 maja, udzieł biaruć dzieviać błokaŭ sa 174 kandydatami.

U svaim videazvarocie demakratyčnaja lidarka padziakavała ŭsim, chto praciahvaje padtrymlivać Biełaruś, havaryć i dziejničać. Jana padkreślivaje, što źmieny pačynajucca z udziełu.

• 10
• 3
• 7
• 4
• 0
• 0
• 0
• 0