Budzie čarhovaja amnistyja

Pałata pradstaŭnikoŭ 4 červienia pryniała ŭ druhim čytańni zakonaprajekt ab amnistyi.

Jak paviedamiŭ kiraŭnik parłamienckaj kamisii pa nacyjanalnaj biaśpiecy Viktar Huminski, paśla pryniaćcia ŭ pieršym čytańni dakumient byŭ dapracavany z ulikam zaŭvah i prapanoŭ redakcyjna‑techničnaha i ŭdakładnialnaha charaktaru.

U pieršym čytańni zakonaprajekt «Ab amnistyi ŭ suviazi z 65‑hodździem Pieramohi ŭ Vialikaj Ajčynnaj vajnie 1941—1945 hadoŭ» byŭ pryniaty deputatami 6 maja.

Tady ministr unutranych spraŭ Anatol Kulašoŭ, vystupajučy ŭ parłamiencie, zajaviŭ, što zakonaprajekt raspracavany «ŭ metach realizacyi pryncypu humanizmu ŭ dačynieńni da asob, jakija stali na šlach vypraŭleńnia paśla ŭčynieńnia złačynstva, što nie ŭjaŭlaje vialikaj hramadskaj niebiaśpieki».

Ministr paviedamiŭ, što ŭ vyniku amnistyi mohuć być vyzvaleny: z papraŭčych ustanoŭ zakrytaha typu — amal 2.230 čałaviek, adkrytaha typu — pryblizna 900. Skaročany na hod termin adbyvańnia pakarańnia va ŭstanovach zakrytaha typu 9.300 asudžanym, va ŭstanovach adkrytaha typu — 1.100.

Zakonaprajekt praduhledžvaje vyzvaleńnie ad kryminalnaj adkaznaści i pakarańnia niepaŭnaletnich, ciažarnych žančyn, žančyn i adzinokich mužčyn, jakija majuć niepaŭnaletnich dziaciej, asob piensijonnaha ŭzrostu, invalidaŭ, chvorych na aktyŭnuju formu tubierkulozu, VIČ‑infikavanych, vieteranaŭ bajavych dziejańniaŭ, udzielnikaŭ likvidacyi nastupstvaŭ katastrofy na Čarnobylskaj AES, asob, jakija atrymali ranieńni pry vykanańni abaviazkaŭ u pieryjad prachodžańnia słužby, učynili złačynstvy, što nie adnosiacca da katehoryi ciažkich.

Ad pakarańnia ŭ vyhladzie aryštu, abmiežavańnia voli, nakiravańnia ŭ dyscyplinarnuju vajskovuju čaść, pazbaŭleńnia voli mohuć być vyzvaleny taksama inšyja katehoryi asob pry asudžeńni: za złačynstvy, jakija nie ŭjaŭlajuć vialikaj hramadskaj niebiaśpieki (da dvuch hadoŭ pazbaŭleńnia voli), a taksama pry asudžeńni da aryštu — niezaležna ad terminu adbytaha pakarańnia; za mienš ciažkija złačynstvy (da šaści hadoŭ pazbaŭleńnia voli) — pry adbyćci nie mienš jak adnoj čverci terminu pakarańnia.

Pry hetym asudžanyja, jakija ŭčynili inšyja katehoryi złačynstvaŭ i nie padlahajuć vyzvaleńniu ad dalejšaha adbyvańnia pakarańnia, vyzvalajucca ad nazvanych pakarańniaŭ častkova terminam na adzin hod.

Amnistyja nie raspaŭsiudžvajecca na asob, da jakich raniej prymianialisia amnistyja abo pamiłavańnie i jakija znoŭ učynili naŭmysnaje złačynstva, a taksama na tych, chto nie kampiensavaŭ pryčynieny złačynstvami ŭron (za vyklučeńniem nazvanaj «ilhotnaj» katehoryi asob), złosna parušaje ustanoŭleny paradak padčas adbyvańnia pakarańnia; pryznanych asabliva niebiaśpiečnymi recydyvistami; asudžanych da pažyćciovaha źniavoleńnia; jakim śmiarotnaja kara abo pažyćciovaje źniavoleńnie zamienieny inšym pakarańniem; abjaŭlenych u vyšuk u suviazi z uchileńniem ad adbyvańnia pakarańnia; tych, chto ŭčyniŭ zabojstva, zhvałtavańnie, razboj abo vymahalnictva z kvalifikavalnymi prykmietami, a taksama bandytyzm, teraryzm, złačynstvy suprać dziaržavy; jakija stvaryli złačynnuju arhanizacyju abo ŭdzielničali ŭ joj ci ŭčynili karupcyjnyja złačynstvy z karyślivaj zacikaŭlenaści; pryciahnutych da kryminalnaj adkaznaści za kiravańnie transpartnym srodkam u stanie apjanieńnia.

Pavodle źviestak MUS, paŭtornyja złačynstvy ŭčyniajuć ad 7 da 10% asob, vyzvalenych pa amnistyi.

Apošni raz amnistyja ŭ Biełarusi pravodziłasia ŭ 2009 hodzie i była prymierkavana da 65‑hodździa vyzvaleńnia krainy ad niamiecka‑fašysckich zachopnikaŭ.

• 0
• 0
• 0
• 0
• 0
• 0
• 0
• 0