Usio bolš jeŭrapiejskich biełych busłoŭ charčujucca na śmietnikach. Navukoŭcy zaniepakojenyja

Z adnaho boku, ptuški atrymlivajuć lohkadastupnuju ježu, chutčej nabirajuć vahu, traciać mienš sił na pošuk kormu i mohuć bolš paśpiachova vyhadoŭvać ptušaniat. Mienavita heta, na dumku daśledčykaŭ, mahło stać adnoj z pryčyn adnaŭleńnia papulacyi biełaha busła ŭ Jeŭropie paśla pieryjadu značnaha skaračeńnia jaho kolkaści.

Adnak navukoŭcy papiaredžvajuć, što pastajannaje charčavańnie na śmietnikach moža niehatyŭna ŭpłyvać na zdaroŭje ptušak. Raniej busły štohod pieralatali pamiž Jeŭropaj i Afrykaj, ale ciapier častka ź ich usio čaściej zastajecca bližej da miescaŭ, dzie jość lohki dostup da charčovych adkidaŭ. Na śmietnikach jany znachodziać reštki miasa, ryby, inšaj čałaviečaj ježy, a taksama nasiakomych, hryzunoŭ i čarviakoŭ. Pry hetym ptuški kantaktujuć z płastykam, škłom, drotam, ciažkimi mietałami i inšymi niebiaśpiečnymi rečyvami.

Daśledavańnie pravodziłasia na papulacyi biełych busłoŭ u Polščy. Navukoŭcy paraŭnali ptušak, jakija rehularna kormiacca na śmietnikach, z tymi, što praciahvajuć zdabyvać ježu ŭ naturalnym asiarodździ. Vyśvietliłasia, što busły sa śmietnikaŭ majuć bolšuju masu cieła i bolšyja zapasy enierhii. Dziakujučy tamu, što jany traciać mienš času na pošuk kormu, u ich zastajecca bolš sił na razmnažeńnie i dohlad za patomstvam. Asabliva časta jany naviedvajuć śmietniki ŭ siaredzinie siezona razmnažeńnia, kali ptušaniatam patrabujecca najbolš ježy.

Razam z tym daśledčyki vyjavili i tryvožnyja prykmiety. U ptušaniat, jakim było ŭsiaho kala tydnia, užo adznačalisia paškodžańni DNK, što moža być źviazana z charčavańniem baćkoŭ na śmietnikach. Heta śviedčyć, što zabrudžvalnyja rečyvy mohuć upłyvać na arhanizm busłoŭ užo na samych rańnich etapach raźvićcia.

Navukoŭcy taksama ličać, što pastajannaja najaŭnaść ježy na śmietnikach źmianiaje mihracyjnyja pavodziny busłoŭ. Na Pireniejskim paŭvostravie mnohija ptuški, jakija raniej abaviazkova adlatali na zimu ŭ Afryku, ciapier častkova abo całkam admovilisia ad dalokich pieralotaŭ. Hetamu spryjajuć jak bolš ciopły klimat, tak i mahčymaść kruhły hod znachodzić ježu kala śmietnikaŭ.

Śpiecyjalisty paraŭnoŭvajuć takoje charčavańnie z fastfudam dla čałavieka. Jano kałaryjnaje i lohkadastupnaje, ale nie zaŭsiody jakasnaje i biaśpiečnaje. Busły mohuć znachodzić na śmietnikach reštki miasa, ryby i inšych praduktaŭ, adnak razam ź imi atrymlivajuć i škodnyja rečyvy, jakija mohuć vyklikać chvaroby abo inšyja prablemy sa zdaroŭjem.

Pry hetym navukoŭcy adznačajuć, što poŭnaje zakryćcio adkrytych śmietnikaŭ taksama moža stvaryć novyja ciažkaści. Jeŭrapiejski Sajuz pastupova abmiažoŭvaje dostup dzikich žyvioł da palihonaŭ adkidaŭ, i heta moža paŭpłyvać na kolkaść busłoŭ, ich mihracyju i paśpiachovaść razmnažeńnia, bo častka papulacyi ŭžo prystasavałasia da takoha sposabu zdabyvańnia ježy.

Ekołahi ličać, što hetaje pytańnie patrabuje dalejšaha vyvučeńnia. Z adnaho boku, dostup da śmietnikaŭ moža škodzić zdaroŭju asobnych ptušak, a z druhoha — mienavita hetaja krynica ježy dapamahła mnohim papulacyjam adnavicca paśla značnaha źmianšeńnia ich kolkaści. Tamu daśledčyki zaklikajuć uvažliva aceńvać mahčymyja nastupstvy lubych źmianieńniaŭ u sistemie abychodžańnia z adkidami, kab nie naškodzić biełym busłam.

• 0
• 0
• 0
• 0
• 0
• 0
• 0
• 0