Sakretny płan NATA suprać Pucina: jak Zachad rychtujecca da abarony ad Rasii

U rasparadžeńni vydańnia Bild apynulisia słužbovyja dakumienty, jakija raskryvajuć detali maštabnaha płana pad kodavaj nazvaj «Eastern Flank Deterrence Initiative» (EFDI) — «Inicyjatyva pa strymlivańni na ŭschodnim fłanhu».

Jak śćviardžajecca, asnovaj novaj kancepcyi stanie bieśpierapynnaje nazirańnie za pieramiaščeńniem vojskaŭ pry dapamozie spadarožnikaŭ, bieśpiłotnikaŭ i inšych srodkaŭ raźviedki, u tym liku naziemnych robataŭ. Atrymanuju infarmacyju płanujecca apracoŭvać z vykarystańniem štučnaha intelektu, jaki budzie analizavać situacyju i dapamahać aceńvać mahčymyja dziejańni rasijskaha kamandavańnia.

Jašče adnym pryncypovym novaŭviadzieńniem stanie toje, što ŭsie danyja i analityčnyja spravazdačy buduć adnačasova dastupnyja ŭsim krainam-členam NATA. Heta dazvolić vajennamu kamandavańniu Aljansu apieratyŭna vyznačać, jakaja mienavita kraina ŭ kankretny momant vałodaje najlepšymi srodkami dla adbićcia pahrozy ad sistem radyjoelektronnaj baraćby i kibierapieracyj da roznych vidaŭ uzbrajeńnia.

U dakumientach vykarystoŭvajecca paniaćcie Kill Web («sietka paražeńnia»), jakoje apisvaje intehravanuju sistemu zboru raźviedvalnaj infarmacyi i naniasieńnia ŭdaru. Pryncyp jaje pracy sfarmulavany tak: «Ubačyć pieršymi. Pryniać rašeńnie pieršymi. Udaryć pieršymi».

U jakaści prykładu razhladajecca situacyja, kali bieśpiłotnik vyjaŭlaje pieramiaščeńnie rasijskaj tankavaj kałony ŭ bok terytoryi NATA. Paśla hetaha infarmacyja z roznych krynic — spadarožnikaŭ, radaraŭ i inšych datčykaŭ — abjadnoŭvajecca ŭ adzinuju karcinu, što dazvalaje chutka vybrać najbolš prydatny srodak paražeńnia, naprykład bieśpiłotnik, artyleryju abo reaktyŭnuju sistemu załpavaha ahniu.

Pradstaŭnik Armii ZŠA major Met Błuba (Matt Blubaugh) adznačyŭ, što novaja kancepcyja nie pavinna zamianić tanki, artyleryju, bajavuju avijacyju abo vajskoŭcaŭ. Pavodle jaho słoŭ, jaje zadača — pavysić efiektyŭnaść ich vykarystańnia, źbierahčy bajavy patencyjał i dać kamandziram bolš času dla pryniaćcia rašeńniaŭ.

Akramia «ličbavaha strymlivańnia», NATA płanuje ŭzmacnić techničnaje abstalavańnie ŭschodniaha fłanhu. Pavodle Bild, kancepcyja praduhledžvaje, što ŭ vypadku napadu pieršymi buduć dziejničać bieśpiłotnyja sistemy — drony, biezekipažnyja mašyny i naziemnyja robaty. Ich zadača — zatrymać prasoŭvańnie praciŭnika i asłabić jaho jašče da ŭstupleńnia ŭ boj padraździaleńniaŭ z tankami, avijacyjaj i asabovym składam.

Jak śćviardžaje vydańnie, u NATA raźličvajuć realizavać prajekt u najbližejšy čas i ličać, što takaja madel dapamoža pavysić efiektyŭnaść strymlivańnia i źnizić ryzyku mahčymaha napadu na krainy aljansu.

• 12
• 0
• 4
• 0
• 0
• 0
• 0
• 0