«Vy bačyli špalery ad zabudoŭščyka? Heta ž strašny son». Za što krytykujuć dziaržaŭny ramont u kvaterach dla čarhavikoŭ?
Kvatery, jakija budujuć dla tych, chto maje patrebu ŭ palapšeńni žyllovych umoŭ, zdajuć z abaviazkovym ramontam, a nie prosta z hołymi ścienami. Vyhladaje zručnym, ale zadavolenyja takim padychodam nie ŭsie.
Całkam admovicca ad dziaržaŭnaha ramontu niemahčyma
Žančyna, jakaja pabudavała takuju kvateru ŭ Baranavičach, paskardziłasia ŭ tredsach na hety abaviazkovy ramont.
«My robim ramont u novabudoŭli, i heta tryndziec. Ja ŭ šoku, i mianie ŭžo vanituje. Budavalisia my jak tyja, chto maje patrebu ŭ palapšeńni žyllovych umoŭ, i ŭ košt byŭ zakładzieny ramont. Košt ramontu — $7000.
My admovilisia ad jaho (ad bolšaj častki), ale hrošy nie viartajucca, prosta my zekanomili trochi času i hrošaj na demantažy», — apisvaje situacyju błohierka i dalej pa punktach pryvodzić asnoŭnyja pretenzii.
Naprykład, dziaŭčyna nie razumieje, navošta tak vysoka stavić ličylniki vady na kuchni i čamu ŭ domie mała razietak.
«A špalery! Vy bačyli špalery ad zabudoŭščyka — heta ž strašny son dyzajniera i navat nie dyzajniera. Ustanoŭka dźviarej bieź lištvaŭ», — pieraličvaje jana.
Bazavy minimum
Častka kamientataraŭ pryjšła da vysnovy, što kali čałaviek sapraŭdy ličycca tym, chto maje patrebu, to jon nie musić skardzicca na ramont. Maŭlaŭ, takija ludzi musiać być zadavolenyja samoj mahčymaściu pabudavać žytło na lhotnych umovach.
«Dyk vy kvateru atrymali jak tyja, chto maje patrebu, značyć, vam niama dzie žyć/ciesna ŭ ciapierašniaj žyłpłoščy i niama srodkaŭ, kab kupić samim. Vam nie zdajecca, što słovy «majuć patrebu» i «dyzajnierski» ramont dzieści na procilehłych kancach suśvietu?» — piša adzin z kamientataraŭ.
«Tam tema takaja, što kali čałaviek maje patrebu, to hetaha bazavaha minimumu pavinna chapić, a kali jość hrošy na ramont, to jakija vy tady tyja, chto maje patrebu», — ličyć inšy.
Błohierka ŭ adkaz tłumačyć, što mieć patrebu ŭ palapšeńni žyllovych umoŭ — nie aznačaje być žabrakom.
Znajšlisia i tyja, chto adrazu pierarablali ŭsio nanova pad siabie.
«Jość tyja, kamu treba choć takoje — chaj płaciać hetyja 7 tysiač i radujucca, pytańniaŭ niama. Kamuści heta nie treba, i atrymlivajecca prosta vykidvańnie hrošaj.
Navošta rabić toje, što vykinuć, kali možna nie rabić i nie marnavać hrošy», — zadajecca pytańniem žančyna, jakaja taksama nabyła kvateru ŭ adnym z rajonnych centraŭ z abaviazkovym azdableńniem.
«Usio toje ž samaje. Usio zroblena prosta pa prajekcie, a sami potym usio pierarablali pad siabie. Usie razietki i ŭsio astatniaje. Byli navat pytańni z voknami, vypraŭlali», — padzialiłasia dośviedam inšaja.
Niekatoryja adznačajuć, što taki padychod — heta bolš kłopat pra dziaržaŭnych vytvorcaŭ, čym pra pakupnikoŭ kvater.
«Azdableńnie ad zabudoŭščyka dla tych, chto maje patrebu — heta parazitavańnie padradčykaŭ i vytvorcaŭ materyjałaŭ na našych padatkach», — napisaŭ adzin z kamientataraŭ.
«Takija ramonty padtrymlivajuć padajučyja štany mnohich pradpryjemstvaŭ: unitaz «Kieramin» u kožny dom, plitu «Hiefiest», plitku biarozaŭskuju, homielskija špalery i hetak dalej», — ličyć inšy.
Jak vyhladaje hety ramont?
Kvater, jakija pradajucca ź dziaržaŭnym azdableńniem, niašmat, ale niekalki abjaŭ u Minsku dajuć davoli vyraznaje ŭjaŭleńnie pra toje, što tam robiać.
Tak vyhladaŭ ramont u adnoj z kvater, jakuju pradavali ŭ domie pa adrasie vulica Ubareviča, 98A. Šeryja špalery i šery łaminat. Razietki ŭ žyłym pakoi jość u kožnym kucie, ale ŭsie jany adzinarnyja.
Padłoha i špalery va ŭsich pakojach adnolkavyja. Na kuchni staić plita i čyhunny rukamyjnik.
Biełyja ścieny tolki ŭ vannym pakoi i tualecie. Na padłozie šeraja plitka, pryčym vielmi padobnaja da toj, što lažyć u padjeździe.
Jašče adna adnapakajoŭka niadaŭna pradavałasia ŭ domie dla čarhavikoŭ pa adrasie vulica Karvata, 3a.
U jej tyja samyja šeryja špalery, čyhunny rukamyjnik, elektraplita i šeraja padłoha, choć z krychu inšym adcieńniem.
A ŭ vannym pakoi i tualecie lažyć nie šeraja, a karyčnievaja plitka. Adpaviedna, takaja samaja lažyć i ŭ padjeździe.
50 adcieńniaŭ šeraha
Z padobnym azdableńniem ciapier pradajuć kvateru ŭ domie pa vulicy Ściapana Złobina, 16.
U interjerach usio tyja ž šeryja špalery ŭ pary z šerym łaminatam. I tak va ŭsich pamiaškańniach, aproč vannaha pakoja i tualeta.
Mižpakajovyja dźviery i furnitura taksama maksimalna biudžetnyja.
Na padłozie ŭ vannym pakoi i tualecie lažyć šeraja plitka. Staić rukamyjnik, vanna i tualet.
Aproč ludziej, jakija stajać u čarzie na palapšeńnie žyllovych umoŭ, kvatery z anałahičnym azdableńniem zvyčajna vydajuć tym, čyje damy byli źniesienyja.
Musić stać lepš?
Ale ŭsie hetyja kvatery na fota byli pabudavanyja jašče pa starych normach. Reč u tym, što z 1 lipienia 2026 hoda pačała dziejničać abnoŭlenaja instrukcyja Ministerstva budaŭnictva i architektury, jakaja musić prynieści z saboj bolš vysoki standart azdableńnia.
Voś što razumiejecca pad bolš vysokimi standartami: kali raniej u vannym pakoi i prybiralni ścieny byli afarbavanyja, a plitka była abaviazkovaj tolki na padłozie, to ciapier ścieny ŭ vannych pakojach i sanvuzłach pavinny być całkam ablicavanyja hłazuravanaj plitkaj.
Kali stary standart dazvalaŭ vykarystańnie linoleumu i doški, to ciapier pra linoleum možna zabyć. U žyłych pakojach dazvolena tolki parkietnaja doška abo łaminat. U kalidorach i kamorach — plitka ci łaminat. Na kuchni, u sanvuzłach, na bałkonach i ŭ tamburach — tolki plitka.
Aproč taho, u haradskich kvaterach na kuchni, u sanvuzłach i dapamožnych pamiaškańniach možna budzie rabić naciažnyja stoli zamiest afarbavanych.
Nakolki abnoŭleny standart paŭpłyvaje na kolkaść zadavolenych — pytańnie składanaje. Z ulikam taho, jaki padychod majuć zabudoŭščyki da vybaru materyjałaŭ, nielha vyklučać, što taja ž plitka na padłozie ŭ kuchni i na ścienach u vannym pakoi i tualecie tolki vykliča dadatkovyja vydadki dla jaje demantažu.
Ci možna adrazu pradavać takija kvatery?
Tak, u adroźnieńnie ad kvater ź ilhotnym kredytavańniem, na prodaž kvater, pabudavanych čarhavikami, niama nijakich abmiežavańniaŭ.
Kamientary