Izrail upieršyniu z sakavika atakavaŭ Siryju, abvinavaciŭšy Turcyju ŭ sprobie raźmiaścić vojski na avijabazie ŭ Idlibie

Izrail u aŭtorak nanios udary pa avijabazie ŭ siryjskaj pravincyi Idlib, paviedamlali siryjskija ŚMI. Urad Izraila faktyčna paćvierdziŭ ataku, jakaja vyklikała rezkaje asudžeńnie jak z boku Turcyi, tak i z boku amierykanskaha pasłańnika ŭ rehijonie, jaki nazvaŭ jaje «niepatrebnaj eskałacyjaj», piša Bi-bi-si.

Jak paviedamiŭ u aŭtorak siryjski dziaržaŭny telekanał Ekhbariya sa spasyłkaj na vajennuju krynicu, Izrail nanios vosiem avijaŭdaraŭ pa ŭźlotna-pasadačnaj pałasie i składskich pamiaškańniach na avijabazie Abu-ed-Duchur na paŭdniovym uschodzie pravincyi Idlib. Pavodle ahienctva Reuters, jašče adna vajennaja krynica i miascovy žychar zajavili, što paciarpiełych niama.

Heta pieršy ŭdar Izraila pa abjektach siryjskaha ŭrada z sakavika. MZS Turcyi asudziła ataku. «My zaklikajem mižnarodnuju supolnaść zaniać bolš rašučuju pazicyju, kab spynić eskałacyju ahresii Izraila suprać Siryi», — havaryłasia ŭ jaho zajavie.

Kancylaryja izrailskaha premjera Bińjamina Nietańjachu faktyčna paćvierdziła ataku, apublikavaŭšy pozna ŭviečary ŭ aŭtorak u sacyjalnaj sietcy X paviedamleńnie na anhlijskaj movie.

«Izrail i Siryja damovilisia pra status-kvo ŭ pytańniach biaśpieki, jaki apynuŭsia pad pahrozaj parušeńnia z boku Siryi praz dazvoł tureckim vojskam raźmiaścicca na avijabazie niedaloka ad Alepa, — havorycca ŭ zajavie. — Izrail nieadnarazova papiaredžvaŭ Siryju, što takoje raźmiaščeńnie vojskaŭ stvoryć pahrozu biaśpiecy Izraila. Siryja vyrašyła praihnaravać hetyja papiaredžańni».

«Izrail nie budzie mirycca z pahrozami svajoj biaśpiecy i vitaŭ by viartańnie da status-kvo», — paviedamiła kancylaryja Nietańjachu.

U zajavie MZS Turcyi nie ŭdakładniałasia, ci znachodzilisia jaje vojski na siryjskaj bazie. «Lehkadumnyja abvinavačańni, vyłučanyja kancylaryjaj premjer-ministra Izraila, nakiravanyja na lehitymizacyju niezakonnych avijaŭdaraŭ Izraila, jakija zamachvajucca na suvierenitet i terytaryjalnuju cełasnaść Siryi», — zajaviła Upraŭleńnie kamunikacyi Turcyi (cytata pavodle ahienctva Anadolu).

Tom Barak, pasoł ZŠA ŭ Turcyi i śpiecyjalny pasłańnik pa Siryi i Iraku, dniom u aŭtorak napisaŭ u X, što izrailskija avijaŭdary pa avijabazie Abu-ed-Duchur «ujaŭlajuć saboj niepatrebnuju eskałacyju, jakaja nie spryjaje rehijanalnaj stabilnaści». Pavodle jaho słoŭ, urad siryjskaha prezidenta Achmieda aš-Šaraa «nieadnarazova zajaŭlaŭ pra pieravahu deeskałacyi ŭ adnosinach ź Izrailem».

Amierykanski dypłamat taksama paviedamiŭ, što ZŠA pracujuć nad stvareńniem miechanizmu praduchileńnia kanfliktaŭ pamiž Izrailem, Turcyjaj i Siryjaj. Pavodle jaho słoŭ, Ankara nie była papiaredžana pra izrailskija ŭdary, «i, takim čynam, nazirała za samalotami, jakija nakiroŭvalisia na poŭnač u bok jaje terytoryi, i tamu całkam abhruntavana mahła padrychtavać ułasny adkaz [na ataku Izraila na siryjskuju bazu]».

«Na ščaście, chałodnaja hałava dazvoliła praduchilić dalejšaje paharšeńnie situacyi», — skazaŭ Barak u telefonnym intervju Reuters.

Ministr zamiežnych spraŭ Siryi Asaad Chasan aš-Šybani zaklikaŭ spynić ataki, zajaviŭšy, što Izrailu varta pierahledzieć svaju pazicyju ŭ dačynieńni da Siryi, pakolki jon supraćstaić nie tolki Damasku, ale i sajuźnikam Siryi, piša vydańnie.

«Hetyja ataki nie majuć apraŭdańnia z punktu hledžańnia biaśpieki, — zajaviŭ ministr na sumiesnaj pres-kanfierencyi z kiraŭnikom MAHATE Rafaelem Hrosi ŭ Damasku. — My i nadalej budziem prytrymlivacca dypłamatyčnaha šlachu, kab pierakanać Izrail admovicca ad hetaj palityki i prymusić jaho spynić ataki na Siryju».

Avijabaza Abu-ed-Duchur, raźmieščanaja prykładna za 70 km ad tureckaj miažy, z 2013 hoda nie vykarystoŭvajecca ŭ jakaści vajennaha aeradroma i niekalki razoŭ pierachodziła z ruk u ruki padčas 14‑hadovaj hramadzianskaj vajny.

Izrail nieadnarazova nanosiŭ udary pa siryjskich vojskach paśla źviaržeńnia prezidenta Bašara Asada ŭ 2024 hodzie, a taksama zachapiŭ terytoryi na paŭdniovym zachadzie krainy.

Metami atak byli ŭzbrajeńnie i vajennaja technika, a taksama ŭradavyja abjekty na poŭdni i ŭ centralnaj častcy krainy. Apošni raz Izrail atakavaŭ Siryju ŭ sakaviku.

Izrail z hłybokaj niedavierlivaściu stavicca da novych uładaŭ Siryi z-za ich isłamisckaha minułaha, niahledziačy na ciopłyja adnosiny prezidenta aš-Šaraa z Zachadam.

U toj ža čas aš-Šaraa ŭ lipieni zajaviŭ, što Damask imkniecca zaklučyć z uradam Izraila pahadnieńnie ab biaśpiecy.

Udary ŭ aŭtorak adbylisia paśla abvastreńnia napružanaści ŭ śfiery biaśpieki pamiž Izrailem i Turcyjaj i ŭzmacnieńnia ich rytoryki nakont Siryi. Ankara abvinavačvała Izrail u sprobach padarvać pazicyi novaj ułady. U pačatku žniŭnia kiraŭnik MZS Turcyi Chakan Fidan zaklikaŭ mižnarodnuju supolnaść akazać cisk na Izrail i prymusić jaho pavažać terytaryjalnuju cełasnaść Siryi.

Turcyja, jakaja maje druhuju pa kolkaści vojskaŭ armiju ŭ NATA i ŭ žniŭni padpisała damovu ab uzajemnaj abaronie z Pakistanam i Saudaŭskaj Aravijaj, stała adnym z hałoŭnych sajuźnikaŭ aš-Šaraa. Jana zajmajecca padrychtoŭkaj siryjskaj armii, dapamahaje adnaŭlać dziaržaŭnyja instytuty i infrastrukturu, a taksama akazvaje dypłamatyčnuju padtrymku.

U minułym hodzie Turcyja i Izrail užo anansavali stvareńnie kanała suviazi, jaki dapamoh by paźbiahać incydentaŭ u Siryi, dzie dziejničajuć uzbrojenyja siły abiedźviuch krain.

• 0
• 0
• 0
• 0
• 0
• 0
• 0
• 0