Pad Mścisłavam, mahčyma, užo pačali rychtavać placoŭku pad radyjeaktyŭny mohilnik
Redakcyja vydańnia «Fłahštok» atrymała paviedamleńnie pra toje, što na adnoj ź placovak, jakija razhladajucca dla budaŭnictva punkta zachavańnia radyjoaktyŭnych adchodaŭ (PZRA), užo pačalisia budaŭničyja raboty. Infarmacyja tyčyłasia placoŭki, raźmieščanaj u Mścisłaŭskim rajonie Mahiloŭskaj vobłaści: nibyta tam pačali raboty pa stvareńni katłavana dla PZRA.
Dla pravierki ŭsich troch placovak «Fłahštok» skarystaŭsia servisam kaśmičnych zdymkaŭ Sentinel i paraŭnaŭ, jak na praciahu apošniaha hoda źmianilisia anansavanyja miescy zabudovy i ich vakolicy.
Chojnicki rajon (basiejn Prypiaci). Placoŭka kala vioski Navasiołki za hod zaznała najmienšyja źmieny. Na praciahu hetaha pieryjadu byli vyrazanyja čatyry kvadraty sumarnaj płoščaj 12 ha ŭ lasnym masivie. Tolki adzin ź ich adnosiŭsia da plamy mierkavanaj zabudovy PZRA. Vyrubki vyhladajuć jak zvyčajnaja dziejnaść lashasa.
Astraviecki rajon (basiejn Vilii). Placoŭka taksama zaznała źmieny. Niepasredna na plamie mahčymaj zabudovy byŭ vysiečany kvadrat lesu płoščaj 4 ha, na zachad pa-za plamaj zabudovy zaŭvažnyja ziemlanyja raboty abo miesca składavańnia na płoščy 1 ha. Terytoryja znachodzicca kala najaŭnaha časovaha miesca zachoŭvańnia piasku. Najaŭnyja zdymki nie dazvalajuć zrabić vysnovu pra charaktar rabot.
Mścisłaŭski rajon (basiejn Soža). Maje najbolšuju kolkaść źmien. Pieršyja raboty pačalisia jašče ŭ vieraśni 2025 hoda, najbolš zaŭvažnymi jany stali ŭ pačatku leta 2026-ha. Apošnija abnaŭleńni spadarožnikavych zdymkaŭ pakazvajuć, što raboty praciahvajucca.
Na terytoryi, jakaja razhladajecca dla budaŭnictva PZRA, była ačyščana ad raślinnaści i zasypanaja kiłamietrovaja bałka ručaja. Terytoryja na poŭnač była całkam rasčyščanyja ad raślinnaści i, vierahodna, ad uradlivaha płasta ziamli na ŭčastku 3,4 kvadratnaha kiłamietra. na terytoryi na paŭnočny zachad praviedziena vydaleńnie raślinnaści i, vierahodna, častkovaje nivieliravańnie sufazijnych pravalin (jam).
Byvučeńnie hieałohii daje mahčymaść zrazumieć, što mienavita bačna na kaśmičnych zdymkach. Heta biesprecedentnyja pa maštabie raboty pa vyroŭnivańni pavierchni ziamli. Zasypajucca piaskom jary, utvoranyja ručajami, i šmatlikija łakalnyja sufazijnyja pravaliny.
Rastłumačyć takija maštabnyja i darahija ziemlanyja raboty na terytoryi bolš za try kvadratnyja kiłamietry niemahčyma patrebami sielskaj haspadarki i tak zvanym uklučeńniem u abarot ziemlaŭ, jakija nie vykarystoŭvajucca. Znaści prykład takich rabot na «sufazijnych» ziemlach nie ŭdałosia. Adpaviednyja dziaržzakupki ŭ Mścisłaŭskim rajonie nie pravodzilisia.
Karespandentu «Fłahštoka» ŭdałosia dazvanicca pa numary telefona staršyni Chodasaŭskaha sielsavieta i pad vyhladam zaniepakojenaha hramadzianina źviarnucca z pytańniem, što źbirajucca budavać kala vioski Chodasy. Adkazam była kinutaja słuchaŭka.
Jašče adnym namiokam u bok Mścisłaŭskaj placoŭki stała blizkaja adpaviednaść prapanavanaha abaznačeńnia rajona budaŭnictva PZRA apublikavanaj schiemie abjekta. Płošča zabudovy mohilnika sa Spravazdačy ab uździejańni na navakolnaje asiarodździe (SUNA) składaje 0,38 kvadratnaha kiłamietra i ŭjaŭlaje saboj pramavuholnik sa skošanym vuhłom. Na schiemach «Mścisłaŭskaja» placoŭka zajmaje 0,56 kv. km, a «Astravieckaja» — 0,90 kv. km i «Chojnickaja» — 4,02 kv. km.
Tłumačeńniem kałasalnych kapitałaŭkładańniaŭ moža źjaŭlacca toje, što terytoryju ŭžo na praciahu hoda rychtujuć dla budaŭnictva PZRA. Pry hetym dźvie inšyja placoŭki ŭ Chojnickim i Astravieckim rajonach źjaŭlajucca fiktyŭnymi i surjozna nie razhladajucca, a hramadskija abmierkavańni i ekałahičnaja ekśpiertyza stali farmalnymi rytuałami.
Čynoŭnik patłumačyŭ, čamu nielha rabić jadzierny mohilnik u Astravieckim rajonie
Pradpryjemstva pa abychodžańni z radyjeaktyŭnymi adkidami schavała strukturu i štat paśla prychodu dyrektara z KDB
Handlary adzieńniem, supracoŭniki ahraservisu i KDB. Chto pracuje ŭ arhanizacyi, adkaznaj za jadzierny mohilnik u Biełarusi?
Bolš za 70% ludziej u Astraŭcy nie suprać, kab u ich zrabili mohilnik radyjeaktyŭnych adkidaŭ — dziaržaŭnyja apytańni
Stała viadoma, jak budzie vyhladać mohilnik dla radyjeaktyŭnych adkidaŭ u Biełarusi
Kamientary
Vyhladaje niepavahaj da vašych ža kaleh :(