U Barsiełonie akcyi pratestu zaviaršylisia sutyknieńniami z palicyjaj i rabavańniami
Sutyknieńni pačalisia paśla zaviaršeńnia asnoŭnych akcyj pratestu, prymierkavanych da pieršaj za 14 hadoŭ usieahulnaj zabastoŭki. Na vulicy Barsiełony vyjšła bolš za 50 tysiač čałaviek, a paśla asnoŭnaj demanstracyi ludzi ŭ maskach stali padpalvać śmiećcievyja baki i raźbivać vitryny kram, piša Bi-bi-si.
Asnoŭny maršrut demanstracyj prachodziŭ praz Pasiea-de-Hrasija, hałoŭny praśpiekt Barsiełony. Dniom tam syšlisia pratestoŭcy, z roznych kałon. Jak adznačaje vydańnie El País, marš prajšoŭ chutčej u śviatočnaj atmaśfiery. Pavodle acenak palicyi Barsiełony, u im uziali ŭdzieł 55 tys. čałaviek; u prafsajuzaŭ inšyja, značna bolš unušalnyja ličby — 400 tys. udzielnikaŭ.
Nahodaj dla zabastoŭki staŭ zaciažny žyllovy kryzis u Ispanii. Pratesty sumiesna padtrymali dva najbujniejšyja prafsajuzy Ispanii UGT i CCOO, a taksama inšyja prafsajuznyja arhanizacyi i asacyjacyi arandataraŭ, aburanyja rostam arendnaj płaty i vysialeńniami.
Pavodle źviestak centralnaha banka, u Ispanii nazirajecca deficyt prykładna 750 tys. damoŭ. Jak čakajecca, da 2028 hoda ŭ krainie budzie nie chapać bolš za miljon damoŭ.
Paśla aficyjnaha zakančeńnia zabastoŭki hrupa ludziej raźbiła vitryny kram uzdoŭž Pasiea-de-Hrasija, razrabavała niekatoryja ź ich i padpaliła kramy.
Bolš za inšych paciarpieła krama cacak Lego, fasad jakoj byŭ paškodžany. Taksama byli zaŭvažany pratestoŭcy, jakija sprabavali praniknuć u kramu Apple, paviedamlajuć karespandenty Bi-bi-si.
Na vulicy byli padpaleny dziasiatki śmiećcievych kantejnieraŭ, adbylisia sutyknieńni z palicyjaj.
Karespandent Bi-bi-si pahutaryŭ z udzielnicaj pratestaŭ u Barsiełonie: pavodle jaje słoŭ, u cełym akcyja prachodziła vielmi mirna i navat «radasna». Žančyna raskazała, što pryjšła vykazać pratest suprać vysokich cen na žyllo, dadaŭšy, što «tam było šmat dziaciej i pažyłych ludziej».
Uviečary jana znachodziłasia ŭ rajonie bulvara Rambła i bačyła na vulicach vohniščy. «Ahoń byŭ paŭsiul, abstanoŭka była vielmi napružanaj», — raskazała jana.
Prezident Ženieralitata Katałonii (vyšejšaha orhana kiravańnia aŭtanomii) Salvador Ilja asudziŭ biesparadki. «Ni hvałt, ni vandalizm nie adlustroŭvajuć pazicyju ludziej, jakija mirna demanstravali na praciahu ŭsiaho dnia. U Katałonii tyja, chto ździajśniaje złačynstvy, zapłaciać za heta», — napisaŭ Salvador Ilja ŭ sacsietcy X.
Pavodle źviestak mera Barsiełony Žaŭme Kalboni, palicyja Katałonii aryštavała 50 čałaviek u suviazi ź incydentami. Jon taksama abviaściŭ, što haradski saviet dałučycca da sudovaha razboru z nahody pryčynienaj škody.
Ahulnanacyjanalnaja zabastoŭka stała vynikam niekalkich tydniaŭ akcyj pratestu, vyklikanych vysialeńniem i nastupnaj śmierciu 87‑hadovaj žančyny ŭ Madrydzie.
U kastryčniku parłamient Ispanii adchiliŭ uradavy dekret, nakiravany na toje, kab strymać kolkaść vysialeńniaŭ za niavypłatu i abmiežavać niastrymny rost koštu arendy žylla. Naroŭni z praciahłymi pratestami heta vymusiła premjer-ministra Piedra Sančesa pryznačyć daterminovyja vybary na 29 listapada.
Sacyjalisty na čale ź Piedra Sančesam padtrymali akcyi pratestu, a vinu za žyllovy kryzis uskłali na pravuju apazicyju.
Kamientary