Biełorusskij siłovik: Uzmacniajecca tendencyja da zakančeńnia «SVA»
Telehram-kanał, stvorany łukašenkaŭcami, pieraličvaje prykmiety taho, što Rasija rychtujecca zharnuć vajnu.
«Užo peŭny čas uzmacniajecca tendencyja da zakančeńnia SVA, — piša telehram-kanał «Biełorusskij siłovik», eŭfiemizm «SVA» jany na ŭzor rasijan vykarystoŭvajuć dla nazyvańnia vajny suprać Ukrainy. — Šmat chto z maich padpisčykaŭ [z Rasii] z roznych śfier užo praciahły čas dasyłaje infarmacyju pra toje, što paŭsiudna idzie «vykreślivańnie» zhadak pra SVA z štodzionnaha žyćcia. Vy možacie prosta panazirać za hetym najbližejšym časam paśla pračytańnia dopisu.
Niedaŭna ja dobra-taki paśmiajaŭsia, kali adzin siabroŭski admin, jaki raźmiaščaje rekłamnyja intehracyi vialikich rasijskich karparacyj, dasłaŭ vialiki śpis słoŭ, jakija nie musiać publikavacca ŭ kanale, kab heta rekłamnaja intehracyja vyjšła. Siarod hetych słoŭ było ŭsio, što źviazana z vajnoj, i, na moj ździŭ, navat zhadka rasijskaha lidara.
Biźnies zaŭsiody zadaje trendy raniej, čym jany stanoviacca vidavočnymi», — padsumoŭvaje kanał.
Rasśledavańnie «Našaj Nivy» vyjaviła, što za kanałam «Biełorusskij siłovik» staić aficer Ministerstva ŭnutranych spraŭ Biełarusi Artur Hajko. Rytoryka kanała zaŭsiody była ahresiŭnaj, z prasłaŭleńniem vajny i represij i raspalvańniem nianaviści da Ukrainy i demakratyi.
«Usie vakoł, viadoma ž, chočuć miru. Ja ŭ tym liku. Užo i nie paličyć, kolki ludziej, jakim ja dapamahaŭ praz svoj kanał, bolš mnie nikoli nie adkažuć. Pytańnie tolki ŭ tym, jakim koštam budzie dasiahnuty hety mir», — dvuchsensoŭna piša aŭtar kanała.
Heta pračytvajecca dvaista: abo jak škadavańnie pra tyja sotni tysiač rasijskich siłavikoŭ, jakija stali achviarami impierskich ambicyj, abo jak krytyku hatoŭnaści Maskvy skončyć vajnu, tak i nie dabiŭšysia jaje metaŭ. Abo i toje, i toje.
Rost strat rasijskaj armii pryvioŭ da spynieńnia rasijskaha nastupu. U 2025 hodzie Rasija akupavała mienš za 1% terytoryi Ukrainy koštam straty prykładna 150 tysiač vajskoŭcaŭ zabitymi. Za 10 miesiacaŭ 2026 hoda Rasija zaniała kala 0,1% terytoryi, prytym što straty pieravyšajuć minułahodnija. Taki košt prasoŭvańnia moža być nieprymalny navat dla abiasčałaviečanaha rasijskaha hramadstva.
Dvaistaja rytoryka prezidenta ZŠA Donalda Trampa sparadžała ŭ Kramla nadziei, što jamu ŭdasca spakusić Vašynhton na padzieł Jeŭropy na śfieru ŭpłyvu ŭzamien za dopusk amierykanskich karparacyj da raspracoŭki rasijskich pryrodnych resursaŭ. Napad ZŠA i Izraila na Iran pryvioŭ da skačka cenaŭ na enierhanośbity, jaki nie tolki prynios zvyšprybytki amierykanskim naftahazavym kampanijam, ale i napoŭniŭ rasijski vajenny biudžet. Adnak dapamoha krain Jeŭropy kampiensavała Ukrainy stratu amierykanskaj padtrymki, ukrainskaja armija vystajała. A pravał trampistaŭ na vybarach u Kanhres kančatkova pastaviŭ pad sumnieŭ spadziavańni Kramla.
Pakazalna, što novy raŭnd pieramovaŭ pa Ukrainie Maskva i Vašynhton adkładali na paśla vybaraŭ u Kanhres.
Za tydzień pierad pieramovami Ukraina naniesła ŭdary pa siami naftapierapracoŭčych kompleksaŭ Rasii, vyvieŭšy z ładu da 30 pracentaŭ mahutnaściej. U vyniku z paniadziełka 9 listapada «Rasnafta» ŭviała abmiežavańni na prodaž paliva na ŭsich zapraŭkach Rasii.
Na pieramovach u Abu-Dabi ŭpieršyniu prysutničaŭ kamandujučy siłami NATO ŭ Jeŭropie hienierał Aleksus Hrynkievič — prykmieta taho, što Maskva pajšła na bolš pradmietnyja razmovy. Na pieramovy ŭpieršyniu prybyła i jeŭrapiejskaja delehacyja, ź jakoj kaardynuje svaje dziejańni ŭkrainski bok.
Kamientary