Pryhody biełarusa ŭ Aŭstryi: aryštavali za kradziažy ŭ składzie bandy, spačatku ličyli palakam, a paśla ledź nie vysłali ŭ Biełaruś
Chłopiec spasłaŭsia na ŭdzieł u pratestach i ŭcioki ad vojska — i ŭsia pracedura spyniłasia.
Historyja pačałasia ŭ sakaviku 2026 hoda. Tady ŭ aŭstryjskaje Fiederalnaje viedamstva pa spravach inšaziemcaŭ i prytułku (BFA) pastupiła vynikovaja spravazdača palicyi. Pavodle jaje, biełarus padazravaŭsia ŭ kradziažach, jakija jon ździajśniaŭ rehularna ŭ składzie złačynnaj hrupy. U spravazdačy jaho zapisali hramadzianinam Polščy.
Paźniej mužčynu ekstradziravali ŭ Aŭstryju ź Ispanii pa jeŭrapiejskim ordary na aryšt. Dastavili samalotam i adrazu ŭziali pad vartu. Palicyja, mihracyjnaje viedamstva i turma ŭ svaich dakumientach ukazvali jaho sapraŭdnaje imia, ale hramadzianstva ŭsiudy pisali polskaje. Sud, jaki aryštavaŭ mužčynu, taksama ličyŭ jaho palakam.
Biełarusa asudzili za ciažki kradziež, učynieny dziela zarobku. Častku epizodaŭ kvalifikavali jak zamach. Jon atrymaŭ 15 miesiacaŭ pazbaŭleńnia voli, ź ich 10 miesiacaŭ umoŭna z vyprabavalnym terminam try hady.
Urešcie advakat biełarusa paviedamiŭ BFA, što jaho klijent — hramadzianin Biełarusi, a nie Polščy. Pavodle advakata, u Polščy ŭ mužčyny jość dazvoł na žycharstva, jaki dziejničaje da kanca listapada 2026 hoda, i paśla vyzvaleńnia jon sam źjedzie z Aŭstryi. Advakat prasiŭ nie departavać jaho.
Viedamstva vyrašyła apytać biełarusa.
Toj adkazaŭ, što ŭdzielničaŭ u pratestach suprać režymu i nie źjaviŭsia pa paviestcy ŭ vojska. Paśla hetaha jon źjechaŭ u Polšču, atrymaŭ tam humanitarnuju vizu, a ŭ 2023 hodzie — dazvoł na žycharstva pa humanitarnych padstavach. Jašče da zakančeńnia polskaha dakumienta jon padaŭ zajavu na dazvoł na žycharstva ŭ Ispanii. Tam, pa jaho słovach, rašeńnie pryniali stanoŭčaje, zastałosia tolki zabrać kartu, ale pieraškodziŭ aryšt pa aŭstryjskim ordery. Mužčyna zajaviŭ, što paśla vyzvaleńnia źbirajecca viarnucca ŭ Ispaniju. Jon prasiŭ dazvołu vykazacca nakont kankretnaj krainy, kudy jaho źbirajucca vysłać, bo, pa jaho słovach, vialikaja roźnica, heta Ispanija, Polšča abo Biełaruś.
Viedamstva nie stała praviarać arhumienty i vyrašyła vysłać jaho ŭ Biełaruś, a taksama zabaranić jamu ŭjezd u Aŭstryju na piać hadoŭ. Pra niebiaśpieku na radzimie čynoŭniki napisali adzin skaz: padstaŭ, jakija b pieraškadžali departacyi, nie vyjaŭlena. Pry hetym u tym ža rašeńni jany sami adznačyli, što ŭmovy ŭ biełaruskich turmach «ciažkija i niebiaśpiečnyja dla žyćcia».
13 kastryčnika Fiederalny administracyjny sud Aŭstryi admianiŭ hetaje rašeńnie i viarnuŭ spravu ŭ viedamstva na novy razhlad. Sudździa ŭkazaŭ, što čynoŭniki nie vyśvietlili navat, ci vierać jany słovam biełarusa pra pratesty i pryzyŭ, «tym bolš što doŭhi čas navat mierkavałasia, što jon hramadzianin Polščy».
Sam biełarus tym časam vyjšaŭ na volu i ŭžo źjechaŭ z Aŭstryi ŭ Ispaniju, adkul, pavodle jaho jurystaŭ, źbirajecca ŭ Polšču.
Kamientary