«Pahoniu» na kamianicy XVIII stahodździa ŭ centry Mahilova zamalavali pa ŭkazańni rasijskich dypłamataŭ
«Moža, tam budzie niešta novaje…»
Jak raspaviali na pradpryjemstvie «Prajekt-servis», prybrać murał z «Pahoniaj» na kamianicy XVIII stahodździa ŭ centry Mahilova vyrašyŭ zakazčyk. Im vystupaje konsulskaje adździaleńnie pasolstva Rasijskaj Fiederacyi.
Mienavita rasijskija dypłamaty i raźmieściacca ŭ budynku na Leninskaj, 5a, tarec jakoha jašče niadaŭna ŭpryhožvaŭ mastacki rośpis z histaryčnym hierbam horada. Ciapier ža jon zamalavany, niahledziačy na papiaredniuju zabaronu ekśpiertyzy.
Murał z panaramaj horada pavodle hraviury 1702 hoda i aficyjnym hierbam Mahilova, u centry jakoha nad haradskoj bramaj raźmieščany vieršnik ź miačom (staražytny hierb «Pahonia»), upryhožvaŭ tarec dvuchpaviarchovaj kamianicy ciaham dzieviaci hadoŭ. Da 750‑hodździa Mahilova jaho ŭ 2017‑m stvaryŭ mastak Ryhor Šarajeŭ.
Jak my pisali raniej, zaćvierdžany prajekt rekanstrukcyi budynka praduhledžvaŭ uciapleńnie vonkavych ścien minierałavatnymi plitami, adnak dziaržaŭnaja ekśpiertyza zabaraniła zašyvać uciaplalnikam i zafarboŭvać tarec kamianicy, zapatrabavaŭšy zachavać murał. Ciapier stała viadoma, što patrabavańni ekśpiertaŭ byli praihnaravanyja na finalnym etapie ramontu pa voli zakazčyka.
«Murał chacieli zachavać pieršapačatkova. Ale potym zakazčyk vyrašyŭ jaho prybrać. Moža, jon paśla adnović? A moža, tam budzie niešta novaje…», — prakamientavali ŭ «Prajekt-servisie», jaki, zhodna z pašpartam abjekta, adkazny za kapitalny ramont budynka na Leninskaj, 5a.
Pieršapačatkovyja namiery zachavać murał paćvierdzili nam i ŭ vykankamie.
Udakładnić dalejšyja płany na tarec kamianicy ŭ ludziej, jakija buduć tam zasiadać, pakul nie vyjšła — ramont nie skončany, tamu mahiloŭskaje adździaleńnie pasolstva Rasijskaj Fiederacyi jašče nie maje ŭłasnaha słužbovaha pamiaškańnia. Zhodna z pašpartam abjekta, ramontnyja pracy musiać zaviaršycca ŭžo 14 listapada.
Nahadajem, kamianicu za ratušaj raniej płanavali vykarystać dla pašyreńnia Muzieja historyi Mahilova, ale ŭ mai 2026 hoda jaje pieradali pad adździaleńnie pasolstva Rasii, vydzieliŭšy na ramont kala 613 tysiač rubloŭ z haradskoha biudžetu. Rasija praciahvaje pašyrać svaju dypłamatyčnuju prysutnaść u biełaruskich rehijonach: novyja rasijskija adździaleńni taksama rychtujucca da adkryćcia ŭ Homieli i Viciebsku.
Kiravać dypłamatyčnym ofisam u Mahilovie pryznačyli byłoha «ministra zamiežnych spraŭ» niepryznanaj ŁNR Uładzisłava Dajnehu.
Kamientary