«Pakul nie ŭ tych kolkaściach, ale treba ž z čahości pačynać»

U Biełarusi i Hruzii vielizarny patencyjał dla supracoŭnictva ŭ roznych halinach, u tym liku palitycy, ekanomicy i kultury, zajaviŭ hruzinski pasoł Hieorhij Čchieidze, jaki 28—29 vieraśnia naviedvaje z rabočym vizitam Mahiloŭskuju vobłaść.

Pavodle jaho słoŭ, dla raźvićcia biełaruska-hruzinskich ekanamičnych adnosinaŭ hety hod staŭ znakavym. «U nas adbyłosia pieršaje pasiadžeńnie biełaruska-hruzinskaj kamisii pa handlova-ekanamičnym supracoŭnictvie ŭ Batumi ŭ lipieni. Pasiadžeńnie było vielmi cikavym, pakolki ŭ im uziali ŭdzieł nie tolki viedamstvy, ale i pradstaŭniki biźniesu», — skazaŭ Čchieidze.

«Vy bačycie, što ŭ Biełarusi pradstaŭlena naša pradukcyja, biełaruskaja pradukcyja taksama pradstaŭlena ŭ Hruzii. Moža być, pakul nie ŭ tych kolkaściach, ale treba ž z čahości pačynać. U paraŭnańni z papiarednim pieryjadam nazirajecca tendencyja rostu», — adznačyŭ pasoł.

Havoračy ab palityčnym dyjałohu dźviuch krain, jon padkreśliŭ, što «lubaja palityka vyznačajecca kankretnymi spravami, kankretnymi dziejańniami». «Hałoŭny vynik — heta naša supracoŭnictva, supracoŭnictva va ŭsich śfierach — heta kultura, ekanomika, navuka, adukacyja», — skazaŭ dypłamat.

Pry hetym Čchieidze faktyčna ŭchiliŭsia ad adkazu na pytańnie, ci źmianiłasia b staŭleńnie hruzinskaha boku da Biełarusi, kali b taja, pazicyjanujučy siabie hałoŭnaj sajuźnicaj Rasii, pryznała niezaležnaść Abchazii i Paŭdniovaj Asiecii.

«Budziem žyć, pracavać, kantaktavać i budavać sumiesnuju budučyniu», — skazaŭ jon.

Havoračy ab supracoŭnictvie ŭ śfiery kultury, pasoł paviedamiŭ, što ŭ 2010 hodzie kalektyvy Biełarusi i Hruzii ŭziali ŭdzieł u sumiesnych tvorčych prajektach. Tak, pad patranažam prezidenta Hruzii ŭ Biełarusi vystupaŭ hruzinski nacyjanalny balet. «Taksama my nakiravali zaprašeńni i spadziajemsia, što da kanca hoda teatralnyja kalektyvy, muzyčnyja kalektyvy ź Biełarusi pabyvajuć u Hruzii i voźmuć udzieł u roznych fiestyvalach», — adznačyŭ Hieorhij Čchieidze.

U Mahilovie dypłamat uziaŭ udzieł u mižnarodnym fiestyvali animacyjnych filmaŭ «Animajoŭka-2010». Vystupajučy pierad hledačami, jon padziakavaŭ arhanizataram za mahčymaść pradstavić hruzinskija filmy na sud žury i publiki. Pavodle słoŭ pasła, u fiestyvali voźmuć udzieł šeść filmaŭ, źniatych hruzinskimi animatarami.

29 vieraśnia zapłanavana sustreča Hieorhija Čchieidze sa staršynioj Mahiloŭskaha abłvykankama Piatrom Rudnikam. «Razmova pojdzie ab vielmi pryziemlenych rečach, — raskazaŭ pasoł. — Jak nam raźvivać dalejšaje ekanamičnaje supracoŭnictva. Vialiki patencyjał schavany ŭ rehijanalnym supracoŭnictvie». Pavodle słoŭ dypłamata, nie buduć abydzieny ŭvahaj pytańni ŭzajemadziejańnia ŭ śfiery kultury i ŭ humanitarnych prajektach.

• 0
• 0
• 0
• 0
• 0
• 0
• 0
• 0