Siońnia sud razhledzić pazoŭ hazety «Znamia Junosti» da jaje byłoha karespandenta pa Bieraści Alesia Leŭčuka.Hazeta patrabuje, kab žurnalist napisaŭ abviaržeńnie apublikavanaj na sajcie Radyjo Svaboda i ŭłasnym błohu infarmacyi pra svajo zvalnieńnie.
Aleś Laŭčuk kaža, što redakcyja patrabavała, kab jon napisaŭ artykuł, u jakim asudziŭ padziei na Płoščy 19 śniežnia. Toje ž tyčyłasia i materyjałaŭ pra alternatyŭnych kandydataŭ. Jon admoviŭsia pisać padobnyja teksty, a paźniej ad redakcyi pryjšoŭ list z prapanovaj zvolnicca pa asabistamu žadańniu. Paśla taho, jak jon ahučyŭ u niedziaržaŭnych ŚMI niekatoryja akaličnaści zvalnieńnia z redakcyi, «Znamia Junosti» nakiravała pozvu ŭ sud.
Iryna Słabodzič, namieśnica hałoŭnaha redaktara hazety «Znamia Junosti» kaža, što na sudzie ad hazety budzie tolki juryst, ad kamentaroŭ namieśnica redaktara admoviłasia:
«Ja nie budu kamentavać akaličnaści spravy, naša pozva znachodzicca ŭ sudzie Maskoŭskaha rajonu Bieraścia. Usie našy pretenzii buduć ahučanyja padčas sudovaha pasiedžańnia i ŭsie kamentary buduć paźniej.Usio budzie ŭ miežach zakonu. Asabistaje mierkavańnie tut nie varta zaraz ahučvać. Davajcie dačakajemsia taho, što vyrašyć sud».
Aleś Laŭčuk ličyć, što pryčyna jaho zvalnieńnia palityčna matyvavanaja:
«Ja admoviŭsia pisać stanoŭča pra vybary ŭ Respublicy Biełaruś, pra padziei na Płoščy. Jany žadajuć, kab ja nios adkaznaść i pa kryminalnaj spravie, heta artykuł 188 — paklop. U poźvie značycca, što redakcyja patrabuje ad mianie raźmiaścić na staronkach vydańnia i na vebsajcie infarmacyju, što ja nibyta ŭvioŭ ludziej u zman».
Redakcyja vydańnia «Znamia Junosti» adznačyła ŭ poźvie, što paśla vystupaŭ Alesia Laŭčuka, u redakcyju na elektronnuju skryniu pačali pastupać šmatlikija niehatyŭnyja kamentary, takim čynam žurnalist nanios stratu dziełavoj reputacyi vydańnia. Aleś Laŭčuk kaža, što nie pahadžajecca z takim abvinavačvańniem.
Sudovaje pasiedžańnie pačniecca 26 studzienia ŭ sudzie Maskoŭskaha rajonu Bieraścia, a 10 hadzinie.
Ciapier čytajuć
18‑hadovy kursant Vajskovaj akademii ź Lachavič nikomu ničoha nie skazaŭ, zabraŭ dakumienty i pajechaŭ vajavać za Rasiju. Ciapier pa im płačuć48
Kamientary