Milinkievič suśvietnym lideram: vyratujcie Kazulina

Bolš, čym Kazulin, u sučasnaj Biełarusi prahaładaŭ tolki Aŭtuchovič.

Eks-kandydat u prezydenty 48-ja sutki trymaje haładoŭku ŭ kalonii «Vićba». Takim čynam jon damahajecca razhladu pytańnia pra sytuacyju z pravami čałavieka ŭ Biełarusi na Radzie Biaśpieki AAN. Patrabavańnie amal niemahčymaje, uličvajučy praktyku dyplamatyčnych praceduraŭ u hetaj mižnarodnaj arhanizacyi. Inšym punktam patrabavańniaŭ byłoha kandydata źjaŭlajecca, toje, kab palityčnaja rada demakratyčnych siłaŭ źviarnułasia da premjera Sidorskaha z prapanovaj uziać u svaje ruki ŭładu, bo Łukašenka, na dumku Kazulina, nielehitymny.

U aŭtorak 5 śniežnia z dazvołu departamenta pa vykanańni pakarańniaŭ pazačarhovuju 30-chvilinnuju susteču z mužam u kalonii mieła Iryna Kazulina. Jana pierakonvała muža spynić haładoŭku, ale pakul Kazulin nie paddaŭsia na ŭhavory.

Ciapier vaha Kazulina składaje 65 kilahramaŭ, za čas znachodžańnia za kratami jon straciŭ bolš za 40 kh. I.Kazulina kaža, što jaje muž pakul trymajecca badziora, zachavaŭ toj ža pohlad i havorku, što i raniej.

Kazulin nia vyklučyŭ svajho vychadu z haładoŭki, ale ŭ tym vypadku, kali jahonyja patrabavańni padtrymaje palityčnaja rada Abjadnanych demakrataŭ i choć adna eŭrapiejskaja kraina vystupić z prapanovaj uniasieńnia ŭ Radu Biaśpieki AAN pytańnia ab pravach čałavieka ŭ Biełarusi. Pakul hetyja patrabavańni nia buduć vykananyja, Kazulin źbirajecca praciahvać haładoŭku.

Kazulinu była zroblenaja prapanova ab pieravodzie ŭ Miensk, u Respublikanski turemny špital, ale jon admoviŭsia.

Razam ź Irynaj Kazulinaj u «Vićbu» jeździŭ były deputat i palitviazień Siarhiej Skrabiec. Letaś Skrabiec 43 dni prahaładaŭ u Bieraściejskim izalatary, tamu viedaje, što adčuvaje čałaviek paśla saraka dzion haładoŭki. «Niahledziačy na toje, što Kazulin ciapier badziory, usio moža źmianicca ŭ kožnuju chvilinu», -- kaža jon.

U Kazulina panizilisia cisk i temperatura. Skrabiec kaža, što takaja praciahłaja haładoŭka ŭ lubym vypadku adabjecca na zdaroŭi lidera sacyjał-demakrataŭ. Tym časam Alaksiej Karol zajaviŭ, što Kazulin u lubym vypadku zastaniecca lideram partyi, niezaležna ad taho, kolki času jon praviadzie za kratami.

U sieradu Alaksandr Milinkievič źviarnuŭsia z adkrytymi listami da Ŭładzimira Pucina, Džordža Buša, Anhieły Merkiel i Žaka Šyraka. «Zaklikaju vas zrabić ŭsio mahčymaje, kab vyratavać žyćcio Kazulina i vyzvalić palitźniavolenych u Biełarusi», -- piša jon u zvarocie.

• 0
• 0
• 0
• 0
• 0
• 0
• 0
• 0