Labiedźka: Chutčej adhryzu sabie ruku, čym admoŭlusia ad taho, u što vieru

Schudnieły, z doŭhimi vałasami, jak u chipi, Labiedźka: «U turmie staŭ paetam — łaŭry Niaklajeva nie dajuć spakoju».

Uviečary 6 krasavika z turmy KDB «amierykanki» vyjšaŭ staršynia Abjadnanaj hramadzianskaj partyi Anatol Labiedźka. Jak kaža sam palityk, jaho vyvieźli, a 22:30 na «apošniaj maršrutcy KDB».

Labiedźka adpuščany pad padpisku ab niavyjeździe. Abvinavačvańnie ŭ padrychtoŭcy masavych biesparadkaŭ ź jaho ŭsio jašče nie źniataje.

Tak supała, što 7 krasavika akurat musiŭ prajści čarhovy Nacyjanalny kamitet AHP. Užo z ranicy ŭsie čakali na im Anatola Labiedźku.

Staršynia źjaviŭsia ŭžo z bukietam kvietkam. Labiedźka z doŭhimi vałasami, jak chipi. Zdajecca, jašče bolš pachudzieŭ, choć zdavałasia kudy. Ale charakternaje pačućcie humaru Labiedźka zachavaŭ i ŭ turmie.

Navat kamunikavańnie z žurnalistami jon pačaŭ z žartu. «Chaču zrabić palityčnuju zajavu: mianie vyzvalili na Nackam partyi. U zaležnaści ad taho, jak jon projdzie, budzie zaležyć, ci ja viarnusia nazad, ci zastanusia tut».

«Ja znachodziŭsia ŭ infarmacyjnaj izalacyi. Šmat čaho nie viedaju, što ŭ krainie, što ŭ partyi. Viedaju tolki, što ŭ siamji. Samaje hałoŭnaje — maci pierastała płakać. U mianie było mała kantaktaŭ ź ludźmi, što mianie zabrali. Na pieršaj sustrečy mnie skazali, kali ja zrablu peŭnyja zajavy, to litaralna ŭ hety ž dzień mahu być doma.

Ja pakazaŭ śledčamu svaju pravuju ruku. I skazaŭ, što chutčej jaje adhryzu, čym admoŭlusia ŭ toje, što vieru, ci skažu suprać niekaha», — zaznačaje Labiedźka. Nastupny raz śledčaha jon pabačyŭ tolki ŭ 2011 hodzie.

«Nijakich pakazańniaŭ ja nie davaŭ. Ja zapytaŭsia ŭ śledčaha, ci padobny ja da viarbluda. Jon adkazaŭ, što, naturalna, nie. Nu dyk kali vy ličycie, što ja viarblud, to dakazvajcie heta.

Kali prajšło try dni, to try nieviadomyja asoby skazali samaje hałoŭnaje. „Anatol Uładzimiravič, za vami ciahniecca zdaravienny-zdaravienny šlejf hrachoŭ“. Daviałosia adznačyć, što hrachi — katehoryja maralnaja, a nie jurydyčnaja. Tym bolš Isusa Chrysta ja tam nie bačyŭ, kab jon moh vyznačać maje hrachi», —

Labiedźka kaža, što heta byli adzinyja jahonyja kantakty z kadebistami.

«Ja znachodziŭsia ŭvieś hety čas u stanie zakładnika. Dla čaho? Dla barteru ci niečaha inšaha, ja nie viedaju. Vinavatym ja siabie nie ličyŭ i nie liču. Kali sprava dojdzie da suda, to ja hatovy pradstaŭlać dokazy svajoj nievinavataści».

U hety momant u ofisie AHP źjaviŭsia Alaksandr Kazulin. Labiedźka adrazu ž abniaŭsia ź im. «Mnohija vas tam pamiatajuć. Sustrakaŭ ludziej, jakija havaryli pra Čyhira, pra Vałodziu Kudzinava, jakija tam siadzieli. Uzhadvali dobrym słovam».

Z čatyrma ŭdzielnikami kryminalnaj spravy pa 19 śniežnia staršynia AHP znachodziŭsia ŭ adnoj kamiery. «Aleś Kirkievič — małajčyna, usio narmalna ŭ jaho. Praŭda, niekatoryja praz toje, što jon molicca, dumajuć, što jon musulmanin. Ja byŭ z Małčanavym, kali my lažali na draŭlanych kanapach. Mnie pašancavała, kali pieraviali z adnoj kamiery ŭ inšuju, to zastałasia „škonka“ ad Fiaduty, jana na dźvie doški šyrejšaja. Dyk ja tam kataŭsia jak syr u maśle. Sustrakaŭsia z Uładzimiram Jaromienkam, addaŭ jamu svaje škarpetki. I z Alaksandram Arastovičam byŭ samy praciahły čas. U kości ja jaho vyjhraŭ», — raskazaŭ pra sukamiernikaŭ.

«Da mianie dachodziła infarmacyja, što niekatoryja ludzi vychodzili adtul, padpisaŭšy papiery, zrabiŭšy zajavu. Ja ničoha takoha, u pryncypie, nie moh padpisać.

Śniežań i studzień byli ŭ turmie na nadzvyčajnaj situacyi, z usimi nastupstvami. U lutym pačałosia paciapleńnie. A ŭ sakaviku ja siabie adčuvaŭ narmalna. Nie było žadańnia pahladzieć, jak ja vyhladaju biez adzieńnia.

Cikavaść da mianie prapała. Naša turemnaja sistema savieckaja, jakaja skiravanaje nie na toje, kab zrabić čałavieka inšym, a kab jaho prynizić», — Labiedźka tym samym faktyčna paćviardžaje słovy Michaleviča ab katavańniach u KDB.

«Było ŭsio. Nivodzin čałaviek tam nie moža adčuvać siabie narmalna. Vielmi kiepska tym ludziam, što da hetaha nie padrychtavanyja fizična i maralna.

Mnie było lahčej za inšych. U mianie byli niejkija balački, ale ja adtul vyjšaŭ fizična bolš mocnym. Bo kožnyja dźvie hadziny na špacyry ja adciskaŭsia pa tysiaču razoŭ.

Kali pačalisia peŭnyja dziejańni, nie budu kazać jakija, apuskacca da hetaha. Na prahułkach ja tancavaŭ pad muzyku. Spačatku na mianie hladzieli, jak na varjata, a potym stała narmalna».

«Pieršy list ja atrymaŭ ad siamji tolki pry kancy lutaha. Heta była nievialikaja cydułka, što ŭ ich usio narmalna. Apošni raz ja płakaŭ, napeŭna, u dziasiatym kłasie, a tut na ślazu prabiła.

U turmie ja staŭ paetam. Łaŭry Niaklajeva nie dajuć mnie spakoju. Pry vyzvaleńni ŭ mianie zabrali čatyry sšytki. Adzin ź jakich byŭ ź vieršami. Hetyja sšytki brali trojčy na pravierku, ale addavali. Spadziavaŭsia zabrać ich z saboj.

Pačaŭ pisać apaviadańnie «Lolik». Heta pra hałuba, ź jakim ja kožny raz vitaŭsia na špacyry. Jon ździŭlena hladzieŭ na nas. Zvyčajna ž ptuški ŭ kletcy, a tut naadvarot», — raskazvaje pra svaje litaraturnyja praktykavańni Labiedźka.

«Z punktu hledžańnia vytrymaješ ci nie vytrymaješ u «amierykancy», to ŭsio zaležyła ad taho, jakaja ŭ ciabie fizičnaja forma i duch.

Kali čałavieka, jakomu 24 hady, kožny dzień vyvodziać pad niejkija kryki, lamant. Uniz, uvierch, raździecca, adziecca...

Strašna pieršy dzień, strašna druhi dzień. Na čaćviorty ci piaty hety strach prapadaje. Ja skazaŭ, što jany rychtujuć novaje pakaleńnie apazicyi, jakaja nie budzie bajacca. Jany buduć nienavidzieć.

Mianie taksama sprabavali skinuć u nišu nianaviści, ale ja nie paddaŭsia. Ja navat na milimietr nie adyšoŭ ad taho čałavieka, jakoha vy viedali raniej», — havoryć Anatol Labiedźka.

Jon paćvierdziŭ isnavańnie ludziej u čornych maskach, pra jakich kazaŭ Aleś Michalevič. Mienavita jany ŭdzielničali ŭ katavańniach. «Ja ich nazyvaŭ «dobryja ludzi». Z nami pracavali «dobryja ludzi ŭ maskach».

Kali kažuć, što nohi pavinny być na raściažcy na 70 santymietraŭ, to ja rabiŭ na 1 mietr 30 santymietraŭ. Kali tabie zahadvajuć rabić 70 sm, kab prynizić, a ty robiš bolš, to jany razhublenyja. Byli roznyja ludzi. Adny ŭvieś čas pavažliva nazyvali mianie Anatol Uładzimiravič, inšyja ličyli, što tolki siłaj možna niešta dakazać».

«Ja viedaŭ, što suprać mianie ničoha nie było, aproč vystupu na radyjo i incydentu z pravakatarami z telekamierami.

Ja byŭ na hetym vybarach hierojam druhoha płana, ni kandydat u prezidenty, ni kiraŭnik štaba. Ale tak ja im spadabaŭsia, što vyrašyli: Labiedźku na «Tefi» treba vyłučyć.

Pieršyja try dni mnie była pryjemnaja takaja ŭvaha».

«U turmie byŭ televizar. Ale ŭ asnoŭnym pakazvaŭ tolki telekanał «Ruś-TV».

Ja šmat čaho daviedaŭsia pra taki narod, jak jaŭrei. Akazvajecca, heta vializnaja prablema dla čałaviectva. Šmat daviedaŭsia pra Vizantyju, — iranizuje Labiedźka. — Śpiecyfičny padbor. Haziety dachodzili «Sovietskaja Biełoruśsija». Atrymaŭ adzin numar «Narodnaj voli».

«Ja nie viedaju sutnaści zajavy Ramančuka», — karotka prakamientavaŭ jon situacyi z kandydatam u prezidenty ad AHP.

Za kratami Labiedźka prahaładaŭ 10 dzion. Kaža, što tolki piŭ haračuju harbatu. «Ź miedycynaj tam narmalna, doktar prafiesijny. Akazać dapamohu zmohuć», — havoryć palitviazień.

Paśla pres-kanfierencyi Labiedźka adrazu ŭziaŭsia za spravu. Pad jahonym pačatkam adbyŭsia nackam AHP.

* * *

Anatola Labiedźku vypuścili z turmy pad padpisku pra niavyjezd. Pra heta paviedamiŭ Centr hramadskich suviaziaŭ KDB Biełarusi. Palityk vyjšaŭ na svabodu 6 krasavika ŭviečary, ale da ranku sa ŚMI nie źviazvaŭsia.

Ab 11.30 staršynia Abjadnanaj hramadzianskaj partyi źjaviŭsia na pasiedžańni Nackama AHP, zapłanavanym raniej. Schudnieły, z doŭhimi vałasami, jak u chipi, ale čysta paholeny.

Vyzvalili jaho, a 22.30, raskazaŭ Anatol Labiedźka. Pry vyzvaleńni skanfiskavali čatyry sšytki z «vieršami i dumkami».

«Staŭ paetam — łaŭry Niaklajeva nie dajuć spakoju», — pačućcia humaru Labiedźka ŭ turmie vidavočna nie straciŭ.

Anatol Labiedźka raskazaŭ, što ŭ turmie pierasiakaŭsia z čatyrma «dziekabrystami»: Alesiem Kirkievičam, Uładzimiram Jaromienkam, Alaksandram Małčanavym i Alaksandram Arastovičam.

Razmova Labiedźki z žurnalistami była vielmi karotkaj, nieŭzabavie pačałosia pasiadžeńnie Nacyjanalnaha kamiteta AHP za začynienymi dźviaryma.

Nieŭzabavie na našym sajcie źjavicca videa z Anatolem Labiedźkam.

Labiedźka — adna z centralnych fihur u biełaruskaj apazicyi.

Jaho nie raz zatrymlivali, źbivali, suprać jaho raspačynali kryminalnyja spravy. Z zajavaŭ Łukašenki vynikała, što jon razhladaje Anatola Labiedźku jak adnaho z hałoŭnych svaich kankurentaŭ. Ale ŭ turmu Labiedźku pasadzili ŭpieršyniu paśla apošnich vybaraŭ.

Padčas prezidenckaj kampanii Anatol Labiedźka byŭ davieranaj asobaj kandydata ŭ prezidenty ad AHP. Jon fihurant kryminalnaj spravy ab tak zvanych «masavych biesparadkach» u Minsku ŭ dzień vybaraŭ. Jaho aryštavali, choć jon na Płoščy i nie vystupaŭ, i nie zaklikaŭ na Płošču publična — toje rabili kandydaty.

Lidar AHP byŭ zatrymany ŭ stalicy ŭ noč z 19 na 20 śniežnia va ŭłasnaj kvatery

i dastaŭleny ŭ SIZA KDB. 22 śniežnia stała viadoma, što ŭ znak pratestu suprać svajho niezakonnaha zatrymańnia Labiedźka abjaviŭ haładoŭku, adnak nieŭzabavie spyniŭ jaje pavodle prośby žonki.

Advakat Labiedźki nie mieŭ mahčymaści sustrecca z padabaronnym z 29 śniežnia,

što ź vialikaj dola imaviernaści aznačaje, što na palityka ažyćciaŭlaŭsia psichałahičny i fizičny cisk. Nahadajem, što eks-kandydat Michalevič śćviardžaje, što ŭ dačynieńni da jaho ŭžyvalisia katavańni, kab prymusić jaho na razmovy z apieratyŭnymi supracoŭnikami KDB biez prysutnaści advakata. Sustreča Labiedźki z advakatam adbyłasia tolki 23 sakavika.

Nahadajem, raniej pad padpisku ab niavyjeździe ź SIZA KDB byli adpuščany eks-kandydaty ŭ prezidenty Vital Rymašeŭski i Aleś Michalevič, redaktarka sajta charter97.org Natalla Radzina, kiraŭnik vybarčaha štaba Uładzimira Niaklajeva Andrej Dźmitryjeŭ i aktyvist kampanii «Havary praŭdu!» Siarhiej Vaźniak.

Jašče dva fihuranty kryminalnaj spravy ab masavych biesparadkach byli adpuščany ź SIZA KDB pad damašni aryšt — eks-kandydat u prezidenty Uładzimir Niaklajeŭ i žurnalistka rasijskaj «Novoj haziety» Iryna Chalip, žonka byłoha kandydata Andreja Sańnikava.

• 0
• 0
• 0
• 0
• 0
• 0
• 0
• 0