Praces Sańnikava. Na čas vystupu Ramančuka Sańnikaŭ adviarnuŭsia. Rymašeŭski: My płanavali ačapić Administracyju

U jakaści śviedkaŭ vyklikanyja kandydaty ŭ prezidenty Jarasłaŭ Ramančuk i Vital Rymašeŭski, a taksama palitviazień Źmicier Novik.

17:47

Abvieščany pierapynak da ranicy čaćviarha. Praces adnovicca a 10-j hadzinie. Buduć zasłuchanyja pakazańni 12 śviedkaŭ z boku abvinavačvańnia. Pałova ź ich užo śviedčyli na pracesach nad Mikitam Lichavidam i Arciomam Breusam i Ivanam Haponavym. Heta -- słužačyja pałka milicyi śpiecyjalnaha pryznačeńnia Minharvykankama.

Nahadajem taksama, što zaŭtra, 5 maja, u sudzie Frunzienskaha rajona Minska pačniecca praces nad byłymi kandydatami ŭ prezidenty Uładzimiram Niaklajevym i Vitalom Rymašeŭskim, lidarami kampanii "Havary praŭdu!" Andrejem Dźmitryjevym, Alaksandram Fiadutam i Siarhiejem Vaźniakom, moładzievaj aktyvistkaj Nastaj Pałažankaj.

17:19

Čytańnie 5-ha toma materyjałaŭ spravy skončanaje, prakuror pierachodzić da 6-ha toma.

17:13

Prakuror skončyŭ čytańnie 4-ha toma materyjałaŭ spravy. Udzielniki pracesu pytańniaŭ da jaho nie mieli. Zaraz budzie začytany 5 tom. Jon utrymlivaje materyjały spravy Sańnikava.

Pieršymi ź ich akazalisia materyjały prasłuchoŭvańnia telefonnych razmoŭ Sańnikava.

Sudździa zaŭvažyła, što słuchać sami zapisy sud budzie na inšym pasiadžeńni, kali ŭ zału dastaviać nieabchodnuju techniku.

16:46

Prakuror pačaŭ čytać materyjały spravy z 4-ha toma.

16:35

Čytańnie 3-ha toma materyjałaŭ spravy skončanaje. Advakaty majuć pytańni što da źmiestu hetaha toma.

Advakat Halijeŭ źviarnuŭ uvahu sudździ na nieadpaviednaść podpisaŭ pad fota sa spravy ź ich źmiestam.

16:24

U materyjałach spravy Mirzajanava znachodzicca charaktarystyka, padpisanaja rektaram jaho VNU. U joj havorycca, što chłopiec ad 2007 h. źjaŭlajecca členam BRSM.

15:57

Prakuror ahučvaje dakumienty, jakija ŭtrymlivajucca z 3-m tomie kryminalnaj spravy. Siarod materyjałaŭ spravy -- šmat fota, dvd ź videazapisami, vynikaŭ ekśpiertyzaŭ.

15:54

Skončyŭsia dopyt Ramančuka, zaraz buduć začytvać piśmovyja materyjały spravy. Ramančuk paśla zaviaršeńnia dopytu na niekalki chvilin prysieŭ ŭ zale suda, ale potym vyjšaŭ za dźviery.

Rodnyja padsudnych abmiarkoŭvajuć pakazańni Ramančuka. Na ich dumku, jon mieŭ šaniec paprasić prabačeńnia ŭ Sańnikava, ale nie zrabiŭ hetaha. Jany kažuć na Ramančuka kiepskija słovy.

15:50

Advakat zapytaŭsia ŭ Ramančuka, čamu jon syšoŭ z płoščy Niezaležnaści. Toj kaža, što syšoŭ adtul "bo nie bačyŭ bolš sensu tam znachodzicca".

Na pytańnie advakata, čamu jon pakinuŭ tam ludziej, jakija za jaho hałasavali, Ramančuk ŭciamna adkazać nie zmoh.

15:36--15:48

Ramančuk kaža, što zaklikaŭ iści da Doma ŭrada ni jon, ni chto inšy nie rabili. Ludzi pajšli tudy sami. Jon taksama kaža, što siarod ludziej panavaŭ dobry nastroj. Mietaličnych prutoŭ i zbroi jon nie bačyŭ.

Ramančuk praciahvaje badziora adkazvać na pytańni advakataŭ. Andrej Sańnikaŭ adviarnuŭsia tvaram da ściany, na Ramančuka nie hladzić.

Advakat Sańnikava paprasiŭ Ramančuka źviarnucca da suda, skazać toje, ab čym jon ličyć vartym skazać. Ramančuk zajaviŭ, što ŭsio jon skazaŭ u razmovie z prakuroram i advakatami.

Jon zajaviŭ, što na Kastryčnickaj płoščy ŭsie kandydaty mieli dobry ŭźniosły nastroj. Jon taksama paviedamiŭ, što nie viedaje, ci padavaŭ jaho štab zajaŭku na praviadzieńnie akcyi na Kastryčnickaj płoščy.

15:25

Sudździa prapanavała Sańnikavu zadać pytańnie Ramančuku. Jon adkazaŭ: "Pytańniaŭ da śviedki, jaki paspryjaŭ tamu, što maja žonka [Iryna Chalip] trapiła ŭ turmu, nie maju". Na Ramančuka Sańnikaŭ navat nie pahladzieŭ, źviarnuŭsia tolki da sudździ.

Ramančuk razmaŭlaje z advakatami. Jany pytajuć jaho, navošta jon zaprašaŭ ludziej na Płošču. "Kab razam vypracavać płan dziejańniaŭ", — adkazaŭ jon. Ramančuk taksama kaža, što nie viedaŭ ab płanach inšych kandydataŭ nakont Płoščy.

15:17--15:24

Ramančuk zajaviŭ prakuroru, što na Kastryčnickaj płoščy daišniki sprabavali spynić natoŭp. Hetyja słovy vyklikali huł asudžeńnia ŭ rodnych abvinavačanych.

Sudździa -- Ramančuku: «Vy šmat havorycie, ale nie adkazvajecie na pytańnie».

Ramančuk nasamreč adkazvaje sumburna, unikaje adkazaŭ na pytańni prakurora ab mahčymaści pieramovaŭ z uładami.

Ramančuk kaža, što zastaŭsia na Płoščy razdavać šmatlikija intervju žurnalistam. Praz 20 chvilin pryjšoŭ na płošču Niezaležnaści (21.30): nie vystupaŭ -- stajaŭ la Čyrvonaha kaścioła. Vystupaŭ kandydataŭ nie čuŭ, uvieś čas znachodziŭsia navoddal, bo było šmat ludziej.

15:07--15:12

Prakuror pačaŭ dopyt Ramančuka. Pytaje ab jaho dziejnaści ŭ roli kandydata ŭ prezidenty. Ramančuk zajaviŭ, što nie mieŭ nijakich kantaktaŭ ź inšymi kandydatami. Pry hetym jon zabłytaŭsia, charaktaryzujučy nazvu svajoj kampanii ŭ prezidenty.

Ramančuk, adnak, raskazaŭ, što ŭ kancy kastryčnika Sańnikaŭ prapanavaŭ jamu źniać svaju kandydaturu na jaho karyść. Ramančuk admoviŭsia. Paźniej takaja ž prapanova pastupiła i ad Niaklajeva.

Ramančuk havoryć enierhična i raźniavolena, dazvalaje sabie radasnyja intanacyi. Kaža, što nie viedaje, kolki ludziej było na Kastryčnickaj płoščy.

Ramančuk kaža, što viečaram 19 śniežnia ŭ jaho byli pryčyny padazravać, što vybary prajšli niedemakratyčna. Kaža, što kandydaty ad apazicyi prajhrali z roznych pryčynaŭ.

15:01

Prychod u zału Jarasłava Ramančuka supravadžajecca niezadavolenymi kamientarami rodnymi abvinavačanych.

Sudździa zapytała Ramančuka, ci viedaje jon kaho z abvinavačanych. Jon adkazaŭ, što viedaje tolki Sańnikava jak palityka i hramadskaha dziejača.

14:57

Pałažanka ŭ razmovie z advakatami zajaviła, što na Płoščy masavyja biesparadki čynili akurat śpiecnazaŭcy. Jana kaža, što supracoŭniki milicyi absalutna volna siabie pačuvali, źbivajučy ludziej.

Sudździa zapytała ŭ Pałažanki, što jana viedaje ab mahčymych pieramovach apazicyi i pradstaŭnikoŭ urada. Nasta adkazała, što viedaje ab takoj prapanovie Sańnikava.

Dopyt Pałažanki zavieršany. Rodnyja mocna dziakujuć Pałažancy za pakazańni.

Zaraz zaprosiać Ramančuka.

14:51--14:54

Nasta Pałažanka zaznačyła, što nazyvać padziei viečara 19 śniežnia na płoščy Niezaležnaści biesparadkami -- hłupstva. Dziaŭčyna taksama ličyć, što heta vielmi strašna, kali ŭ krainie źjaŭlajucca asudžanyja za tyja padziei.

«Nichto nie vieryć u masavyja biesparadki, nichto nie vieryć u 80%. Ja spadziajusia, što Vysoki sud taksama heta razumieje», -- kaža jana.

14:44

Pałažanka paviedamiła, što ludzi nie mahli iści pa tratuarach -- ludskaja płyń paprostu nie źmiaščałasia. Jana ličyć, što kandydaty nie pavinny byli zaklikać ruchacca pa chodnikach -- ludzi takim čynam mahli sabie naškodzić.

14:30--14:42

Z Pałažankaj razmaŭlajuć advakaty. Jana raspaviała, što na Kastryčnickaj płoščy ŭžo nie chapała miesca ŭsim demanstrantam i tamu jany vyjšli na praśpiekt.

Taksama Nasta Pałažanka raspaviała, što nichto z kandydataŭ nie zaklikaŭ hramić budynki, jany tolki havaryli ab falsifkacyi vybaraŭ.

U razmovie z advakatam Pałažanka paŭtaryła toje, što akcyja była vyklučna mirnaj.

U zale suda prysutničajuć niekalki maładafrontaŭcaŭ, jany abmiarkoŭvajuć pamiž saboj pakazańni Nasty.

14:15 -- 14:24

Prakuror zapytaŭ Pałažanku, u jakaści kaho jana była na Płoščy -- jana adkazała, što była tam u jakaści hramadzianki Biełarusi.

Nasta taksama raspaviała, što pieršyja šyby ŭ Domie ŭrada pabili ludzi, jakija byli na Płoščy zahadzia. Jany pačali bić vokny ŭ toj momant, kali la pomnika Lenina pačaŭsia mitynh.

Pałažanka zaŭvažyła, što bić vokny pačali 2-3 čałavieki , ich nichto nie zatrymlivaŭ, jana ich nie paznała -- nikoli raniej nie bačyła.

Pałažanka dadaje, što śpiecnaz nie zaminaŭ bić šyby, jana kaža, što tolki paźniej źjaviŭsia na płoščy i pačaŭ źbivać usich udzielnikaŭ biez razboru.

14:05--14:14

Pačaŭsia dopyt Nasty Pałažanki (praces nad joj pačniecca, darečy, zaŭtra, 5 maja ŭ sudzie Frunzienskaha rajona stalicy -- sudzić buduć razam ź Niaklajevym, Fiadutam, Vaźniakom i Rymašeŭskim).

Sudździa raspytvaje, ci viedaje dziaŭčyna padazravanych. Jana kaža, što viedaje ŭsich. Prakuror pačynaje zadavać pytańni.

Nasta zaŭvažyła, što ŭ siońniašniaj poźvie sakratar suda dapuściŭ pamyłku -- zamiest śviedki jaje zaprasili ŭ siońniašni sud u jakaści abvinavačanaj.

Jana zhadała, što razam ź Jaromienkam jana dapamahała pryjezžym udzielnikam akcyi 19 śniežnia znajści načleh u Minsku.

Prakuror raspytvaje Pałažanku ab tym, što adbyvałasia na Kastryčnickaj płoščy. Jana raspaviała, što jana sabrałasia 40 tys. čałaviek. Zaklikaŭ iści na Płošču Niezaležnaści nie čuła.

Pałažanka daje pakazańni pa-biełarusku. Havoryć upeŭniena i raźniavolena.

14:04

Zaprošanaja śviedka -- Nasta Pałažanka.

14:02

Pasiadžeńnie praciahnutaje. U Jaromienka źmianili advakata.

13:56

U zału zajšli advakaty, jany pieramaŭlajucca z padaabaronnymi.

13:49 Pačali zapuskać ludziej u zału suda. Usie padsudnyja na miescy. Sańnikaŭ nie siadaje na łavu -- staić, hladzić na žurnalistaŭ. Jon vielmi napružany.

Achova zabaraniła karystacca razietkami, jakija jość u zale suda.

12:39

Abvieščany pierapynak da 14:00. Advakat Jaromienka Mušynskaja paprasiła sabie zamieny.

12:07

«Kali pravakatary pačali bić šyby, byŭ ahulny stan razhublenaści», — havoryć Rymašeŭski.

Kandydat zbolšaha zhodzien z acenkaj vybaraŭ, što dała ABSIE.

11:44

Rymašeŭski kaža, što jon sprabavaŭ arhanizavać abaronu Doma ŭrada, kab spynić bićcio škła. Kandydat havoryć, što bačyŭ na hanku Mirzajanava, ale toj pavodziŭ siabie nieahresiŭna.

Rymašeŭski kaža, što dziakujučy milicyjanieru Jaŭsiejevu ludzi volna syšli z pastamienta Lenina, nikoha ź ich nie zatrymlivali.

11:37

Rymašeŭski kaža, što asabista jon vioŭ pieramovy z supracoŭnikami DAI. Kandydat u prezidenty zaklikaŭ vyzvalić častku praśpiekta ad mašyn, kab nie adbyłosia nijakich incydentaŭ.

«Ja nie pamiataju, chto zaklikaŭ na pieramovy z uradam. Takaja akcyja mahła skončycca mirna i biaskryŭdna, jak u listapadzie. Tady byŭ simvaličny akt patrabavańnia ad CVK svabodnych vybaraŭ».

11:24

«My railisia na Płoščy, jak vykazać pratest. Ja kateharyčna suprać šturmu jakich-niebudź uradavych budynkaŭ

My, kandydaty i siabry kamand, pahadzilisia pajści da Administracyi prezidenta i ŭziać jaje ŭ ačapleńnie, kab nie dapuścić bićcia šybaŭ».

Čamu taki płan nie byŭ ździejśnieny, Rymašeŭskamu nieviadoma. «Ruch u bok płoščy Niezaležnaści byŭ chaatyčny».

11:10

«Moh by raskazać, jak ź dziciačaha sadka maryŭ stać kandydatam u prezidenty», — adreahavaŭ Rymašeŭski na šmatlikija pytańni prakurora. Abvinavaŭca byŭ vymušany zadavać pytańni pa čarzie.

«Biezumoŭna, sprabavali kaardynavać dziejnaść ź inšymi kandydatami. Mnohija kandydaty mieli padobnyja pohlady, pazicyi i acenki supadali», — kaža V.Rymašeŭski.

«Ź niekatorymi kandydatami sustrakalisia. Z spadarom Sańnikavym nakont Płoščy nie było nivodnaj sustrečy, nie vyjšła ŭ nas kamunikacyi».

11:04

Dopyt Novika skončany. Kanvoj vyvieŭ jaho z zali.

Nastupny śviedka — kandydat u prezident Vital Rymašeŭski.

10:58

«Majo ŭnutranaje pierakanańnie, što vybary byli sfalsifikavanymi. Ja nie bačyŭ, kab niechta raśpisvaŭsia za Łukašenku. Nichto z maich znajomych za jaho nie hałasavaŭ».

Novik kaža, što «šturm» Doma ŭradu spravakavali pravakatary.

10:33

«Natoŭp nie byŭ ahresiŭny. Ludzi byli radasnyja, na ich tvarach byli ŭśmieški», — kaža D.Novik. «Ni ŭ pačatku mitynhu, ni ŭ kancy ja nie bačyŭ u ludziej nijakich mietaličnych štyroŭ. U ich byli tolki bieł-čyrvona-biełyja ściahi».

10:24

«Sprobaŭ praryvu łancuha nie było. Uzbrojenaha supracivu ja nie bačyŭ». Novik pryznaje, što nanios niekalki ŭdaraŭ nahami pa ščytach, što zaharodžvali ŭvachod u Dom uradu: «Heta byŭ efiekt natoŭpu».

10:18

«Nijakich zaklikaŭ iści da Doma ŭradu, šturmavać jaho, nie było, usio było vielmi arhanizavana. Nichto z udzielnikaŭ mitynhu nie hramiŭ budynak», — kaža palitviazień.

Niezrazumieła, navošta pryviali z škłoŭskaj kałonii Novika? Niaŭžo spadziavalisia, što jon daść pakazańni suprać Sańnikava? Kali tak, to Novik vyklikaje pavahu. Nivodnym słovam jon nie abvinavačvaje nikoha z demanstrantaŭ.

10:13

«Nijakich masavych biesparadkaŭ nie było. Nichto nie raźbivaŭ vitryny, mahaziny. Supracoŭniki DAI taksama byli ŭ biaśpiecy», — kaža Dźmitryj.

«Ludzi sabralisia dla taho, kab vykazać svaju niezadavolenaść, bo ličyli, što vybary sfalsifikavanyja».

10:09

Novik u čornaj robie, karotka stryžany. U supravadžeńni dvuch milicyjantaŭ.

«Sumleńnie nie dazvoliła doma siadzieć. Usia Płošča była zaniataja», — kaža D.Novik.

«Nijakich zaklikaŭ iści na płošču Niezaležnaści ja nie čuŭ, natoŭp ruchaŭsia stychijna».

10:03

Praces adnaviŭsia. U zale znoŭ šmat studentaŭ.

Ramančuk pakul nie źjaviŭsia na sud. Pieršym u jakaści śviedki budzie dapytany Dźmitry Novik. Jon byŭ asudžany za Płošču na 3,5 hady kałonii.

Jaho pryvioŭ u zału suda kanvoj, u kajdankach.

***

Paśla pierapynku, źviazanaha z vychadnymi dniami ŭznaŭlajecca praces nad kandydatam u prezidenty Andrejem Sańnikavym,

U papiarednija dni byli dapytanyja abvinavačanyja, a taksama paciarpiełyja. Ciapier dapytvajucca śviedki z boku abarony.

Siońnia ŭ sud vyklikali kandydataŭ u prezidenty Jarasłava Ramančuka, Vitala Rymašeŭskaha.

• 0
• 0
• 0
• 0
• 0
• 0
• 0
• 0