Łukašenka zvolniŭ Farmahieja i Jaŭstafjeva

Hienierał-major Leanid Farmahiej zvolnieny z pasady načalnika hałoŭnaha ŭpraŭleńnia ŭnutranych spravaŭ Minskaha harvykankama i zaličany ŭ rasparadžeńnie ministra Kulašova. Adpaviedny ŭkaz siońnia padpisaŭ Alaksandr Łukašenka.

Niezadavolenaść pracaj Farmahieja moža być źviazanaja z akcyjami pratestu, jakija prachodziać štosieradu ŭ Minsku. Milicyja tak i nie znajšła sposabaŭ praduchileńnia hetych mierapryjemstvaŭ.

Na svajoj pasadzie Leanid Farmahiej adpracavaŭ amal try hady. Da hetaha jon uznačalvaŭ Viciebskuju abłasnuju milicyju.

Paśla padziej na Płoščy Farmahiej zaznačyŭ, što milicyja dziejničała pravamierna ŭ ramkach zakona. Taksama Farmahiej uniesieny ŭ śpis nievyjaznych u krainy Jeŭrasajuza pad numaram 85.

Chto zajmie pasadu načalnika minskaj milicyi, pakul nie paviedamlajecca.

Adnačasova Łukašenka vyzvaliŭ ad pasady načalnika ŭpraŭleńnia ŭnutranych spraŭ na transparcie Ministerstva ŭnutranych spraŭ Viačasłava Jaŭstafjeva. Jaŭstafjeŭ raniej uznačalvaŭ viciebskuju milicyju.

Hienierał-majory milicyi Leanid Farmahiej i Viačasłaŭ Jaŭstafjeŭ vyzvaleny ad pasad za surjoznyja chiby pry arhanizacyi rasśledavańnia vybuchaŭ u Viciebsku i Minsku. Takuju vysnovu možna zrabić z paviedamleńnia telekanała ANT. Akramia taho, Farmahieju pastaŭlena ŭ vinu nieefiektyŭnaja achova staličnaha mietrapalitena, ad čaho stali mahčymymi terakt na stancyi «Kastryčnickaja» 11 krasavika i praniknieńnie hrupy maładych ludziej na stancyju «Maskoŭskaja» ŭ noč na 29 maja.

Zhodna z ukazam Łukašenki № 267, Jaŭstafjeŭ vyzvaleny ad pasady načalnika ŭpraŭleńnia ŭnutranych spraŭ na transparcie Ministerstva ŭnutranych spraŭ i zvolnieny z orhanaŭ unutranych spraŭ u zapas Uzbrojenych sił pa ŭzroście.

Ukazam № 268 hienierał-major milicyi Leanid Farmahiej vyzvaleny ad pasady načalnika hałoŭnaha ŭpraŭleńnia ŭnutranych spraŭ Minskaha harvykankama i zaličany ŭ rasparadžeńnie ministra ŭnutranych spraŭ.

«Leanid Farmahiej u svoj čas uznačalvaŭ UUS Viciebskaha abłvykankama, a taksama staličnuju milicyju. Jon nie zmoh zabiaśpiečyć efiektyŭnaje rasśledavańnie vybuchaŭ u Viciebsku i Minsku. Bolš za toje, nie ŭdałosia jamu i stvaryć efiektyŭnyja ŭmovy achovy minskaj «padziemki». U svaju čarhu, heta stvaryła ŭmovy dla ŭčynieńnia terakta na stancyi «Kastryčnickaja». Z hetaj ža pryčyny ŭžo paśla terakta pabočnyja ludzi pranikli na stancyju mietro «Maskoŭskaja», — adznačajecca ŭ siužecie ANT.

Jaŭstafjeŭ «taksama byŭ načalnikam Viciebskaha abłasnoha ŭpraŭleńnia ŭnutranych spraŭ i taksama nie zmoh zabiaśpiečyć efiektyŭnaje rasśledavańnie čarhovaha viciebskaha vybuchu. Praz chiby jaho padnačalenych złačyncy zastalisia na voli. Vynik — zahinułyja ludzi i nazaŭždy źniaviečanyja losy».

• 0
• 0
• 0
• 0
• 0
• 0