Dyrektary pradpryjemstvaŭ i kiraŭniki vykankamaŭ sabatujuć pryvatyzacyju

Dyrektary pradpryjemstvaŭ i miascovyja orhany ŭłady čyniać pieraškody praviadzieńniu pryvatyzacyi ŭ Biełarusi,

zajaviŭ staršynia Dziaržaŭnaha kamiteta pa majomaści Hieorhij Kuźniacoŭ 21 lipienia na pres-kanfierencyi ŭ Minsku.

«U nas u krainie šmat praciŭnikaŭ pryvatyzacyi — heta dyrektary pradpryjemstvaŭ, jakich padtrymlivajuć miascovyja orhany ŭłady, kiraŭnictva ministerstvaŭ i viedamstvaŭ», — pieraličyŭ Kuźniacoŭ.

Pavodle jaho słoŭ, kiraŭniki mnohich pradpryjemstvaŭ, što ŭvajšli ŭ płan pryvatyzacyi na 2011–2013 hady, zrazumieli, što z prychodam novych ułaśnikaŭ mohuć pazbavicca svaich pasadaŭ, tamu što nie zmahli zabiaśpiečyć efiektyŭnuju pracu kampanij. «I ciapier jany pačynajuć budaražyć kalektyvy, zapałochvać, zryvać konkursy i aŭkcyjony. Tak, naprykład, było pa Lidskim zavodzie charčovych kancentrataŭ, jaki sprabavali pradać pa konkursie, na ŭmovach, vyłučanych kancernam „Biełdziaržcharčpram“. Ale kali dajšła sprava da konkursu, kali źjavilisia dobryja inviestary, u jakich vialikija rynki zbytu, konkurs sarvaŭsia», — paviedamiŭ Kuźniacoŭ.

Pavodle jaho słoŭ, anałahičnaja situacyja składvajecca vakoł Baranavickaj šviejnaj fabryki i homielskaha pradpryjemstva «Elehant». «Dyrektar budaražyć kalektyŭ, padklučaje miascovyja orhany ŭłady, prafsajuzy, i starajecca sarvać pryvatyzacyju. Drenna, što i ministerstvy i viedamstvy padtrymlivajuć hetych kiraŭnikoŭ pradpryjemstvaŭ», — padkreślivaje staršynia Dziaržkammajomaści.

Aprača taho, zaznačyŭ jon, ministerstvy i viedamstvy surjozna nie zajmalisia pradpryjemstvami, jakija ŭvajšli ŭ płan pryvatyzacyi, i svaimi dziejańniami taksama pieraškadžajuć prodažu aktyvaŭ. «Spačatku ŭnosiać prapanovy pradavać pradpryjemstvy pa konkursie ci na aŭkcyjonie, a jak tolki pačynajem abviaščać datu konkursu ci aŭkcyjonu, prysyłajuć listy, što pieradumali», — apisvaje dziejańni ministerstvaŭ i viedamstvaŭ Kuźniacoŭ.

Ale kali sprava dachodzić da prodažu, pakiety akcyj usio roŭna zastajucca nierealizavanymi. Adna z pryčyn, pavodle słoŭ Kuźniacova, zaklučajecca ŭ tym, što ministerstvy i viedamstvy vystaŭlajuć takija finansavyja ŭmovy, jakija pałochajuć inviestaraŭ.

Razam z tym jon spadziajecca, što situacyja źmienicca. «I ministerstvy, i miascovyja orhany ŭłady ŭśviedamlajuć, što pradpryjemstvam treba znajści efiektyŭnaha ŭłaśnika, jaki ŭkładzie srodki ŭ madernizacyju i ich raźvićcio», — skazaŭ Kuźniacoŭ.

• 0
• 0
• 0
• 0
• 0
• 0
• 0
• 0