Siońnia va ŭsich ahulnaadukacyjnych ustanovach Biełarusi prachodzić Dzień viedaŭ.
Siońnia va ŭsich ahulnaadukacyjnych ustanovach Biełarusi prachodzić Dzień viedaŭ.
Pavodle źviestak Ministerstva adukacyi, u sistemie ahulnaj siaredniaj adukacyi
sioleta buduć vučycca kala 925 tysiač školnikaŭ, u tym liku 88,5 tysiačy pieršakłaśnikaŭ.
U krainie dziejničajuć 3.484 škoły, licei i himnazii, u jakich pracujuć 108 tysiač nastaŭnikaŭ. 7,9% ahulnaj kolkaści piedahohaŭ składajuć piensijaniery. Sioleta adkryłasia siem novych škoł, zakryłasia 65 — u asnoŭnym heta małakamplektnyja škoły ŭ sielskaj miascovaści.
Praktyčna va ŭsich zakrytych škołach vykładańnie viałosia na biełaruskaj movie, paviedamiŭ staršynia RHA «Tavarystva biełaruskaj movy imia Franciška Skaryny» Aleh Trusaŭ. Pavodle jaho słoŭ, z hodu ŭ hod u Biełarusi pamianšajecca kolkaść školnikaŭ, jakija atrymlivajuć adukacyju na biełaruskaj movie. Letaś ich było tolki ŭsiaho 18% ad ahulnaj kolkaści, sioleta, vierahodna, budzie jašče mienš: dakładnyja źviestki stanuć viadomyja nieŭzabavie paśla pačatku navučalnaha hoda, adznačyŭ Trusaŭ.
U novym navučalnym hodzie ŭ Biełarusi budzie pracavać 55 vyšejšych i 214 siarednich navučalnych ustanoŭ, a taksama 217 ustanoŭ praftechadukacyi. U ich buduć vučycca kala 722 tysiač čałaviek: u VNU — amal 445 tysiač, u SSNU — kala 167 tysiač, u PTV — 110 tysiač. Dla paraŭnańnia: letaś hetyja ličby składali adpaviedna 450, 150 i 100 tysiač čałaviek.
Miedyki ŭkazvajuć na tryvožnuju tendencyju paharšeńnia zdaroŭja biełaruskich školnikaŭ. Pavodle źviestak Ministerstva achovy zdaroŭja, dola navučencaŭ z chraničnymi chvarobami i invalidnaściu raście z hodu ŭ hod: ciapier jana składaje 21% ad usich dziaciej školnaha ŭzrostu. Najbolš raspaŭsiudžany siarod školnikaŭ chvaroby dychańnia, vačej i orhanaŭ stravavańnia. Na dumku śpiecyjalistaŭ, asnoŭnaja pryčyna rostu zachvorvańnia školnikaŭ — vysokija psichałahičnyja i fizičnyja nahruzki ŭ sistemie adukacyi.
Treba adznačyć, što 1 vieraśnia nabyŭ moc novy Kodeks ab adukacyi, nakiravany «na kompleksnaje i sistemnaje rehulavańnie hramadskich adnosinaŭ u śfiery adukacyi».Jon, u pryvatnaści, unosić šerah źmianieńniaŭ u školnuju prahramu, praduhledžvaje abaviazkovaje padpisańnie studentami i navučencami dahavora na navučańnie. Upieršyniu ŭvodzicca paniaćcie «dyscyplinarny prastupak navučenca» i pryvodziacca padstavy dla pryciahnieńnia jaho da adkaznaści.
Zrešty, jak śćviardžajuć u Minadukacyi, sioleta źmianieńni ŭ vučebnyja płany škoł u suviazi z pryniaćciem kodeksa ŭnosicca nie buduć, pakolki płany byli zaćvierdžany da ŭvachodžańnia kodeksa ŭ siłu. Na praktycy novaŭviadzieńni płanujecca ŭvieści praz hod.
Vystupajučy 29 žniŭnia na naradzie piedahahičnaha aktyva, Alaksandr Łukašenka ŭ liku samych surjoznych prablem śfiery adukacyi adznačyŭ «katastrafičnaje padzieńnie» prestyžu prafiesii nastaŭnika, paharšeńnie jakaści vykładańnia, a taksama pytańni dyscypliny.
Pa daručeńni kiraŭnika dziaržavy z hetaha navučalnaha hoda ŭ Biełarusi pačniecca aptymizacyja terminaŭ i standartaŭ navučańnia i prahram VNU. Łukašenka, u pryvatnaści, prapanavaŭ skaracić terminy atrymańnia vyšejšaj adukacyi na čverć za košt pamianšeńnia kolkaści niaprofilnych dyscyplin abo skaračeńnia hadzin, adviedzienych na ich vyvučeńnie.
Kamientary