U Biełarusi — 30 tys. niepiśmiennych

Pavodle źviestak pierapisu nasielnictva 2009 hoda, u Biełarusi naličvałasia 30 tys. (0,4% ahulnaj kolkaści nasielnictva) niepiśmiennych starejšych za 15 hadoŭ. Takija źviestki apublikavaŭ Nacyjanalny statystyčny kamitet da Mižnarodnaha dnia piśmiennaści (8 vieraśnia).

Jak zaznačaje Biełstat, uzrovień piśmiennaści darosłaha nasielnictva ŭ Biełarusi, jak i ŭ raźvitych krainach śvietu, nabližajecca da 100% i składaje 99,6%.

Značnaja častka niepiśmiennych — sastarełyja, a taksama asoby ź ciažkimi fizičnymi i razumovymi niedachopami.

Vyniki pierapisu nasielnictva 2009 hoda śviedčać ab roście uzroŭniu adukacyi žycharoŭ krainy, padkreślivajuć u kamitecie. Na momant pierapisu 90% nasielnictva va ŭzroście 15 hadoŭ i starejšych mieli vyšejšuju, siaredniuju ci bazavuju adukacyju suprać 77% pavodle pierapisu 1989 hoda i 85% — pavodle pierapisu 1999 hoda. Siarod abłaściej samy vysoki pakazčyk u Mahiloŭskaj vobłaści — 91,5%.

Značna pavysiŭsia ŭzrovień adukacyi viaskoŭcaŭ. Kali ŭ 1999 hodzie siarod viaskoŭcaŭ 15 hadoŭ i starejšych dola asob, jakija majuć vyšejšuju, siaredniuju i bazavuju adukacyju, składała 68%, to pavodle źviestak pierapisu 2009 hoda — 82%.

Dola asob, jakija majuć vyšejšuju adukacyju, za dziesiacihodździe, što minuła paśla pierapisu nasielnictva 1999 hoda, u cełym uzrasła z 14 da 19%, a ich kolkaść — z 1 młn. 134 tys. da 1 młn. 531 tys. čałaviek. Siarod moładzi (16–30 hadoŭ) udzielnaja vaha asob z vyšejšym uzroŭniem adukacyi ŭzrasła z 10 da 17%, abo na 153 tys. čałaviek.

Na 1.000 mužčyn (va ŭzroście 15 hadoŭ i starej) prypadaje 176 mužčyn z vyšejšaj adukacyjaj, na 1.000 žančyn (va ŭzroście 15 hadoŭ i starej) — 199 žančyn z vyšejšaj adukacyjaj.

Uzrastaje kolkaść nasielnictva, jakoje svabodna vałodaje zamiežnymi movami. Anhlijskaj svabodna vałodajuć 450 tys. čałaviek. U paraŭnańni sa źviestkami pierapisu nasielnictva 1999 hoda, kolkaść ludziej, jakija vałodajuć anhlijskaj movaj, uzrasła ŭ 3,2 razu, a ich dola — z 1 da 5%. Prykładna 138 tys. čałaviek svabodna vałodajuć niamieckaj movaj, što ŭ 2,2 razu bolš, čym było ŭličana pry pierapisu nasielnictva 1999 hoda.

Biełstat zaznačaje, što «ŭ adukacyjnaj palitycy Biełarusi stavicca meta zabieśpiačeńnia da 2015 hodzie ŭsieahulnaj siaredniaj adukacyi. Adukacyjnaja palityka pa dasiahnieńni hetaj mety ŭklučaje: zabieśpiačeńnie dastupnaści atrymańnia ahulnaj siaredniaj adukacyi ŭsimi dziećmi adpaviednaha ŭzrostu; abnaŭleńnie źmiestu navučańnia i mietadaŭ vykładańnia; udaskanalvańnie piedahahičnych technałohij; pavyšeńnie kvalifikacyjnaha ŭzroŭniu vykładčyckaha składu; pavyšeńnie sacyjalnaha statusu nastaŭnika i jaho roli ŭ hramadstvie».

• 0
• 0
• 0
• 0
• 0
• 0