Labiedźku nie vydajuć novy pašpart u RUUS, śćviardžajučy, što stary znachodzicca ŭ KDB
Lidar Abjadnanaj hramadzianskaj partyi Anatol Labiedźka nie moža atrymać novy pašpart. Va UUS Centralnaha rajona stalicy śćviardžajuć, što jaho pašpart znachodzicca ŭ KDB, paviedamiŭ palityk.
«Raniej načalnik pašpartnaha stała mnie kazaŭ, što pryčyna niavydačy novaha pašparta zaklučajecca ŭ tym, što ŭ mianie na rukach jość stary pašpart. Ciapier jany papravili hetu viersiju i kažuć, što nie vydaduć novy pašpart, tamu što stary pašpart znachodzicca ŭ KDB u miežach kryminalnaha rasśledavańnia», — paviedamiŭ Labiedźka.
Palityku skazali, što jon moža «vyrašyć pytańnie» ŭ sudovym paradku. «Heta taki lohki bandytyzm: zabrali dakumient i nie chočuć jaho viartać», — zajaviŭ jon.
«Ja skazaŭ, što moj pašpart abo zhubleny ŭ KDB, abo imi prosta vykradzieny. Atrymlivajecca zamknuty kruh: mnie nie vydajuć novy pašpart, bo ličać, što jon u mianie nie zhubleny, a znachodzicca ŭ KDB. Kab atrymać pašpart, ja navat nie viedaju, što treba rabić», — paviedamiŭ Labiedźka.
Palityk taksama adpraviŭ zvarot nakont situacyi z pašpartam staršyni KDB Vadzimu Zajcavu, adnak pakul adkazu nie atrymaŭ.
Anatol Labiedźka byŭ fihurantam kryminalnaj spravy ab masavych biesparadkach u Minsku 19 śniežnia. Paśla zatrymańnia ŭ noč z 19 na 20 śniežnia jon znachodziŭsia ŭ SIZA KDB, adkul byŭ vypuščany 7 krasavika pad padpisku ab niavyjezdie. 23 žniŭnia kryminalnaja sprava ŭ dačynieńni da lidara AHP była spyniena, ale pašpart z KDB jamu dahetul nie viarnuli. Adnak palityk paviedamiŭ, što ŭ jaho zastaŭsia stary pašpart, jakim jon moža karystacca ŭ suviazi z najaŭnaściu ŭ im dziejnych viz. Mienavita pa hetym pašparcie ŭ minułym miesiacy jon zmoh zrabić vizity ŭ Polšču i ZŠA. Labiedźka aformiŭ papiery na atrymańnie novaha pašparta ŭzamien taho, jaki znachodzicca ŭ KDB. Adnak u pašpartnym stale Centralnaha rajona Minska 22 vieraśnia lidaru AHP admovilisia vydać novy dakumient.
Kamientary