Zimoŭski: Ja nikoli nie kantralavaŭ praces hałasavańnia na «Jeŭrafeście»

Eks-kiraŭnik BT, jaki zaraz pracuje miedyjakansultantam u Sankt-Pieciarburhu, pryhadvaje, jak pisaŭ Łukašenku, što Alachno na «Jeŭrabačańni» ničoha nie śviecić, i «padpisaŭ» Jałfimava paśla prośby z Administracyi prezidenta.

«Na «Jeŭrabačańnie» pry mnie adpravili troch kankursantaŭ: Dzimu Kałduna, Rusłana Alachno i Piatra Jałfimava. Palinu Smołavu paśpieli vybrać jašče da mianie. Usie troje zhadanych vykanaŭcaŭ byli abranyja ŭ adpaviednaści sa standartami «Jeŭrabačańnia». To bok, heta lepšaje, što ŭ nas było na toj momant.

Kałdun uziaŭ 6-je miesca, i heta całkam zasłuha jaho, Biełteleradyjokampanii i kamandy, jakuju ŭ jakaści pradziusara ŭznačalvaŭ Filip Kirkoraŭ».

Da Kałduna pytańniaŭ niama. A astatnija dvoje?

«U Alachno šancaŭ było mała, bo jakraz źmianiŭsia farmat konkursu. Jon vylecieŭ ź finału, kudy, pavodle starych praviłaŭ, trapiŭ by aŭtamatyčna dziakujučy pośpiechu Kałduna. I ja navat napiaredadni konkursu pisaŭ prezidentu list pra toje, što nam ničoha nie śviecić. Kab tam nie było atmaśfiery zavyšanych čakańniaŭ.

Jałfimaŭ chacieŭ pracavać tolki sa svaim pradziusaram. Heta supiarečyła ŭmovam jaho kantrakta z BT, i my mieli prava ŭvohule «vykinuć» jaho z konkursu, jak čałavieka, jaki admoviŭsia padpisać damovu.

Darečy, jašče paśla pravała ANT ŭ 2010 hodzie nam prapanoŭvali zabrać konkurs nazad. Ja admoviŭsia.

Nie viedaju, navošta BT iznoŭ «paviałosia», ludzi ž daśviedčanyja».

Ci zaŭždy vy na 100% byli ŭpeŭnienyja ŭ ličbach, jakija štohod vyśviečvalisia na ekranach u konkursnaj studyi?

«Ja nikoli nie kantralavaŭ praces hałasavańnia. Tam byli kamisii, žury, jakija «varylisia» ŭ svaim katle, i adpaviednyja techničnyja rašeńni. Maja sprava była — arhanizacyjna zabiaśpiečyć usie akaličnaści. A kaho vybiaruć, ci moža jon (ci jana) pieć — heta mianie nikoli nie turbavała».

Što vy možacie skazać pra pradziusara Dźmitryja Baranava, jakoha abvinavačvajuć u falsifikacyi vynikaŭ «Jeŭrafesta»?

«Dźmitryj — šarahovy supracoŭnik. Takich na Biełteleradyjokampanii ŭ toj čas pracavała 3 tysiačy čałaviek. Da taho ž, u nas jon mała pracavaŭ, a našmat bolš supracoŭničaŭ z pradziusarskim centram Alaksandra Cichanoviča…

Čałaviek jon dobry, nikoli nie było praź jaho nijakich prablemaŭ. U muzycy dobra kiemić».

Čamu da «Jeŭrabačańnia» ŭ Biełarusi dahetul stolki ŭvahi? Z 2004 hoda ŭdzielničajem, ale nie dasiahnuli amal ničoha…

«Heta kompleks niepaŭnavartasnaści maładoj nacyi. Ničoha hety konkurs nie aznačaje, nasamreč.

A my ŭ im ŭdzielničajem zhodna z pryncypam «kab nie horš, čym u ludziej».

A my, darujcie za niaścipłaść, adrazu ŭziali 6-je miesca na darosłym «Jeŭrabačańni» i 1-je na dziciačym, pryciahnuli ŭ Minsk finał dziciačaha «Jeŭrabačańnia», jaki byŭ pryznany lepšym šoŭ u miežach hetaha konkursu. A tvorčuju hrupu, jakaja rychtavała dziciačaje „Jeŭrabačańnie“ ŭ Minsku, ja asabista padavaŭ na dziaržaŭnyja ŭznaharody. I toje ich «kidanuli» i ja vybačaŭsia pierad chłopcami i dziaŭčatami, jakija rabili hetaje śviata».

Ci nie čas užo supakoicca?

«Dla spraviadlivaści mušu zaŭvažyć, što, a priori kožny ŭdzieł Biełarusi ŭ peŭnych spabornictvach praduhledžvaje nakiravanaść na pieramohu. Heta ahulnaviadoma. Łukašenka maje peŭny spartyŭny azart i patrabuje, kab usie vykładalisia, na kožnaj dystancyi: «Jeŭrabačańnie» heta ci Alimpijada. Ale takoha, kab jon telefanavaŭ mnie i kazaŭ, što ja mušu adabrać lepšaha i h.d. — takoha nie było. Jon sam viedaje, čaho vartaja biełaruskaja estrada i čaho ad jaje možna čakać. I što tyja, kaho adbirali na «Jeŭrabačańnie», — heta stol ajčynnaha šoŭ-bizu. A toje, što kožny hod paśla pačynałasia — «My b zaśpiavali lepš i h.d." — heta ŭsio z haliny fantastyki».

Nakolki istotnaj była dola Biełteleradyjokampanii ŭ finansavańni «Jeŭrafesta» i ŭdzieła ŭ «Jeŭrabačańni»? Ci pracavali vy sa sponsarami?

«Biełteleradyjokampanija nikoli nie zaprašała sponsaraŭ dla arhanizacyi «Jeŭrafesta». My zaŭždy całkam apłačvali nacyjanalny adbor, padrychtoŭku i ŭdzieł pradstaŭnikoŭ Biełarusi ŭ «Jeŭrabačańni» sa svaich rachunkaŭ. U Biełteleradyjokampanii dastatkova srodkaŭ dla taho, kab pravieści jaki zaŭhodna konkurs nacyjanalnaha maštabu. Da taho ž, «Jeŭrafest» — heta nie takoje ŭžo i vydatkovaje mierapryjemstva. Jano ž pravodzicca na «dziaržaŭnaj» palanie! Možna, naprykład, napisać list u administracyju Pałaca Respubliki, kab dali źnižku. Sprava ŭ tym, kab umieć damovicca i skaracić vydatki da minimumu».

• 0
• 0
• 0
• 0
• 0
• 0