Luboŭ Kavalova prosić Łukašenku prypynić na hod vykanańnie prysudu ŭ dačynieńni da jaje syna
«Kali łaska, dajcie mahčymaść majmu synu dačakacca vynikaŭ razhladu zvarotu ŭ AAN».
16 sakavika Luboŭ Kavalova, maci pryhavoranaha da śmiarotnaj kary za saŭdzieł u teraryźmie Uładzisłava Kavalova, nakiravała zamoŭlenym listom i pa faksimilnaj suviazi ŭ Administracyju prezidenta zvarot da Alaksandra Łukašenki.
Jak paviedamiła Kavalova, jana prosić ab prypynieńni vykanańnia śmiarotnaha prysudu ŭ dačynieńni da syna na hod.
«Prašu ŭ paradku zabieśpiačeńnia realizacyi artykuła 61 Kanstytucyi dać daručeńnie orhanu, jaki zhodna z zakanadaŭstvam pavinien vykonvać pakarańnie, prypynić vykanańnie śmiarotnaj kary ŭ dačynieńni da majho syna na adzin hod, — havorycca ŭ adoźvie da kiraŭnika dziaržavy. — Spadziajusia, što za hety čas zvarot, jaki znachodzicca na razhladzie Kamiteta AAN pa pravach čałavieka, budzie razhledžany. Kali łaska, dajcie mahčymaść majmu synu dačakacca vynikaŭ razhladu zvarotu ŭ AAN. Prašu Vas, prypynicie karu na adzin hod».
Siońnia Luboŭ Kavalova razam z advakatam syna Stanisłavam Abraziejem znoŭ buduć sprabavać atrymać u SIZA KDB infarmacyju pra Uładzisłava Kavalova, pra toje, dzie jon znachodzicca, i pra jaho stan.
Nahadajem, 14 sakavika pa biełaruskim telebačańni było abvieščana, što kiraŭnik dziaržavy admoviŭ u pamiłavańni abvinavačanamu ŭ teraryźmie Dźmitryju Kanavałavu i abvinavačanamu ŭ saŭdziele ŭ teraryźmie Uładzisłavu Kavalovu. Jany pryhavorany Viarchoŭnym sudom da śmiarotnaj kary ŭ tym liku za ŭčynieńnie terakta ŭ minskim mietro 11 krasavika 2011 hoda.
Kamientary