«Biełaruski bok administracyjnymi mierami sprabavaŭ skaracić kolkaść rejsaŭ rasijskich avijakampanij»

Biełaruski bok sprabavaŭ administracyjnymi mierami skaracić kolkaść rejsaŭ rasijskich avijakampanij z 35 da 28 rejsaŭ na tydzień, choć mnohija pasažyry rasijskich avijapieravozčykaŭ zahadzia nabyli bilety.

U Rasavijacyi śćviardžajuć, što Pahadnieńnie ab pavietranych znosinach pamiž Rasijaj i Biełaruśsiu nie praduhledžvaje jakoha-niebudź rehulavańnia pa kolkaści palotaŭ i kolkaści avijakampanij jak dla biełaruskaha, hetak i dla rasijskaha bakoŭ u pavietranych znosinach pamiž krainami.

U apošni zimovy siezon da 25 sakavika hetaha hoda, zhodna z damoŭlenaściami, rasijskija i biełaruskaja avijakampanii mieli prava vykonvać pa 35 rejsaŭ na tydzień. Avijakampanija «Biełavija» latała pa piać razoŭ u sutki, a z rasijskaha boku — kožny dzień pa adnym rejsie vykonvali avijakampanii «JUTejr» i «S7» (Sibir), i try rejsy — «Aerafłot».

«Niahledziačy na dalejšy rost abjomaŭ pieravozak pamiž Rasijskaj Fiederacyjaj i Respublikaj Biełaruś, biełaruski bok administracyjnymi mierami sprabavaŭ skaracić kolkaść rejsaŭ rasijskich avijakampanij z 35 da 28 rejsaŭ na tydzień. Takija miery biełaruski bok sprabavaŭ realizavać niahledziačy na toje, što mnohija pasažyry zhadanych rasijskich avijapieravozčykaŭ zahadzia nabyli bilety dla palotaŭ pa maršrutach Maskva — Minsk abo Minsk — Maskva», — padkreślivajecca ŭ paviedamleńni Rasavijacyi.

Dla dasiahnieńnia ŭzajemnych damoŭlenaściaŭ avijacyjnyja ŭłady pravodzili pieramovy pa pytańniach pavietranych znosin pamiž stalicami dźviuch dzriažaŭ na roznych uzroŭniach.

Jak udakładniajuć u Rasavijacyi, papiarednija damoŭlenaści byli dasiahnutyja tolki ŭ paniadziełak ranicaj, 26 sakavika.

Da zamacavańnia svaich damoŭlenaściaŭ va ŭstanoŭlenym paradku baki pryniali rašeńnie ŭ intaresach pasažyraŭ rasijskaj i biełaruskaj avijakampanij paćvierdzić paloty pamiž Maskvoj i Minskam u poŭnym abjomie pa piać rejsaŭ u sutki da 29 sakavika, kali pavinny adbycca pieramovy bakoŭ u Maskvie.

«Raisjski bok vystupaje za źniaćcie lubych abmiežavańniaŭ u pavietranych znosinach pamiž Rasijskaj Fiederacyjaj i Biełaruśsiu, vynikam čaho budzie źmianšeńnie koštu avijabiletaŭ dla pasažyraŭ», — padkreślivajecca ŭ paviedamleńni Rasavijacyi.

Avijaznosiny pamiž Minskam i Maskvoj byli spynienyja ranicaj 26 sakavika. Rasavijacyja adklikała dazvoł na vykanańnie «Biełavija» ŭsich rejsaŭ ź Minska i Maskvy. Na ekstranna sklikanaj pres-kanfierencyi namieśnik hiendyrektara «Biełavija» Ihar Čarhiniec paviedamiŭ, što prablema ŭźnikła ŭ suviazi z žadańniem rasijskaha boku parušyć parytet i vykonvać piać rejsaŭ na dzień zamiest čatyroch. Miž tym, zaznačyŭ jon, jość pahadnieńnie pamiž uradami Biełarusi i Rasii ad 12 śniežnia 1997 hoda, jakoje praduhledžvaje kamiercyjny parytet u avijaznosinach pamiž Minskam i Maskvoj.

Na pytańnie, čamu «Biełavija» nie moža taksama arhanizavać piać rejsaŭ na dzień, jak choča zrabić rasijski bok, Čarhiniec patłumačyŭ, što hety napramak zaraz «kamiercyjna nieefiektyŭny».

Miž tym Ministerstva transpartu Rasii padčas pieramoŭ ź biełaruskim bokam 29 sakavika źbirajecca prapanoŭvać źniać usie abmiežavańni pa kolkaści pryznačanych pieravozčykaŭ, častot i hieahrafii palotaŭ.

Zaraz usie paloty pamiž Rasijaj i Biełaruśsiu vykonvajucca ŭ adpaviednaści z ustanoŭlenym avijakampanijami raskładam.

• 0
• 0
• 0
• 0
• 0
• 0
• 0
• 0