«Беларускі бок адміністрацыйнымі мерамі спрабаваў скараціць колькасць рэйсаў расійскіх авіякампаній»

Беларускі бок спрабаваў адміністрацыйнымі мерамі скараціць колькасць рэйсаў расійскіх авіякампаній з 35 да 28 рэйсаў на тыдзень, хоць многія пасажыры расійскіх авіяперавозчыкаў загадзя набылі білеты.

У Расавіяцыі сцвярджаюць, што Пагадненне аб паветраных зносінах паміж Расіяй і Беларуссю не прадугледжвае якога-небудзь рэгулявання па колькасці палётаў і колькасці авіякампаній як для беларускага, гэтак і для расійскага бакоў у паветраных зносінах паміж краінамі.

У апошні зімовы сезон да 25 сакавіка гэтага года, згодна з дамоўленасцямі, расійскія і беларуская авіякампаніі мелі права выконваць па 35 рэйсаў на тыдзень. Авіякампанія «Белавія» лятала па пяць разоў у суткі, а з расійскага боку — кожны дзень па адным рэйсе выконвалі авіякампаніі «ЮТэйр» і «С7» (Сібір), і тры рэйсы — «Аэрафлот».

«Нягледзячы на далейшы рост аб’ёмаў перавозак паміж Расійскай Федэрацыяй і Рэспублікай Беларусь, беларускі бок адміністрацыйнымі мерамі спрабаваў скараціць колькасць рэйсаў расійскіх авіякампаній з 35 да 28 рэйсаў на тыдзень. Такія меры беларускі бок спрабаваў рэалізаваць нягледзячы на тое, што многія пасажыры згаданых расійскіх авіяперавозчыкаў загадзя набылі білеты для палётаў па маршрутах Масква — Мінск або Мінск — Масква», — падкрэсліваецца ў паведамленні Расавіяцыі.

Для дасягнення ўзаемных дамоўленасцяў авіяцыйныя ўлады праводзілі перамовы па пытаннях паветраных зносін паміж сталіцамі дзвюх дзряжаў на розных узроўнях.

Як удакладняюць у Расавіяцыі, папярэднія дамоўленасці былі дасягнутыя толькі ў панядзелак раніцай, 26 сакавіка.

Да замацавання сваіх дамоўленасцяў ва ўстаноўленым парадку бакі прынялі рашэнне ў інтарэсах пасажыраў расійскай і беларускай авіякампаній пацвердзіць палёты паміж Масквой і Мінскам у поўным аб’ёме па пяць рэйсаў у суткі да 29 сакавіка, калі павінны адбыцца перамовы бакоў у Маскве.

«Раісйскі бок выступае за зняцце любых абмежаванняў у паветраных зносінах паміж Расійскай Федэрацыяй і Беларуссю, вынікам чаго будзе змяншэнне кошту авіябілетаў для пасажыраў», — падкрэсліваецца ў паведамленні Расавіяцыі.

Авіязносіны паміж Мінскам і Масквой былі спыненыя раніцай 26 сакавіка. Расавіяцыя адклікала дазвол на выкананне «Белавія» ўсіх рэйсаў з Мінска і Масквы. На экстранна скліканай прэс-канферэнцыі намеснік гендырэктара «Белавія» Ігар Чаргінец паведаміў, што праблема ўзнікла ў сувязі з жаданнем расійскага боку парушыць парытэт і выконваць пяць рэйсаў на дзень замест чатырох. Між тым, зазначыў ён, ёсць пагадненне паміж урадамі Беларусі і Расіі ад 12 снежня 1997 года, якое прадугледжвае камерцыйны парытэт у авіязносінах паміж Мінскам і Масквой.

На пытанне, чаму «Белавія» не можа таксама арганізаваць пяць рэйсаў на дзень, як хоча зрабіць расійскі бок, Чаргінец патлумачыў, што гэты напрамак зараз «камерцыйна неэфектыўны».

Між тым Міністэрства транспарту Расіі падчас перамоў з беларускім бокам 29 сакавіка збіраецца прапаноўваць зняць усе абмежаванні па колькасці прызначаных перавозчыкаў, частот і геаграфіі палётаў.

Зараз усе палёты паміж Расіяй і Беларуссю выконваюцца ў адпаведнасці з устаноўленым авіякампаніямі раскладам.

• 0
• 0
• 0
• 0
• 0
• 0
• 0
• 0