«Leki treba da kanca žyćcia. I što, mnie kožny raz brać recept?»

Čytač «NN» Siarhiej B. maje nieabchodnaść u harmanalnych preparatach kožny dzień. U jaho vydalili ščytapadobnuju załozu. Jon maje lhoty na atrymańnie ajčynnych preparataŭ, ale nabyvaje niamieckija leki. Ciapier jon vymušany nabyvać leki pa recepcie.

«Kab atrymać jaho, mušu jechać na pryjom u rajonnuju palikliniku, a heta niablizki šlach. Tam zapatrabujuć zdać analizy, i ź imi mnie daviadziecca znoŭ iści da doktara. U dziaržaŭnych paliklinikach vialikija čerhi i pierahružanyja daktary», — kaža čytač. Siarhiej turbujecca, što z-za nieabchodnaści dazvołu lekaraŭ na atrymańnie preparata ŭ jaho mohuć uźniknuć niepradbačanyja situacyi.

«A jak doktara ź niejkaj pryčyny nie budzie na miescy? Chto mnie vypiša recept? Leki ž mnie treba prymać štodzionna».

Čytač raskazvaje, što šmat razoŭ telefanavaŭ na «haračuju liniju» Minachovy zdaroŭja, ale numar uvieś čas byŭ zaniaty. «Mabyć, nie tolki ŭ mianie jość krytyčnyja pytańni da ministerstva»..

Niaŭmolnaja statystyka i aptymizm ministerstva

Inicyjatyva Minachovy zdaroŭja ŭ mnohich vyklikała sumnieńni. Navat aficyjnaja statystyka niaŭmolna śviedčyć pra niedachop miedykaŭ. Tolki paśla pieršaha hoda adpracoŭki dypłoma pracu kidaje da traciny maładych lekaraŭ.

U ministerstvie aptymistyčna kažuć, što nieabchodnaść atrymańnia receptaŭ padvysić zahružanaść supracoŭnikaŭ paliklinik maksimum na 15%.

Aficyjna

Z 1 lipienia 2012 biez recepta možna nabyć 3279 najmieńniaŭ lekavych srodkaŭ, što składaje 61,6% lekaŭ ad usich zarehistravanych u krainie. Recept ad doktara spatrebicca dla nabyćcia 1985 lekavych srodkaŭ. Tolki pa receptach ciapier možna nabyć narkatyčnyja, psichatropnyja i mocnadziejnyja srodki; srodki, jakija prymianiajucca dla lačeńnia epilepsii, psichałahičnaj i fizičnaj zaležnaści ad roznych rečyvaŭ, antybijotyki treciaha i čaćviortaha pakaleńniaŭ, insulin, harmony, anaboliki, niekatoryja antyarytmičnyja, hipateziŭnyja i kardyjataničnyja lekavyja srodki, a taksama lekavyja srodki, što prymianiajucca dla lačeńnia ankałahičnych chvorych.

Recept praź internet

Zusim nie fantastyka. U Estonii, naprykład, heta stałaja praktyka. Pacyjent atrymlivaje recept ad doktara praź internet na svaju ID-kartku i ź joj idzie ŭ apteku. U Biełarusi elektronnyja recepty pačali vydavać dźvie staličnyja palikliniki. U budučyni płanujecca raspaŭsiudzić hetuju praktyku pa ŭsioj krainie. A pakul toje, u bolšaści minskich paliklinik tałon da doktara možna zamović praź internet.

• 0
• 0
• 0
• 0
• 0
• 0
• 0
• 0