I nie pierajmajecca, što jahonymi słovami manipulujuć.
"Ciapier čarha biełaruskich uładaŭ prademanstravać svajo žadańnie stać bližej da jeŭrapiejskich struktur i Savieta Jeŭropy". Pra heta zajaviŭ staršynia Parłamienckaj asamblei Savieta Jeŭropy (PASIE) Renie van der Linden 16 krasavika ŭ Strasburhu (Francyja) padčas videakanfierencyi, adkazvajučy na pytańnie BiełaPAN.
"Pakažycie svaju dobruju volu i svajo žadańnie stać členam vielizarnaj jeŭrapiejskaj siamji", - skazaŭ kiraŭnik PASIE. Pry hetym jon padkreśliŭ, što nie źjaŭlajecca prychilnikam "praciahvańnia izalacyi" Biełarusi. "Heta drenna dla abodvuch bakoŭ, - ličyć R. van der Linden. - Ale pavinny być vyraznyja znaki i z našaha boku, i z boku biełaruskich uładaŭ ab hatoŭnaści supracoŭničać".
R. van der Linden padkreśliŭ, što jaho studzieński vizit u Minsk prademanstravaŭ hatoŭnaść PASIE i Savieta Jeŭropy da dyjałohu. Kiraŭnik PASIE adznačyŭ, što ŭ Minsku mieŭ mahčymaść sustrecca z pradstaŭnikami ŭsich apazicyjnych palityčnych partyj, sa studentami, z relihijnymi liderami, a taksama ź ministram zamiežnych spraŭ Biełarusi Siarhiejem Martynavym, śpikieram Pałaty pradstaŭnikoŭ Uładzimiram Kanaplovym i staršynioj Savieta Respubliki Hienadziem Navickim. "Ja taksama sustreŭsia z žonkaj Kazulina, jaki ciapier u turmie i jakoha ja liču palityčnym źniavolenym", - skazaŭ R. van der Linden. Pry hetym jon padkreśliŭ, što biełaruskija ŭłady admaŭlajuć najaŭnaść palityčnych źniavolenych u krainie. "Kali ŭ nas razychodziacca mierkavańni pra toje, ci jość palitźniavolenyja albo niama, davajcie źvierniemsia da mižnarodnych ekśpiertaŭ, - skazaŭ staršynia PASIE. - Josť daśviedčanyja ekśpierty, jakija vyvučać usie vypadki i vyniasuć svajo rašeńnie, jakoje my prymiem".
R. van der Linden taksama nahadaŭ, što padčas vizitu ŭ Minsk u intervju prahramie "Panarama" Pieršaha kanała biełaruskaha telebačańnia mieŭ mahčymaść "publična vykazać svajo mierkavańnie ab niedapuščalnaści najaŭnaści palitźniavolenych u krainie" i ab tym, što prezidenckija vybary ŭ sakaviku 2006 hoda "nie byli svabodnymi i sumlennymi". Pry hetym R. van der Linden adznačyŭ, što aŭtary prahramy "troški manipulavali" pry pierakładzie jaho słoŭ z anhlijskaj na ruskuju. "Ale tyja, chto razumieje maju anhlijskuju, mahli prasłuchać intervju ŭ aryhinale", - skazaŭ R. van der Linden.
U aryhinale pramovy R. van der Lindena hučała vykazvańnie ab "źniavolenych, jakija ličacca palityčnymi" ("prisoners considered as political prisoners"), a ŭ pierakładzie - ab "palitycy prezidenta".
Kamientary